MANA kaka ne waneno e sula motelo ne mae, Yesu ne nigi ngima mamor. Omiyo, ka wadwaro bedo gi mor e ngimawa, dwarore ni waluw ranyisi mare kendo wawinj puonjne.

Mano bende e kaka Jehova jiwowa ni mondo watim mana kaka inyiso e ndiko moket malo kae. Wuotho kaka Yesu nowuotho oriwo luwo ranyisi mare kendo tiyo gi puonjne e yore duto mag ngimawa. Timo kamano biro miyo Nyasaye oyie kodwa kendo biro konyowa bedo gi ngima mamor.

Yesu nomiyowa puonj manyalo konyowa wuotho mana kaka ne owuotho. Moko kuom puonjgi yudore e Twak mar Got ma ne Yesu ogolo kendo ma en twak mong’ere ahinya. We wanon ane moko kuom puonjgi koda kaka wanyalo tiyo kodgi e ngimawa.

KAKA PUONJNO KONYOWA BEDO GI NGIMA MAMOR:

Yesu nonyiso ni ne ochwe dhano gi dwaro mar ng’eyo Nyasaye. Wagombo ng’eyo dwoko mag penjo kaka magi: Ang’o momiyo Nyasaye ne ochweyowa? Ang’o momiyo chandruok ng’eny e piny? Be Nyasaye dewowa kuom adier? Ka ng’ato osetho, be onyalo bedo mangima kendo? Mondo wabed gi ngima mamor, dwarore ni wayud dwoko mag penjo kaka mago. Yesu nong’eyo ni dwoko mag penjogo nyalo mana yudore kamoro achiel—e Muma. Kane owuoyo gi Wuon mare e lamo, Yesu nowacho niya: “Wachni en adiera.” (Johana 17:17) Be Muma nyalo konyowa ng’eyo Nyasaye gadier mi wabed mamor?

WECHE MA NE OTIMORE E NGIMA NG’ATO:

Esa ma ne en jawer mang’ula e band moro mong’ere, humbe ne dhi ka medore. Kata kamano, Esa pod ne winjo ni oremo gimoro e ngimane. Owacho niya: “Kata obedo ni ne ahero bedo e bandno, ne pod aneno ni aonge mor e ngimana.” Bang’ kinde, Esa ne oromo gi achiel kuom Joneno mag Jehova. Owacho niya: “Ne apenje penjo modhuro. Dwokone malong’o kendo mowuok e Ndiko nokawa gi wuoro, omiyo ne ayie ochak puonja Muma.” Gik ma Esa nopuonjore e Muma nomulo chunye kendo nomiyo ochiwo ngimane mondo oti ne Jehova. Owacho niya: “Kinde mokalo, ne an ng’at masiko donjo e chandruok moro bang’ machielo. To gie sani, an gi ngima mamor gadier.” *

KAKA PUONJNO KONYOWA BEDO GI NGIMA MAMOR:

Bedo mang’won oriwo kecho ji kendo dewogi. Yesu nonyiso jochan ng’wono. Nikech ng’wono, nokawo okang’ mar konyo jogo ma ne chandore. (Mathayo 14:14; 20:30-34) Ka waluwo ranyisi mar Yesu e nyiso ng’wono, wamiyo ngimawa medo bedo gi mor nikech jogo manyiso jomoko ng’wono yudo mor. (Tich Joote 20:35) Wanyalo konyo joma nie chandruok kokalo kuom weche koda timbe mang’won. Be en adier ni nyiso ng’wono miyo ngimawa medo bedo mamor?

WECHE MA NE OTIMORE E NGIMA NG’ATO:

Maria gi chwore, Carlos, gin ranyisi maber e nyiso ng’wono. Min Maria ne otho ma wuon Maria odong’ kende, kendo kuom higni mogwaro, osebedo gi tuwo mamiyo ok onyal wuok e kitanda. Maria gi Carlos nokawe mokele e odgi kendo gin  e ma gikonye e yore duto. Giwacho ni nitie kinde mang’eny maok ginind gotieno, seche moko gise kata ringo kode e osiptal sama tuwone mar sukari omedore. Giwacho ni kinde moko giol ahinya. Kata kamano, gimor mana kaka Yesu nowacho, nimar gin gi kuwe mang’eny e chunygi nikech ging’eyo ni gikonyo wuon Maria kaka dwarore.—1 Timotheo 5:8.

KAKA PUONJNO KONYOWA BEDO GI NGIMA MAMOR:

Bedo ng’at “mohero kuwe” tiende sie en bedo ng’at “makelo kuwe.” Ere kaka bedo ng’at makelo kuwe kelo mor e ngima? Ka watimo matek mondo kuwe obedie e kindwa gi jomoko, wabedo gi winjruok maber gi jogo mwatudorego. Luwo puonj ma Muma chiwoni biro konyowa: “Ka nyalorenu, beduru gi kuwe kod ji duto, kaka unyalo.” (Jo Rumi 12:18) “Ji duto” oriwo joodwa koda jomamoko manyalo bedo ni ok gin Jokristo wetewa. Be en adier ni bedo gi kuwe gi “ji duto” nyalo miyo ngimani omed bedo mamor?

WECHE MA NE OTIMORE E NGIMA NG’ATO:

Ne ane gima ne otimore e ngima dhako moro miluongo ni Nair. Kuom higni, osenyagore gi chandruoge mang’eny mosemiyo bedo gi kuwe, to moloyo e ode, ok osebedone mayot. Nyaka ne chwore weye higni madirom 15, osebedo kopidho nyithinde ka en kende. Achiel kuom yawuote ne tiyo gi yedhe mamero kendo kinde mang’eny nobedo ng’at ma rori madwaro hinyo nyiminene koda Nair min mare. Nair wacho ni gik mosepuonjore e Muma osemiye teko mar bedo ng’at makelo kuwe kata e bwo chandruoge matek kaka mago. Otemo bedo ng’at maok yware e weche kata chuno gik moko. Otemo bedo ng’at mang’won, ma neno ne ji lit, kendo matemo timo ne jomoko kaluwore gi chalgi. (Jo Efeso 4:31, 32) En gadier ni puonjruok bedo ng’at makelo kuwe osekonye bedo gi winjruok maber gi joode koda jomamoko.

Ka waluwo puonj mariek mag Yesu, wabiro yudo mor e ngima kendo wabiro bedo gi chuny mokuwe. Kata kamano, mondo wabed gi ngima mamor gadier, dwarore ni wang’e bende gima biro timore e kinde mabiro. Kuom adier, ere kaka wanyalo bedo mamor ka geno ma wan-go en mana bedo moti, bedo matuwo, kendo tho? Donge mano e kaka ngima chalo e pinyni?

Kata kamano, nitie wach maber! Jehova nogwedh jogo duto matemo ‘wuotho kaka [Yesu] bende nowuotho.’ Jehova osingo ni machiegni obiro loko piny obed manyien kama dhano moluoro Nyasaye nodagie nyaka chieng’ e ngima makare chuth kaka Jehova ne dwaro a e chakruok. Wachne wacho kama: “Koro kar dak mar Nyasaye ji ni go; Nyasaye nodag kodgi, kendo ginibed joge, mi Nyasaye owuon nobed kodgi. Kendo Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie, nikech gik machon osekadho.”—Fweny 21:3, 4.

Maria, dayo ma jahigni 84 ma ne owuo kuome e sula mokwongo, mor nikech geno mar dak e ngima ma kamano. To nade in? Be diher ng’eyo weche momedore e wi “ngima maradier”—mabiro bedoe ka Pinyruodh Nyasaye locho? (1 Timotheo 6:19) Ka en kamano, inyalo penjo Joneno mag Jehova man machiegni kodi kata inyalo ndiko ne joma ogoyo gasedni. *