Barua Mokwongo ne Timotheo 5:1-25
5 Kik ikwer dichwo ma hike ng’eny gi gero.+ Kar mano, saye kaka wuoru, to chwo matindo kaka oweteni,
2 mon madongo kaka mineni, to mon matindo kaka nyimineni, e yo maler chuth.
3 Par mond liete ma gin mond liete gadier.*+
4 To ka nitie chi liel ma nigi nyithindo kata nyikwayo, jogego mondo okwong otim gik ma nyiso chiwruok chuth ne Nyasaye e utegi giwegi,+ kendo mondo gikony jonyuolgi gi kweregi kod deyegi, ka gichulogi gima owinjore kodgi,+ nimar mano en gima long’o e wang’ Nyasaye.+
5 Koro dhako ma en chi liel gadier kendo modhier, keto geno kuom Nyasaye,+ kendo osiko kosayo kendo kolemo odiechieng’ gi otieno.+
6 To dhako moketore mana kuom chopo gombo mag ringruok, osetho kata obedo ni ongima.
7 Omiyo, dhi nyime ka ichikogi gi wechegi mondo gibed jo ma onge bura.
8 Kuom adier, ka ng’ato ok chiw gik ma dwarore ne jo ma gin joge owuon, to moloyo jo ma gin joode, osekwedo yie kendo orach moloyo ng’at ma onge yie.+
9 Chi liel minyalo ket nyinge e kweno mar mond liete en ma hike ok tin ne 60, kendo ka ne en chi dichwo achiel,
10 ka en gi nying maber nikech timbe mabeyo,+ ka osepidho nyithindo maber,+ ka osebedo jarwak ji,+ ka osebedo ka olwoko tiende jo maler,+ ka osebedo ka okonyo jo ma chandore,+ ka osebedo ka ochiwore ne tije mabeyo duto.
11 Mopogore gi mano, mond liete ma pod tindo to kik iket nyinggi e kweno mar mond liete, nimar ka gombogi mag nindruok osepogogi gi Kristo, gibiro dwaro ni okendgi.
12 Kendo ibiro ng’adnegi bura nimar gisejwang’o yie ma ne gin-go mokwongo.
13 Gie kindeno bende, gibedo jo ma budho abudha nono ka giwuotho koni gi koni e udi; ee, ok gibudh abudha kende, to bende gin jokuoth kendo jo ma donjore e weche mag jomamoko,+ ka giwuoyo kuom gik ma ok onego giwuoye.
14 Kuom mano, daher ni mon matindo odonj e kend,+ ginyuol nyithindo,+ girit utegi maber, mondo kik gimi ja akwede thuolo mar wuoyo e yor achaya.
15 Kuom adier, nitie moko ma oselok mi koro giluwo Satan.
16 Ka nitie dhako manie yie to en gi wedene ma gin mond liete, to we okony mon-go mondo kanyakla kik bed gi ting’ mapek. Eka kanyakla nyalo konyo jo ma gin mond liete gadier.*+
17 Kwanuru jodongo ma tayo e yo mowinjore+ kaka jo monego omi luor nyadiriyo,+ to moloyo, jo ma tiyo matek e wuoyo gi puonjo.+
18 Nimar wach manie Ndiko wacho ni, “Kik itue dho ruath sa ma oywayo lodi ma idiemogo cham,”+ bende owacho ni, “Jatich owinjore gi chudone.”+
19 Kik iyie gi wach modonjnego jaduong’, mak mana ka nitie joneno ariyo kata adek.+
20 Kwer+ jo mong’iyo gi timo richo e nyim ji duto,+ mondo mano obed siem ne jomamoko.*
21 Achiki matek e nyim Nyasaye gi Kristo Yesu kod malaike moyier, ni iluw weche mochikgo ma ok ibuono ng’ato kata dewo wang’ ng’ato.+
22 Kik irikni keto lweteni ngang’ kuom ng’ato;*+ bende kik iriwri e richo mag jomoko; sik ka timbeni ler.
23 Kik imodh pi kende, to madhie divai matin bende mondo okony iyi kendo nikech tuoche mohero goyi.
24 Richo mag jomoko ng’ere e lela ka richogo terogi moriere e bura, to richo mag jomamoko to fwenyore bang’e.+
25 Kamano bende, timbe mabeyo ng’ere e lela,+ to timbe ma ok beyo ok nyal siko ka opondo.+
Weche Moler Piny
^ Kata, “mond liete mochando”; tiende ni, gionge gi ng’at ma dikonygi.
^ Kata, “mond liete mochando”; tiende ni, gionge gi ng’at ma dikonygi.
^ Grik, “mondo jomoko obed maluor.”
^ Tiende ni, kik irikni keto ng’ato e migawo moro.
