Dichwo miluongo ni Paul, ma ae owuo kuome e sula motelo, ma nigi nyithindo ariyo ma yawuowi nowacho kama: “Pek mag yuto e pinywa nomiyo nengo mar chiemo oidho malo ahinya, kendo nochopo kama chiemo ne onge. Ne chunowa riedo kuom seche mang’eny ka warito mondo opogwa chiemo, to kinde mang’eny chiemono ne rumo ka pok ochoponwa. Mano nomiyo dhano nodhero mochopo kama moko kuomgi ne podho apodha e nderni. Nengo mag chiemo mochuno noidho malo mokalo tong’. Bang’ kinde, nochopo kama pesa koro ne ok nyal ng’iewo gimoro amora. Akaunt mara mar bengi, isuarans, kod penson mara nolal nono.”

Paul nong’eyo maber ni mondo okony joode nyagruok gi ngima matek kamano, ne dwarore ni oti gi “rieko makare.” (Ngeche 3:21) Owacho kama: “Ne an fundi mar stima, kata kamano koro ne chuna tiyo tich moro amora ma ne anyalo yudo, kata ka ne idhi chula pesa matin kopim gi ma ne ayudoga chon. Jomoko ne jochula chiemo kata gige ot mamoko. Kapo ni ng’ato nochula sabun miti ang’wen, ne ajauso ariyo to watiyo gi ariyo modong’go. Bang’ kinde, ne abedo gi nyithi gwen 40. Kane gisedongo ne ausogi ma ang’iewo 300 moko. Bang’e, ne amiyo ng’ato gwen 50 to en nomiya mogo ma romo kilo 50. Mogono ne okonya pidho jooda kaachiel gi joot mamoko kuom kinde malach.”

Paul bende nong’eyo ni keto genowa kuom Nyasaye nyalo konyo ahinya. Nyasaye konyowa ka waluwo chikene. Yesu nowacho kama ka nowuoyo e wi gik ma wachando e ngima: “Weuru bedo gi parruok ahinya; nikech . . . Wuonu ong’eyo ni uchando gigo.”—Luka 12:29-31.

Gima lit en ni Satan osewuondo ji mang’eny mi koro giketo pachgi duto e manyo gige ringruok. Ji nigi parruok mang’eny kuom gik ma gichando, moko kuom gigo nyalo bedo gik ma gichando adier  to moko gin gik ma giparo apara, kendo gitemo matek manyo gik ma ok ochuno e ngima. Mano miyo ji mang’eny donjo e gope, e ka bang’e gifwenyo adiera ni “jagowi obedo jatich jalo machiwone.”—Ngeche 22:7.

Jomoko to timo yiero ma nyalo hinyogi bang’e. Paul wacho kama: “Ji mang’eny ma ne odak e alworawa noweyo joutegi kod osiepegi ka giparo ni lawo tije e pinje ma oko ne dhi miyo gibed gi ngima maber. Moko kuomgi nodhi ma onge barupe ma yienegi dhi e pinjego, omiyo ne ok ginyal yudo tich kuno. Kinde mang’eny, ne chunogi pondo mondo kik polise makgi kendo ne githoro nindo e bath nderni. Yiero ma ne gitimo ne onyiso ni ok giweyo mondo Nyasaye otagi. An gi jooda to ne waweyo mondo Nyasaye okonywa nyagore gi pek mag ngima ma ne wakadhoe.”

Paul dhi nyime wacho kama: “Yesu nowacho niya: ‘Kik uparru kuom kiny, nikech kiny nobed gi parruokne owuon. Odiechieng’ kodiechieng’ nigi chandruokne morome.’ Kuom mano, pile ka pile ne akwayo Nyasaye ni ‘omiwa chiembwa mar odiechiengno’ mondo kik watho kech. To adier Nyasaye ne okonyowa mana kaka Yesu nosingo. Pile ne ok wayudga chiemo ma ne wagombo chamo. Chieng’ moro ne apango lain kama ne iusoe chiemo, to ne akia gima ne iuso chieng’no. Kane achopo nyime e ka nafwenyo ni ne iuso mana chak mar yogat. Ok aheroga yogat. Kata kamano, mano e chiemo ma ne wayudo chieng’no. Agoyo ne Nyasaye erokamano ahinya nikech e kinde ma ngima ne tekie kamano, onge kata odiechieng’ achiel ma ne wanindo kech.” *

“Sani to ngima ok tek kaka e kindego. Kata kamano, gima wasepuonjore kaka joot en ni gima nyalo konyo ahinya e kedo gi parruok en keto geno kuom Nyasaye. Kinde duto Jehova * biro konyowa, tek mana ni wasiko ka watimo dwache. Waseneno adiera mar weche ma yudore e Zaburi 34:8: ‘Rang kendo ne ka Jehova ber: jalo ojahawi mogeno kuome.’ Kuom mano, ok waluor nyagore gi pek mag yuto kaka ma ne wakaloego.

“Koro wang’eyo ni gima ochuno ahinya e ngima dhano en chiemo, to ok pesa kata tich. Warito gi siso kinde maber ma Nyasaye osingo niya: ‘Bel nobedi mang’eny e piny.’ To gie sani, ‘ka wan gi chiemo kod lewni, mago oromowa.’ Wayudo jip ahinya sama wasomo weche ma Muma wacho niya: ‘Kit ngimau mondo kik obed mar hero pesa, to ubed joma gik ma un-go sani romou. Nikech osewacho kama: “Ok anaweu ngang’, kendo ok anajwang’u ngang.” Eka mondo wabed gi chir maduong’ kendo wacho niya: “Jehova e jakonyna; ok analuor gimoro.”’” *

Mondo ‘wawuoth gi Nyasaye,’ nyaka wabed gi yie mana kaka Paul gi joode timo. (Chakruok 6:9) Kapo ni waromo gi pek mag yuto e kindegi, kata e kinde ma biro, ranyisi mar Paul puonjowa bedo gi yie kendo tiyo gi rieko makare e kinde matekgo.

To nade kapo ni pek mag ngima joot kelonwa parruok?