CHIER mar Yesu ok en mana wach moro machon maok mulwa e kindegi. Jaote Paulo ne onyiso kaka wachno mulowa kane ondiko niya: “Chiero Kristo a kuom jo motho; en nyak mokwongo mar jogo mosenindo. Nikech kaka tho noa kuom dhano, chier mar jo motho bende noa kuom dhano. Kaka ji duto tho e i Adam, kamano bende nomi ji duto doko mangima e i Kristo.”—1 Jo Korintho 15:20-22.

Ne ochier Yesu chieng’ Nisan 16, higa mar 33, odiechieng’ ma Jo-Yahudi ne chiwoe ne Jehova Nyasaye nyak mokwongo mag chambgi e hekalu mar Jerusalem. Kuom luongo Yesu ni nyak mokwongo, Paulo ne nyiso ni ne nitie jomamoko mabende ne idhi chier.

Weche ma Paulo medo wacho lero gima chier mar Yesu biro timo. Paulo wacho niya: “Nikech kaka tho noa kuom dhano, chier mar jo motho bende noa kuom dhano.” Waduto watho nikech richo ma ne wayudo koa kuom Adam. Kata kamano, kuom chiwo ngimane makare kaka misango, chier Yesu ne oyawo ne dhano yo magonyogi kuom bedo wasumb richo kod tho. Koketo wechego e yo machuok, Paulo nondiko niya e bug Jo Rumi 6:23: “Misach richo en tho; to mich Nyasaye en ngima mochwere e Yesu Kristo Ruodhwa.”

Yesu ne onyiso kaka thone gi chierne konyowa. Kowuoyo kuome owuon, nowacho niya: “Wuod dhano bende onego ochungi; mondo ng’a ma yie kuome obed gi ngima mochwere. Nikech Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.”—Johana 3:14-16.

Par ane ni inyalo dak nyaka chieng’ maonge rem, chandruok, kata kuyo! (Fweny 21:3, 4) Donge mano ber ndi! Jasomo moro ne owacho kama: “Liete paro ne ng’ato kaka ngima chuok, chier to miyo tho bedo mana kuom kinde machuok.” Kuom adier, chier mar Yesu kelonwa ngima mochwere!