Miriambo mar 2: Ni Joma Richo Isando E Mach

Miriamboni ne ochakore nade? ‘Kuom jorieko machon mag Grik, Plato e jal ma nochiko ahinya pach ji kuom puonj mar kar mach misandoe ji [Hell].’—Histoire des enfers (Sigand Kar Mach Misandoe Ji), mondik gi Georges Minois, ite mar 50.

‘E dier higini mag 100 E Ndalowa, Jokristo ma ne oseyudo tiegruok kuom riekni mag Grik nochako neno ni ne dwarore ni ginyis yie margi ka gitiyo gi gik ma ne gisepuonjore. Riekni ma ne omorogi ahinya ne en Platonism [puonj mag Plato].’—The New Encyclopædia Britannica (1988), Volume 25, ite mar 890.

“Kanisa bende puonjo ni nitie kar mach misandoe ji, kendo ni majno siko nyaka chieng’. Mapiyo bang’ tho, chuny joma tho kaka joricho dhi e mach misandoe ji, kama giyudoe kum mar mach, ‘ma en mach ma ok tho.’ Kum maduong’ mar mach misandoe ji, en ni ng’ato ipogo gi Nyasaye nyaka chieng’.”—Catechism of the Catholic Church, 1994 edition, ite mar 270.

Muma to wacho ang’o? ‘Nimar joma ngima ong’eyo ni gibiro tho, to jo motho ok ong’eyo gimoro, nimar onge tich, kata lony, kata ng’eyo gimoro, kata rieko, e liel kama gidhiye.’—Eklesiastes 9:5, 10.

E dho Hibrania, Sheol ma en wach mawuoyo kuom “kar joma otho,” iloko ni “hell” e loko moko mag Muma. Ndiko mar Eklesiastes fwenyonwa ang’o kuom chal mar jomotho? Be gisandore e Sheol mondo gichul richogi? Ooyo, nimar “ok ging’eyo gi moro.” Mano emomiyo kane Ayub chandore nikech tuwo moro malich, ne okwayo Nyasaye niya: “Mad irita e hell [Sheol, e dho Hibrania].” (Ayub 14:13; Douay-Rheims Version) Kapo ni Sheol ne en kar mach misandoe ji nyaka chieng’, kare tiend kwayo mar Ayub ne en ang’o? Kaluwore gi Muma, hell, en mana liel, kama onge tich moro amora.

Donge yo molergo wach hell en gima winjore malong’o kendo oluwore gi gima Ndiko wacho? En richo mane, kata bed mana ni olich manade, manyalo miyo Nyasaye ma jahera osand ng’ato ma onge giko? (1 Johana 4:8) Kare ka puonj mar mach misandoe ji en miriambo, be mano nyiso ni ngima mar polo bende en miriambo?

Pim gi ndikogi mag Muma: Zaburi 146:3, 4; Tich Joote 2:25-27; Jo Rumi 6:7, 23

ADIERA EN:

Nyasaye ok sand ji e mach

[En mar manie ite mar 5]

Barrators—Giampolo/The Doré Illustrations For Dante’s Divine Comedy/Dover Publications Inc.