Samuel Mokwongo 8:1-22
8 Ka ne Samuel oseti, ne oketo yawuote mondo obed jong’ad bura e piny Israel.
2 Wuode makayo ne iluongo ni Joel, to wuode mar ariyo ne iluongo ni Abija;+ ne gin jong’ad bura Beer-sheba.
3 Kata kamano, yawuotego ne ok oluwo ranyisine. Ne gimanyo ohala e yor mibadhi,+ ne gikawo asoya,+ kendo ne ging’ado bura e yo ma ok kare.+
4 Bang’ kinde, jodong Israel duto ne ochokore mi gidhi Rama ir Samuel.
5 Ne giwachone niya: “Ne! In koro iseti, to yawuoti ok wuoth e yoreni. Omiyo, ketnwa ruoth mondo ong’adnwa bura mana kaka ogendni mamoko.”+
6 Ka ne gikwayo Samuel niya: “Ketnwa ruoth mondo ong’adnwa bura.” Wachno ne ok omore. Omiyo, Samuel ne olamo Jehova
7 mi Jehova ne odwoke niya: “Tim gik moko duto ma ginyisi; nimar in ok e ma gidagi, to an e ma gisedaga mondo kik abed ruodhgi.+
8 Mano e kaka gisebedo ka gitimore nyaka ne agolgi Misri; gisebedo ka giweya+ mondo gilam nyiseche mamoko,+ kendo mano e gima gitimoni sani.
9 Koro timnegi kaka gidwaro. Kata kamano, siemgi matek kinyisogi gik ma ruoth biro bedo gi ratiro mar timo.”
10 Omiyo, Samuel nonyiso jo ma ne kwaye mondo oketnegi ruoth weche duto ma ne Jehova owacho.
11 Nowachonegi kama: “Ruoth ma biro locho e wiu biro bedo gi ratiro mar timo gik maluwogi:+ Obiro kawo yawuotu+ mondo giidh geche lweny+ kendo obiro lokogi joidh farese,+ kendo moko kuomgi biro ringo e nyim gechene mag lweny.
12 Bende, obiro keto jotelo e wi ji aluf-aluf,+ kendo e wi ji piero abich-abich.+ Jomoko biro purone,+ moko biro keyone,+ to moko biro losone gige lweny kod gik mitiyogo e gechene mag lweny.+
13 Obiro keto nyiu mondo olos modhi mang’we ng’ar, obed jotedo, kendo obed jolos makate.+
14 Obiro kawo puotheu mabeyo moloyo, gi puotheu mag mzabibu kod mag zeituni+ mondo omi jotije.
15 Obiro kawo achiel kuom apar mag cham gi mzabibu manie puotheu, kendo obiro miyogi jong’ad bura gi jotije.
16 Obiro kawo jotiju ma chwo gi ma mon, jambu mabeyo moloyo, kod pundeu mondo otigo.+
17 Obiro kawo achiel kuom apar mag rombeu kod diek,+ kendo ubiro bedo jotije.
18 Ndalo biro ma ubiro ywak nikech ruoth museyiero uwegi,+ to Jehova ok nowinj ywaku.”
19 Kata kamano, Jo-Israel ne otamore winjo Samuel, mi gidwoke niya: “Ooyo, waseramo ni nyaka wabed gi ruoth.
20 Eka wanabed machal gi ogendni mamoko ka ruoth e ma ng’adonwa bura kendo telonwa ka wadhi kedo e lweny.”
21 Ka ne Samuel osewinjo weche duto ma oganda ne owacho, ne odhi mi onwoyogi ne Jehova.
22 Jehova ne owacho ne Samuel kama: “Timnegi gima gidwaro, ketnegi ruoth mondo oloch e wigi.”+ Kae to Samuel ne ochiko Jo-Israel niya: “Ng’ato ka ng’ato odog dalagi.”
