Yesu​—Gik ma Ji Wacho Kuome

“Onge kiawa ni Yesu Ja-Nazareth . . . e jal miwuoyo kuome ahinya chakre chon.”—H. G. Wells, Ja-Ingresa manono weche machon.

“Kristo . . . en ng’at makende e kind joma chon ma ne nigi huma.”—Philip Schaff, jasomo ma Ja-Swistzerland.

NG’ANO mowinjore oluongi ni ng’at maduong’ie moloyo mosedak e piny? Ang’o minyalo tigo e ng’eyo ni ng’ato en ng’ama duong’ moloyo jomoko? Be en lony ma en-go kuom weche lweny? Tekrene? Rieko ma en-go? Koso en ranyisi moketo ne ji koda kaka wechene koda timbene kelo lokruok e ngimagi?

Ne ane gima josomo, josayans, jondiko, jotend siasa, koda jomamoko machon gi masani, osewacho kuom Yesu Kristo, Ja-Nazareth:

“En gima tek mondo ng’ato otamre ni Yesu ma Ja-Nazareth ne en ng’at ma rahuma moloyo ji duto, ok mana kuom higini tara ariyo mosekalo kende, to kuom kinde duto ma dhano osebetie.”—Reynolds Price, Ja-Amerka ma jandiko kendo janon weche Muma.

“Jal ma ne onge ketho kata matin ne ochiwore kaka misango mondo jomoko ema oyud kony, moriwo nyaka jowasike, mi nobedo rawar mar piny. Mano ne en tim makare chuth.”—Mohandas K. Gandhi, jasiasa kendo jatend din e piny India.

“Kane an nyathi, ne opuonja weche manie Muma koda manie Talmud. An Ja-Yahudi, to ayie ahinya gi Ja-Nazareth ma en ng’at makende.”—Albert Einstein, jasayans monyuol Germany.

‘An aneno Yesu Kristo, kaka ng’at makende ahinya mosebetie kuom kinde duto mag ngima dhano, ka en kaka Wuod Nyasaye kendo kaka Wuod Dhano. Weche duto ma ne owacho kendo timo konyowa e kindegi, kendo ok nyal wach gima kamano kuom ng’at moro amora mapod ngima kata mosetho.’—Sholem Asch, jandiko monyoul Poland kaluwore gi gaset miluongo ni Christian Herald.

‘Kuom higini piero adek gabich mag ngimana, ne an nihilist, tiende ni ng’at ma ok ket yie kuom gimoro amora. Higini abich mosekalo ne ayie ni Yesu en jal manitie adier. Ne ayie kuom puonjo mag Yesu Kristo, kendo kit ngimana duto nobedo gi lokruok ma apoya.’—Count Leo Tolstoy, jandiko kendo jasomo ma Ja-Russia.

“Onge ng’at moro amora e piny mosekelo lokruok e ngima dhano maloyo [Yesu], to podi odhi nyime timo kamano.”—Kenneth Scott Latourette, Ja-Amerka ma jandiko kendo janon weche machon.

“Be wanyalo kawo ni weche mawuoyo kuom ngima Yesu ne ok otimore? Kuom adier, ok en kamano. Mopogore gi mano, weche mawuoyo kuom ngima Socrates, ma nenore ni onge ng’at ma nigi kiawa kuomgi, ok osir e yo makare kaka mago mawuoyo kuom ngima Yesu Kristo.”—Jean-Jacques Rousseau, jasomo ma Ja-France.

Kuom adier, nenore maler ni, Yesu Kristo ema owinjore obednwa jal mwaluwo ranyisi mare. Paulo, ma en jal ma ne osomo ahinya e kinde Jokristo mokwongo, kendo ma ne oyier gi Yesu mondo obed jalupne, kendo mondo owuo kuom Yesu ne ogendini, jiwowa ni ‘wateg wang’wa’ kuom Yesu. (Jo Hibrania 12:2; Tich Joote 9:3) Ang’o ma Yesu nyalo puonjowa kuom kaka onego wadag? Ere kaka ngima Yesu nyalo konyi?