Anthony: Nade, Tim? Amor neni kendo.

Tim: An be amor neni.

Anthony: Akeloni gasede manyocha owuok mag Ohinga mar Jarito kod Amkeni. Ang’eyo ni sula mayudore e gasedegi biro mori ahinya.

Tim: Erokamano. Kata kamano, amor ni ibiro lima kawuono nikech nitie gima ne adwaro penji.

Anthony: Mano ber, en penjo mane?

Tim: Nyocha kane awuoyo gi jatich wadwa moro, ne anyise kaka gasede manyocha imiya ne oting’o weche mabeyo. Kata kamano, ne onyisa ni ok onego asomgi nikech Joneno mag Jehova ok oyie kuom Yesu. Be mano en adier? Ne anyiso jatich wadwano ni abiro penji penjono kilima kendo.

Anthony: Amor ni ipenja wachno. Yo maber moloyo mar ng’eyo wach moro e wi Joneno mag Jehova, en penjogi achiel kachiel kaka itimoni. Donge kidwaro ng’eyo gimoro e wi ng’ato, ber moloyo kipenje en owuon?

Tim: Mano en adier.

Anthony: Adiera en ni Joneno mag Jehova oyie motegno kuom Yesu. Kendo wapuonjo ni yie kuom Yesu dwarore mondo eka ng’ato oyud warruok.

Tim: Ne aparo kamano. Kata kamano, kane jatich wadwa owacho ni ok uyie kuom Yesu mano ne omiyo abwok matin. Aparo ni pok wawuoyo e wi wachno.

Anthony: Donge nyalo bedo maber ka anyisi ndiko moko manyiso gimomiyo dwarore ahinya ni wabed gi yie kuom Yesu? Magi gin ndiko ma Joneno mag Jehova tiyogo ahinya e tijgi mar lendo.

Tim: Mano dibed maber.

Anthony: Ber ka wachako gi weche ma ne Yesu owuon owacho e bug Johana 14:6. Magi gin moko kuom weche ma ne Yesu owacho kane ogoyo mbaka gi achiel kuom jootene. Wasomo niya: “Yesu nowachone ni, ‘An e yo, kendo an e adiera, kendo an e ngima; ng’ato ok bi ka Wuoro ma ok okadho kuoma.’” Kaluwore gi ndikono, nyaka wakal kuom ng’a mondo eka wachop ir Wuoro?

Tim: Nyaka wakal kuom Yesu.

Anthony: En kamano. Kendo Joneno mag Jehova oyie gadier ni en kamano. We apenjie: Kaluwore gi gik misepuonjori e wi Nyasaye, ka ng’ato lemo onego olem e nying ng’ano?

Tim: E nying Yesu.

Anthony: Mano adier. Kendo mano e momiyo samoro amora ma alemo atimo kamano e nying Yesu. To mano e kaka Joneno mag Jehova duto lemo.

Tim: Amor ng’eyo wachno.

Anthony: Ndiko machielo ma wanyalo nono en Johana 3:16. Ndikoni puonjo wach moro maduong’ ahinya momiyo jomoko wacho ni en e ndiko moting’o Injili duto e yo machuok. Tiende  ni ndikoni e yo maberie moloyo mar keto e yo machuok weche duto mosendik e wi Yesu gi gik moko duto ma Yesu notimo e tije mar lendo. Ang’eyo ni diher somo ndikoni.

Tim: Anyalo some. Owacho niya: “Nikech Nyasaye nohero piny ahinya, omiyo nochiwo Wuode ma Miderma, mondo ng’ama oyie kuome kik lal, to obed gi ngima mochwere.”

Anthony: Ero kamano. Donge isewinjo ndikoni?

Tim: Ee, asewinje ding’eny, kendo aseneno ka ondike kuonde mang’eny.

Anthony: En ndiko mong’ere ahinya. Ka wanono ndikoni matut, waneno ni Yesu wacho ni hera mar Nyasaye miyo dhano nyalo yudo ngima mochwere. Kata kamano, nyaka watim ang’o?

Tim: Nyaka wabed gi yie.

Anthony: Ee. Nyaka waket yie kuom Wuod Nyasaye ma miderma, Yesu Kristo. Kendo wach mar ni yie kuom Yesu yawonwa yo mar yudo ngima mochwere oler e ite mar 2 mar gaset ma ne akelonini. Owacho ni achiel kuom gimomiyo igoyo gaset mar Ohinga mar Jarito, en ni gasedni “jiwo yie kuom Yesu Kristo, jal ma ne otho eka mondo wayud ngima mochwere kendo olocho sani ka en Ruoth e Pinyruodh Nyasaye.”

Tim: Koro aneno! Gasedu wuon nyiso maler ni Joneno mag Jehova oyie kuom Yesu.

Anthony: Mano adier.

Tim: Kare ang’o momiyo ji wacho ni ok uyie kuom Yesu?

Anthony: Nitie gik mang’eny momiyo ji wacho kamano. Seche moko giwacho kamano, mana nikech giwinjo ka jomoko wacho kamano. Kata nyalo bedo ni osepuonjgi kamano gi jopuonjgi mag din.

Tim: Aparo ni seche moko ji wacho ni ok uyie kuom Yesu nikech uluongore ni Joneno mag Jehova to ok Joneno mag Yesu.

Anthony: Mano be nyalo bedo gimomiyo giwacho kamano.

Tim: Ang’o momiyo uwuoyo ahinya e wi Jehova?

Anthony: Achiel kuom gimomiyo watimo kamano en ni kaka Joneno mag Jehova, waneno ni dwarore ni wati gi nying Nyasaye ma en Jehova, mana kaka Wuode Yesu bende ne otiyogo. Ne ane gima Yesu ne owacho ne Wuon mare e lamo. Ondik wechego e bug Johana 17:26. Be diher somo ndikono?

Tim: Anyalo some. “Asemiyo nyingi ong’erenegi kendo abiro miyo ong’ere, mondo eka hera ma ne iherago obed kuomgi, kendo abed e winjruok achiel kodgi.”

Anthony: Erokamano. Ne ni Yesu nowacho ni ne osemiyo nying Nyasaye ong’ere. Iparo ni ang’o momiyo ne omiyo nying Nyasaye ong’ere?

Tim: Mmm. Ok ang’eyo.

Anthony: Wanyalo nono ndiko machielo ma medo lero wachno. Ndiko ma daher ni wang’i en Tich Joote 2:21. Kanyo wasomo niya: “Ng’ato ka ng’ato ma luongo nying Jehova ibiro rese.” An gadier ni in bende iyie ni ka wadwaro ni mondo wayud warruok, nyaka waluong’ nying Jehova, kendo onge kiawa ni Yesu bende ne ong’eyo ni mano en gima dwarore.

Tim: En kamano.

Anthony: Omiyo, Yesu ne opuonjo jolupne nying Nyasaye nikech nong’eyo ni mondo giyud warruok ne nyaka ging’e kendo giti gi nyingno. Kendo mano en achiel kuom gik madongo ma miyo wawuoyo ahinya e wi Jehova. Waneno ni dwarore ni waland nying Nyasaye ne jomoko kendo wakonygi gin bende giluong nyingno.

Tim: To donge kata kapo ni ji ok ong’eyo nying Nyasaye kata ok ti gi nyingno achiel kachiel, pod ging’eyo ng’at ma giwuoyo kuome sama giwuoyo e wi Nyasaye?

Anthony: Mano nyalo bedo adier. Kata kamano, kuom nyisowa nyinge, Nyasaye osemiyo obedonwa mayot sudo machiegni kode.

Tim: Itemo wacho ang’o?

 Anthony: Par ane wachno e yo ma kama: Ok ne ochuno ni nyaka wang’e Musa gi nyinge. Ne wanyalo ng’eye mana kaka jal ma ne obaro Nam Makwar kata kaka jal ma ne omi Chike Apar. Bende ne ok ochuno ni wang’e nying Noa. Ne wanyalo ng’eye mana kaka jal ma ne ogero yie kendo ma ne oreso joode kaachiel gi le. E yo ma kamano bende, Yesu Kristo be ne wanyalo mana ng’eyo kaka jal ma ne oa e polo mondo otho ne richowa, donge?

Tim: En kamano.

Anthony: Kata kamano, Nyasaye ne oneno ni wang’e jogi gi nyingegi. Ng’eyo ji gi nyingegi konyowa ng’eyogi maber. Kata obedo ni ne ok waneno Musa, Noa, kata Yesu, ng’eyogi gi nyingegi miyo wang’eyogi maber.

Tim: Pok aparo wachno e yo ma kamano, to gima iwachono en adier!

Anthony: Kendo mano en gimachielo ma miyo Joneno mag Jehova tiyo ahinya gi nying Nyasaye. Dwaher konyo ji mondo ong’e Jehova Nyasaye maber, ginene kaka ng’at ma ginyalo sudo ire, kendo gibed gi yie kuome. To komachielo, wajiwo ahinya migawo ma Yesu nigo e konyowa yudo warruok. Wanyalo somo ndiko machielo ma konyowa winjo tiend wachni maber.

Tim: Ee, wanyalo.

Anthony: Ne wakwongo somo Johana 14:6, kama Yesu wachoe ni en ‘e yo, kendo en e adiera, kendo en e ngima.’ We wadog ane chien matin e sulano mondo wasom Johana 14:1. Diher somo weche ma ne Yesu owacho e kare mogik mar ndikono?

Tim: Anyalo some. Owacho niya: “Uyie kuom Nyasaye, an bende yieuru kuoma.”

Anthony: Erokamano. Kaluwore gi ndikono, iparo nade? Be onego wayie mana kuom Yesu kende ma ok wayie kuom Jehova, koso onego wayie kuom Jehova kende ma ok wayie kuom Yesu?

Tim: Ooyo. Yesu nowacho ni onego wayie kuome kendo wayie kuom Jehova bende.

Anthony: Mano adier. An gadier ni ibiro yie ni wacho awacha ni wan-gi yie kuom Nyasaye gi Yesu ok oromo. Kuom adier, onego wadag e yo manyiso ni wan-gi yie kuom Nyasaye kod Yesu.

Tim: Mano kare.

Anthony: Kata kamano, ere kaka ng’ato nyalo nyiso ni oyie gadier kuom Nyasaye gi Yesu? Wanyalo nono dwoko mar penjono kinde machielo. *

Tim: Mano dibed maber.