Samuel Mokwongo 23:1-29
23 Bang’ kinde, ne onyis Daudi niya: “Jo-Filistia omonjo Jo-Keila+ kendo giyako chambgi.”*
2 Omiyo, Daudi nopenjo Jehova+ kama: “Be anyalo dhi kedo gi Jo-Filistia?” Jehova ne odwoke niya: “Dhi iked kodgi mondo ires Jo-Keila.”
3 Kata kamano, jolweny mag Daudi nopenje ni, “Ka koro waluor to pod wan Juda kae,+ donge wadhi bedo maluor moloyo ka wadhi Keila kedo gi jolwenj Jo-Filistia?”+
4 Daudi ne openjo Jehova wachno kendo,+ mi Jehova ne odwoke kama: “A malo mondo idhi Keila nimar adhi keto Jo-Filistia e lweti.”+
5 Omiyo, Daudi gi joge nodhi Keila mokedo gi Jo-Filistia. Ne oloyogi mi okawo jambgi kendo nonego Jo-Filistia mang’eny mi oreso Jo-Keila.+
6 E kinde ma Abiathar+ wuod Ahimelek ne oringo ka odhi ir Daudi e dala mar Keila, noting’o efod.
7 Wach nochopo ne Saulo niya: “Daudi obiro Keila kae.” Omiyo, Saulo ne owacho kama: “Nyasaye osekete e lweta+ nikech otwere owuon kuom donjo e dala ma nigi rangach miloro gi lodi.”
8 Omiyo, Saulo noluongo jolweny duto mondo gidhi Keila gigeng’ ne Daudi kod joge.
9 Ka ne Daudi owinjo ni Saulo chano monje, nowacho ne Abiathar jadolo kama: “Kelna efod kae.”+
10 Kae to Daudi nolemo kama: “A Jehova, Nyasach Israel, asewinjo ni Saulo dwaro ketho Keila nikech an.+
11 Be jotend Keila biro keta e lwete? Be Saulo dhi biro kaka asewinjoni? A Jehova Nyasach Israel, akwayi, dwoka.” Omiyo, Jehova nodwoko Daudi niya: “Ee, odhi biro.”
12 Daudi nopenjo niya: “Be jotend Keila biro keta e lwet Saulo?” Jehova nodwoke kama: “Ee, gibiro keti e lwete.”
13 Daudi gi joge ma dirom ji 600+ nowuok Keila mapiyo mi gidhi ka ma ne ginyalo pondoe. Ka ne Saulo owinjo ni Daudi oseringo mowuok Keila, ne ok odhi kuno.
14 Daudi nodak kuonde matek chopoe e gode manie thim mar Zif.+ Saulo nosiko ka manye,+ to Jehova ne ok oketo Daudi e lwete.
15 Ka ne Daudi ni Horesh e thim mar Zif, nofwenyo ni Saulo oseramo mar nege.
16 Jonathan wuod Saulo nodhi Horesh ir Daudi kendo ne ojiwe mondo odhi nyime geno kuom Jehova.+
17 Nowachone kama: “Kik iluor, Saulo wuora ok bi yudi. Ibiro bedo ruodh Israel+ to an abiro bedo ng’at mar ariyo bang’i. Kata Saulo wuora bende ong’eyo wachno.”+
18 Ne gitimo singruok+ e nyim Jehova kae to Jonathan nodok dalane to Daudi nodong’ Horesh.
19 Bang’e, Jo-Zif nodhi Gibea+ ir Saulo mi ginyise niya: “Daudi opondo butwa kae.+ Opondo Horesh+ e got Hakila+ ma en ka ma tek chopoe, yo milambo* mar Jeshimon.*+
20 Ruoth, bi sa asaya midwaro mondo waket Daudi e lweti.”+
21 Eka Saulo nowachonegi kama: “Jehova mondo oguedhu nikech usenyiso ni uhera.*
22 Dhiuru mondo ung’i maber ka ma entiere kendo unon ni en ng’ano ma ne onene, nimar asewinjo ni Daudi en ng’at ma otang’ ahinya.
23 Nonuru maber kuonde duto ma ojapondoe kae to ukelna wach. Abiro dhi kodu, to ka en e pinyno adier, abiro manye kata mana e kind anyuola* duto mag dhood Juda.”
24 Omiyo, ne gitelo ne Saulo mi gidhi Zif+ e kinde ma Daudi gi joge ne ni e thim mar Maon+ ma nitie Araba,+ yo milambo mar Jeshimon.
25 Kae to Saulo nobiro gi joge mondo gimany Daudi.+ Ka ne Daudi owinjo wachno, nodhi mopondo e lwanda+ man e thim mar Maon. Ka ne Saulo owinjo mano, nodhi nyaka e thim mar Maon mondo omany Daudi.
26 Sa ma Saulo ne ochopo e bath got konchiel, Daudi gi joge ne nie bath got komachielo. Daudi ne ringo+ mondo oyomb Saulo, to Saulo gi joge ne medo sudo machiegni mondo gijukgi.+
27 Gie sechego, jaote moro nochopo ne Saulo gi wach niya: “Bi piyo nikech Jo-Filistia omonjo pinywa!”
28 Saulo noweyo lawo Daudi+ mi odok kedo gi Jo-Filistia. Mano e momiyo iluongo kanyo ni Lwanda mar Weruok.
29 Daudi noa kanyo mi odhi kuonde matek chopoe man En-gedi.+
Weche Moler Piny
^ Cham man kuonde dino.
^ Hibrania, “korachwich.”
^ Kata nyalo bedo, “piny motwo; thim.”
^ Kata, ng’wono mogundho.
^ Hibrania, “alufe,” tiende ni grube mag ji 1,000.
