Mar Ariyo ne Jo-Korintho 1:1-24
1 An Paulo, jaote Kristo Yesu kokalo kuom dwaro mar Nyasaye, ka an kod Timotheo+ owadwa, wandikonu un kanyakla mar Nyasaye man Korintho, moriwo jo maler duto man e Akaya mangima:+
2 Ng’wono mogundho kod kuwe moa kuom Nyasaye Wuonwa kod Ruodhwa Yesu Kristo mondo obed kodu.
3 Opak Nyasaye kendo Wuon Ruodhwa Yesu Kristo,+ ma en Wuoro ma kecho ji+ kendo Nyasach hoch duto,+
4 ma hoyowa e masichewa duto+ mondo wabed gi nyalo mar hoyo jomamoko+ manie bwo masira moro amora, ka wahoyogi gi hoch ma wayudo koa kuom Nyasaye.+
5 Nikech mana kaka sand ma wasandorego ne Kristo ogundho kuomwa,+ e kaka hoch ma wayudo koa kuom Kristo bende ogundho.
6 Koro sa ma wan e bwo masira, en ni mondo uyud hoch kod warruok; bende sa ma ihoyowa, hochno e ma konyou nano e bwo sand ma chal gi ma wan bende wakadhoe.
7 Kendo geno marwa kuomu ok yiengni, ka wang’eyo maber ni, mana kaka un bende ukadho e sand, mano bende e kaka ubiro yudo hoch.+
8 Owetewa, dwaher ni ung’e wach masiche ma ne wayudo e alwora mar Asia.+ Ne wayudo masiche madongo mohingo tekrewa, kendo ne ok wang’eyo ka be ne wadhi tony mi wadong’ ka wangima.+
9 To kuom adier ne waneno ni oseng’adnwa buch tho. Mano ne en ni mondo waket genowa, ok kuomwa wawegi, to kuom Nyasaye+ ma chiero jo motho.
10 Ne oresowa e lak tho malich kamano, bende obiro resowa, kendo wan gi geno kuome ni obiro dhi nyime resowa.+
11 Un bende unyalo konyowa kuom sayonwa,+ mondo ji mang’eny ochiw lamo mag erokamano e lowa kuom ng’wono minyisowa nikech lamo mag ji mang’eny.+
12 Nimar gima miyo wasungore kendo ma chunywa ok ketnwae bura en ni wasetimo gik moko e pinyni, to moloyo ne un, ka wawuotho maler kendo gi chuny matir ma nyiso ni waluoro Nyasaye, ok gi rieko mar ringruok,+ to kuom ng’wono mogundho mar Nyasaye.
13 Nikech kuom adier, wandikonu mana weche ma unyalo somo* kendo winjo tiendgi. Bende, an gi geno ni ubiro medo ng’eyo tiend wechego chuth,
14 mana kaka useng’eyowa moromo, wan e jo ma miyo ubedo gi sunga, mana kaka un bende ubiro miyo wabed gi sunga e chieng’no mar Ruodhwa Yesu.
15 Omiyo, geno ma kamano e momiyo ne achano motelo mar biro iru, mondo uyud thuolo mar ariyo mar bedo gi ilo;*
16 nikech ne adwaro ni araw mondo aneu sa ma adhi Makedonia kendo aduog iru ka awuok Makedonia, eka bang’e ukowa ka adhi Judea.+
17 To ka ne achano kamano, uparo ni ne akawo wachno mayot? Koso uparo ni an ng’at ma chano gik moko e yor ringruok, mondo awach ni, “Ee, ee” eka bang’e ni, “Ooyo, ooyo”?
18 To unyalo bedo gadier kuom Nyasaye ni gik ma wawachonu ni gin “ee” ok lokre “ooyo.”
19 Nikech Yesu Kristo, Wuod Nyasaye, ma ne oyalnu wachne kokalo kuomwa, tiende ni kokalo kuoma, gi Silvano,* kod Timotheo,+ ne ok obedo “ee” kendo “ooyo,” to en osiko mana “ee.”
20 Nimar kata bed ni singo mag Nyasaye ng’eny marom nade, gisebedo “ee” kokalo kuom Yesu.+ Omiyo, bende kokalo kuome ji goyo “Amin” ne Nyasaye,+ kendo mano kelone duong’ kokalo kuomwa.
21 To Nyasaye e ma osesingo ni un kod wan, wan mag Kristo kendo Nyasaye e ma ne owalowa mondo wabed joge.+
22 Bende, oseketo kuomwa alama mare,+ ma en roho maler+ mosemiyowa ei chunywa kaka singo mar gima biro.
23 Koro akuong’ora e nying Nyasaye kaka janenona, ni gimomiyo pok abiro Korintho nyaka chop sani, en ni mondo kik amednu kuyo.
24 To ok ni wan ruodhi e wi yie maru,+ to wan jotich kanyachiel kodu mondo ubed gi mor, nikech yieu e momiyo uchung’ motegno.
Weche Moler Piny
^ Kata nyalo bedo, “weche ma ung’eyo maber.”
^ Kata nyalo bedo, “mondo uyud gueth diriyo.”
^ Iluonge bende ni Sila.
