Fweny mar Johana 12:1-17
12 Eka ranyisi moro maduong’ ne onenore e polo: Ne nitie dhako moro+ morwakore gi wang’-chieng’, to dwe ne ni e bwo tiendene, kendo wiye ne nigi osimbo ma nigi sulwe 12,
2 to ne en gi ich. Kendo ne oywak matek nikech rem maduong’ ma ne en-go nimar nodwaro nyuol.
3 Ranyisi machielo ne onenore e polo. Ne aneno thuol moro mang’ongo ma kwar ka mach,+ kendo ne en gi wiye abiriyo gi tunge apar, to e wiyego ne nitiere osimbo abiriyo;
4 to yiwe ne ywayo achiel kuom adek mag sulwe+ duto mag polo, kendo ne owitogi e piny.+ To thuol mang’ongono nomedo chung’ e nyim dhako+ ma ne chiegni nyuolno korito ngamo nyathi ma ne idhi nyuolno.
5 Kendo dhakono nonyuolo nyathi ma wuoyi+ ma biro bedo jakwadh ogendni duto kotiyo gi luth mar chuma.+ To ne oyudh nyathineno mi otere ir Nyasaye e kom-lochne.
6 To dhakono noringo modhi e thim ka ma Nyasaye noseikone, kendo ne gidhi pidhe kuno kuom odiechienge 1,260.+
7 Eka lweny ne omuoch e polo: Mikael*+ gi malaikene ne okedo gi thuol mang’ongono, to thuol mang’ongono gi malaikene bende ne okedo kodgi,
8 to ne ok gilocho ngang’,* kendo kargi koro ne onge kendo e polo.
9 Mi ne owit thuol mang’ongono+ mwalo, thuol machon,+ miluongo ni Jachien+ kendo Satan,+ ma wuondo piny mangima;+ ne owite e piny+ kanyachiel gi malaikene bende.
10 Ne awinjo dwol moro maduong’ e polo ka wacho niya:
“Koro warruok,+ gi teko, gi Pinyruodh Nyasachwa,+ gi loch mar Kristone osechopo, nikech osewit jadonj ne owetewa piny, ma donjonegi odiechieng’ gotieno e nyim Nyasachwa!+
11 Mi ne giloye+ nikech remb Nyarombo+ kendo nikech wach mar neno ma ne gichiwo;+ bende, ne ok gihero ngimagi+ kata mana ka tho ne ochomogi.
12 Nikech mano, beduru mamor un polo kod jo modak e iye! To yaye! nobed malit ne piny kod nam,+ nimar Jachien oselor mwalo iru ka en gi mirima mager, kong’eyo ni odong’ mana gi kinde manok.”+
13 Koro ka thuol mang’ongono noneno ni osewite mwalo e piny,+ nosando dhako+ ma nonyuolo nyathi ma wuoyino.
14 To ne omi dhakono buombe ariyo mag otenga maduong’+ mondo ofu godo nyaka kare e thim, ka ma ne idhi pidhee kuom ndalo achiel, gi ndalo ariyo, gi nus+ ndalo,* ka mabor gi thuondno.+
15 To thuondno nong’ogo pi ma chal gi aora koa e dhoge ka olawogo dhakono mondo omi aorano oim dhakono.
16 To piny nokonyo dhakono, kendo piny noyawo dhoge mi omuonyo aora ma thuol mang’ongono noyudo oseng’ogo koa e dhoge.
17 Omiyo, thuol mang’ongono nobedo gi mirima gi dhakono mi nowuok mondo odhi oked gi jo modong’ mag koth dhakono,+ ma makore gi chike Nyasaye kendo ma nigi tij chiwo neno e wi Yesu.+
Weche Moler Piny
^ Tiende ni, “Ng’ano ma Chal gi Nyasaye?”
^ Kata nyalo bedo, “to ne olo thuondno.”
^ Tiende ni, ndalo adek gi nus.
