Ang’o monego watim mondo wamor Nyasaye? Be en adier ni nitie chike mang’eny tandawuoya manyaka waluw? Gimaber en ni ok en kamano. Yesu Kristo, Wuod Nyasaye owuon nowacho ni gik ma Nyasaye dwaro ni mondo watim inyalo riw e wach achiel.—Som Mariko 12:28-31.

Non ane gik ma ne timore kane Yesu okwongo wacho wechegi. Noyudo opuonjo e hekalu chieng’ Nisan 11, odiechienge manok kapok otho. Wasike ne otemo rwake e obadho gi penjo ma korgi tek. Kata kamano, ne omiyo dhoggi omoko gi dwoko ma nochiwo. Kae to ne gipenjo Yesu penjoni: “Ere chik mokwongo kuom chik duto?”—Wes 28.

Penjono ne tek. Moko kuom Jo-Yahudi ne yware ni kuom chike 600 ma ne loso Chik Musa, mane ma ne okwongo kata ne dwarore moloyo. Moko to ne wacho ni chikego duto ne romre kendo kawo ni chike moko dwarore moloyo mamoko ne ok en kare. Yesu ne odwoko penjono nade?

Kodwokogi, Yesu ne ok ohulo mana chik achiel, to ne ohulo chike ariyo. Mokwongo, ne owacho niya: “Her Ruoth Nyasachi gi iyi duto, kendo gi chunyi duto, kendo gi riekoni duto, kendo gi tekoni duto.” (Wes 30; Rapar mar Chik 6:5) Nitie tudruok e tiyo ne Nyasaye gi “iyi,” gi “riekoni,” gi “chunyi,” koda gi “tekoni.” * Tiend wachno en ma: Hero Nyasaye onego omul kit ngima ng’ato duto, parone koda nyalone duto. Buk moro malero Muma keto wachno kama: “Dwarore ni ng’ato oher Nyasaye chuth gi gimoro amora ma en go.” Omiyo kihero Nyasaye, pile pile ibiro timo duto minyalo mondo imore.—1 Johana 5:3.

Mar ariyo, Yesu ne owacho ni: “Her wadu kaka iherori iwoun.” (Wes 31; Tim Jo Lawi 19:18) Ok inyal pogo hero Nyasaye gi hero wadu. Hero wadu chakore gi hero Nyasaye. (1 Johana 4:20, 21) Ka wahero jowetewa kaka waherore wawegi, wabiro timonegi kaka dwaher ni gin be gitimnwa. (Mathayo 7:12) Ka watimo kamano wanyiso ni wahero Nyasaye ma ne ochweyowa kaachiel kod gin e kido mare.—Chakruok 1:26.

Ang’o momiyo dwarore ahinya ni waher Nyasaye kod wadwa? Yesu nowacho ni: “Onge chik moro machielo moloyo magi.” (Wes 31) E injili machielo, Yesu nowacho ni chike moko duto otenore kuom chike ariyogi.—Mathayo 22:40.

Timo gima Nyasaye dwaro ok en gima tek. Gik moko duto modwaro ni mondo watim inyalo riw e wach achiel: hera. Kinde duto hera ema osebedo mise mar lamo madier kendo obiro siko kamano. Hera ok en mana gima iwacho gi dhok kata ma ng’ato winjo mana e chunye, to en gima inyiso kuom tim. (1 Johana 3:18) Donge nyalo bet maber ka ipuonjori nyiso e ngimani ni ihero Jehova Nyasaye ma ‘en hera’?—1 Johana 4:8.