Be iyie ni Nyasaye nitie? Ka en kamano, be inyalo siemo gik manyiso ni entie? Adiera en ni olworwa gi gik manyiso ni nitie Jachwech mariek, ma nigi teko, kendo ma jahera. Gigo gin gik mage? Kendo ang’o momiyo wanyalo wacho gadier ni gigo nyisowa ni Nyasaye nitie? Mondo wayud dwoko, we wane ane weche ma jaote Paulo ne ondiko e barua ma ne okowo ne Jokristo ma ne ni Rumi.

Paulo nowacho niya: “Nyaka a chuech piny gik ma ok ne mag Nyasaye, kaka tekone mochwere, gi kite, mineno kuom gik ma en nochueyo, nenore ratiro, mondo kik giwuondore ni gikiya.” (Jo Rumi 1:20) Paulo nonyiso ni chwech Nyasaye nyiso maonge kiawa ni Nyasaye nitie. We wanon ane weche ma ne Paulo owachogo.

Paulo wacho ni kido mag Nyasaye osebedo kanenore “nyaka a chuech piny.” E dho Grik, wach molok kae ni “piny” ok en piny mwadakieni. Kar mano, en oganda dhano. * Omiyo, Paulo wacho ni a kinde ma ne ochweye dhano, dhano ne nyalo neno kido mag Jachwech kokalo kuom chwechne.

Gik manyiso ni Nyasaye nitie nenore kamoro amora. Ok gin gik mopondo, to gin gik ‘manenore ratiro.’ Chwech duto, chakre matinie mogik nyaka maduong’ie mogik ok nyiswa mana ni nitie Jachwech kende, to bende ginyisowa ni Jachwech nigi kido mabeyo nyowuoyo. Donge chwech makorgi tek manenore ayanga nyiso rieko mar Nyasaye? Donge polo ma oting’o sulwe koda apaka e nam nyiso teko mag Nyasaye? Donge kit chiemo mopogore opogore ma morowa, kod kaka chieng’ wuok gokinyi kendo podho godhiambo nyiso kaka Nyasaye ohero dhano?—Zaburi 104:24; Isaiah 40:26.

Be nitie joma ok ne gik ma Nyasaye osechweyo? Gigo nenore ayanga ne ji duto mamiyo inyalo wachi ni joma wacho ni ok giyie ni Nyasaye nitie, ‘wuondore.’ Jasomo moro lero wachno kama: Chalo ka dereba maok oluwo ranyisi moket e ndara mawacho ni, “Kik Iluw Ndarani.” Sama polis chunge kendo chako ndikone kes, derebano temo wacho ni ne ok oneno ranyisino. Polis ok winj wechenego nimar ranyisino nenore e lela kendo wenge derebano ok richo. Mopogore gi mano, tij dereba oriwo neno kendo luwo ranyisi ma kamago. E yo ma kamano bende, gik mochwe gin kaka ranyisi manyiso maler ni Nyasaye nitie. ‘Ranyisigo’ nenore ayanga. Nikech dhano en chwech mariek, onyalo neno ranyisigo. Ok wanyal wuondore ni ok wane gik manyiso ni Nyasaye nitie.

Gik ma ne ochwe nyisowa gik mang’eny e wi Jachwechwa. Kata kamano, nitie buk mafwenyonwa weche mang’eny moloyo e wi Nyasaye. Bugno en Muma. Muma miyowa dwoko mag penjo madongo kaka: Ang’o momiyo Nyasaye nochweyo piny kod dhano? Ng’eyo dwoko mar penjo kaka mano, nyalo konyi sudo machiegni gi Nyasaye ma kido mage “nenore ratiro” e piny mwadakieni.