Be isegapenjori kabe nochuewa mana mondo wadag, watug, wati tijewa, wakend, wapidh joodwa, kae to wabed moti? (Ayub 14:1, 2) Muma nyisowa ni kata mana joma riek e kinde machon ne openjore penjono.—Som Eklesiastes 2:11.

Ang’o momiyo Nyasaye ne ochueyo dhano? Mondo wadwok penjono, nyaka wapenjre mokwongo ni, Ngima nochakore nade? Ji mang’eny oseyie ni nitie Jachuech ma nigi rieko matut. Mano en nikech gisenono kaka ochue obuongo dhano kod dende e yo miwuoro. (Som Zaburi 139:14.) Kuom mano, nyaka bed ni nitie gimomiyo Nyasaye nochueyowa! Wanyalo dak e ngima maber kapo ni wang’eyo gimomiyo nochuewa.

Bang’ ka Nyasaye noseguedho jonyuolwa mokwongo, nomiyogi migawo moro makende. Nodwaro ni ginyuolre, gipong’ piny, gilos piny duto obed Paradiso, kendo gidag nyaka chieng’.—Som Chakruok 1:28, 31.

Dwaro mar Nyasaye ne ok ochopo ka ne jonyuolwa mokwongo otimo richo. Kata kamano, Nyasaye ne ok ojwang’owa, kendo ne ok ojwang’o dwarone mokwongono. Muma nyisowa ni Nyasaye osebedo ka tiyo mondo ores joma kare, kendo mondo ochop dwarone ne dhano kod piny! Kuom mano, Nyasaye dwaro ni idag e ngima maber, mana kaka nodwaro ka nochueyo piny! (Som Zaburi 37:29.) Muma nyalo nyisi kaka inyalo yudo ber e kinde ma dwach Nyasaye biro chopo.