DONGE waduto wasebedo e chal matek ma waneno ni dwarore ni wakwa ng’ato okonywa? Kinde mang’eny wajodhi ir osiep madewowa kendo mwang’eyo ni osenyagore maber gi pek mwayudono. Ng’at ma jahera kendo mosekalo e chandruoge manyalo bedo ni wanyagorego nyalo bedo osiep maber gadier.

Ji mang’eny nigi paro ma kamano kodok korka lemo. Nikech gineno ni Nyasaye en ng’at mamalo ahinya, giluor wuoyo kode e lamo achiel kachiel, omiyo giwinjo ka gin thuolo moloyo wuoyo gi jo maler. Gineno ni nikech joma lergo osekalo e tembe koda chandruoge mag dhano, gin ema ginyalo ng’eyo maber chal margi ma gikonygi. Kuom ranyisi, joma oselalo gimoro maduong’ e ngimagi nyalo neno ni ber mondo giter lamogi ne ng’at “Maler” miluongo ni Anthony ma Padua—ma iwacho ni ochung’ ne gik molal kata mokwal. To kapo ni gilemo ne chiaye moro matuwo, ginyalo kwayo ng’at “Maler” miluongo ni Francis ma Assisi, to kapo ni chunygi ema onyosore, to ginyalo kwayo ng’at “Maler” miluongo ni Jude Thaddeus.

To ere kaka wanyalo ng’eyo kabe tero lemo ne joma ler en en gima Ndiko oyiego? Nikech lemo en wuoyo gi Nyasaye, ber mondo wapenjre niya: Be Nyasaye winjo lemowa? Bende, wanyalo penjore niya: Nyasaye neno nade ka ji tero lemo ne joma ler?

Kwayo joma ler otenore kuom puonj mar Kanisa mar Jo-Katholik mawacho ni joma ler nyalo kwayo Nyasaye e lowa. Kaluwore gi New Catholic Encyclopedia, tiend puonjno en ni “ng’at mowinjore e wang Nyasaye nyalo kwayo mondo Nyasaye okech ng’at machielo.” Omiyo, ng’at malamo joma ler geno ni obiro yudo gweth nikech ng’at malerno nigi winjruok makende gi Nyasaye.

Be Muma puonjo gima kamano? Jomoko wacho ni jaote Paulo ne ochako puonjo wachno e barupe ma ne ondiko. Kuom ranyisi, barua ma ne ondiko ne Jokristo man Rumi nowacho niya: “To asayou kuom Ruodhwa Yesu Kristo, kendo kuom hera mar Roho, mondo uked kaachiel koda e lemo, kukwayona Nyasaye.” (Jo Rumi 15:30) Be Paulo ne wacho ni Jokristo wetene okwa Nyasaye e loye nikech noparo ni Jokristogo nigi winjruok makende gi Nyasaye? Ooyo ngang’. Kapo ni winjruok maber gi Nyasaye ema ne dwarore, gin ema dine gikwayo Paulo ma ne en jaote Kristo mondo olemnegi. Paulo ne nyiso ni en gima kare kwayo Jakristo wadwa mondo olem e lowa. Kata kamano, mano opogore ahinya gi lemo kwakwayo ng’at  mwaparo ni nie polo mondo onyis Nyasaye e lowa gik mwadwaro. Ang’o momiyo wawacho kamano?

E Injili mar Johana, Yesu wacho kama: “An e yo, kendo an e adiera, kendo an e ngima; ng’ato ok bi ka Wuoro ma ok okadho kuoma.” (Johana 14:6) Owacho bende ni: ‘Wuoro nomiu gi mukwaye e nyinga.’ (Johana 15:16) Yesu ne ok owacho ni walem ka wakwaye kae to en ema obiro wuoyo gi Nyasaye e lowa. Kar mano, mondo Nyasaye owinj lemowa, en ema onego wakwaye achiel kachiel ka watimo kamano e nying Yesu to ok kokalo kuom ng’at moro amora.

Kane jopuonjre Yesu onyise ni opuonjgi lemo, Yesu nowacho ni: “Kulemo wachuru ni, ‘Wuonwa, Nyingi mondo obed maler.’” (Luka 11:2) Ee, wacho ni “kulemo” tiende ni kinde ka kinde mwalemo, onego walem kwakwayo Nyasaye, to ok Yesu kata ng’at machielo. Kaluwore gi puonj ma achiel kachiel ma ne Yesu opuonjogi, donge nenore maler ni onego walem ka wakwayo Nyasaye e nying Yesu Kristo to ok kokalo kuom jomoko nono kata “joma ler”?

Lemo en gima duong’ ne Nyasaye. Nikech mano, lamo ng’ato ang’ata mopogore gi Nyasaye en gima Muma kwedo. (Johana 4:23, 24; Fweny 19:9, 10) Mano e momiyo Nyasaye kende ema onego waterne lemowa.

E Twak mar Got ma ne Yesu ogolo, nochiwo ranyisi mar wuoyi ma ne kwayo wuon mare gimoro mondo ocham. Be wuon nyathi nyalo miye kidi kar miye kuon, kata thuol kar rech? (Mathayo 7:9, 10) Janyuol ma jahera ok nyal timo gima chal kamano ngang’!

Par ane ni in janyuol. Nitie gimoro ma nyathini dwaro ahinya ni imiye. Isetimo kinda ma winjruok me kindu osebedo maber kendo kinde duto isebedo ng’at ma nyathine wuoyogo mayot. Kata kamano, nikech gimoro nyise ni ok ibi rwako kwayoneni maber kendo koro oluor, okwayo ng’at machielo mondo ema okwayi gima odwarono e loye. Inyalo winjo nade? To nade ka mano koro ema obedo timne, ni kinde duto modwaro gimoro kuomi to ng’atno ema ooro iri, kendo nenore ni odwaro siko gi timno? Be dibed mamor gi gima kamano? Ooyo ngang’! Jonyuol mohero nyithindgi dwaro ni nyithindgi owuo kodgi achiel kachiel ka gin gi wach kendo gidwaro ni nyithindgi obed thuolo kwayogi gima gichando.

Kolero tiend ranyisi ma ne otiyogo mar nyathi makwayo wuon-gi chiemo, Yesu nowacho ne oganda kama: “Ka un jo maricho ung’eyo miyo nyithindu mich mabeyo, Wuonu me polo ok nochiw gik mabeyo moloyo ni jo ma kwaye koso?” (Mathayo 7:11) En adier ni pile jonyuol gombo ahinya miyo nyithindgi gik mabeyo. Gombo ma Wuonwa me polo nigo mar winjo kendo miyowa gik mwakwaye duong’ moloyo kata mana mar jonyuol.

Nyasaye dwaro mondo wadhi ire achiel kachiel e lamo kata obedo ni waneno ni nyawowa ng’eny ahinya. En owuon ema owinjo lemowa maok omiyo ng’ato ang’ata migawono. Muma jiwowa niya: “Ket ting’ mari kuom Jehova, mi nopidhi.” (Zaburi 55:22) Kar paro ni joma ler kata jomoko nono ema nyalo lemonwa mondo Nyasaye owinjwa, onego wang’e ni Jehova Nyasaye oikore winjo lemowa kendo odwaro ni walame achiel kachiel.

Wuonwa me polo dewowa ng’ato achiel achiel. Odwaro konyowa e chandruogewa kendo odwaro ni wasud machiegni kode. (Jakobo 4:8) Mano kaka wamor ni wan gi thuolo mar wuoyo gi Nyasachwa kendo Wuonwa ma en ‘jawinj kwayo mar ji’!—Zaburi 65:2.