Ne Jo-Rumi 1:1-32
1 An Paulo, misumba Kristo Yesu ma noluong mondo obed jaote, kendo ma nowal ne wach maber mar Nyasaye,+
2 ma nosingo chon kokalo kuom jonabine ei Ndiko maler,
3 e wi Wuode ma nowuok e koth Daudi+ kuom ringruok,
4 ma kokalo kuom teko mar roho maler, ne onyis ratiro ni en Wuod Nyasaye+ ka ne ochiere a kuom jo motho+—ee, Yesu Kristo Ruodhwa.
5 Kokalo kuome, ne wayudo ng’wono mogundho mar Nyasaye kod tich mar bedo joote,+ mondo jo ma oa e ogendni duto+ obed gi yie nikech nyinge.
6 Un bende oseluongu koa e ogendnigo mondo ubed mag Yesu Kristo.
7 Andikonu un ji duto man Rumi, ma Nyasaye ohero kendo moseluong mondo obed jo maler:
Kuwe kod ng’wono mogundho mar Nyasaye Wuonwa kod Ruodhwa Yesu Kristo mondo obed kodu.
8 Mokwongo, agoyo ne Nyasacha erokamano kokalo kuom Yesu Kristo nikech un duto, nimar yie maru ihulo e piny mangima.
9 Nikech Nyasaye ma atiyone gi chunya duto ka ayalo wach maber mar Wuode oseneno kaka asebedo ka ahulou e lamona kinde duto,+
10 ka asaye ni ka oyie, to mondo ayudie thuolo mar biro iru.
11 Nimar an gi siso mar nenou mondo amiue mich moko mag chuny mondo ubed motegno;
12 kendo mondo wajiwre+ e yiewa, ka ajiwou to un bende ujiwa.
13 Kata kamano, owetena, asetemo biro iru nyading’eny mondo nyak mar tichna obedie kuomu mana kaka osebedo kuom ogendni mamoko, to osegeng’na nyaka chop sani.
14 An jagop Jo-Grik gi jo ma welo, kendo an jagop jo mariek gi jo ma ok riek;
15 ma e momiyo agombo landonu wach maber e Rumi kanyo.+
16 Nimar wiya ok kuod gi wach maber;+ kuom adier en e teko ma Nyasaye kelogo warruok ne ng’ato ang’ata ma nigi yie,+ ne Jo-Yahudi mondi,+ eka bang’e ne Jo-Grik bende.+
17 Nikech kokalo kuom wach maberno, tim makare mar Nyasaye nenore ratiro kokalo kuom yie kendo nikech yie,+ mana kaka ondik niya: “To ng’at makare nobed mangima kokalo kuom yie.”+
18 Nimar mirimb Nyasaye+ fwenyore koa e polo kuom ji duto ma ok winje kendo ma ok kare, ma timo gik maricho mondo gigeng’ ji kik ng’e adiera.+
19 Nikech gik minyalo ng’e kuom Nyasaye nenore ayanga e kind jo ma kamago, nimar Nyasaye osemiyo ging’eyogi maler.+
20 Nimar kido ma en-go ma dhano ok nyal neno, tiende ni, tekone mochwere+ kod duong’ ma en-go kaka Nyasaye,+ osebedo ka nyisore maler chakre chuech piny ka dhi nyime, nimar ginenore e gik ma nochueyo.+ Omiyo, dhano ok nyal wuondore ni gikia.
21 Nimar kata obedo ni ne ging’eyo Nyasaye, ne ok gimiye duong’, bende ne ok gigone erokamano, to ne gibedo jo ma paro gik manono, kendo chunygi mofuwo nobedo gi mudho.+
22 Kata obedo ni ne giwacho ni giriek, ne gibedo jo mofuwo
23 kendo ne gimiyo duong’ mar Nyasaye ma ok tow obedo kaka kido mar dhano ma tow, gi mar winy, gi mar le ma nigi tielo ang’wen, kod mar le mamol.+
24 Kuom mano, nikech gombo mag chunygi, Nyasaye noweyogi gitim timbe ma ok ler, mondo gikelgo ne dendgi wich-kuot.
25 Ne ok giyie gi adiera mar Nyasaye, to ne giluwo miriambo mi gilamo chuech kendo tiyonegi, kar lamo Jachuech mowinjore oyud pak nyaka chieng’. Amin.
26 Mano e momiyo Nyasaye noweyogi mondo giowre gi gombo mag terruok,+ nimar mon manie kindgi noweyo riwore gi chwogi kaluwore gi kaka nochuegi;+
27 kamano bende, chwo noweyo riwore gi mon kaluwore gi kaka nochuegi, mi ne giowore gi gombo mag terruok e kindgi, chwo gi chwo,+ ka gitimo gik modwanyore ma miyo giyudo kum margi chuth mowinjore gi kethogi.+
28 Mana kaka ne ok giyie bedo gi ng’eyo malong’o kuom Nyasaye, Nyasaye ne oweyogi gibed gi paro mobam, mondo gitim timbe ma ok owinjore.+
29 Ne gipong’ gi timbe duto ma ok kare,+ timbe morochore, ich-lach,+ timbe maricho, ich-lit,+ nek,+ dhawo, wuond,+ himruok,+ kod kuoth,
30 kendo ne gin joketh nying ji,+ jo ma osin gi Nyasaye, jo achaya, jong’ayi, josunga, jo ma chano hinyo ji, jo ma ok winj jonyuolgi,+
31 jo ma weche ok donjnegi,+ jo ma ok rit singogi, jo ma onge hera, kendo jo ma ok kech jomamoko.
32 Kata obedo ni jogi ong’eyo maber dwaro makare mar Nyasaye—ni jo ma ong’iyo gi timo gik ma kamago owinjore gi tho+—pod gidhi nyime timo gigo, kendo giyie bende nyaka gi jo ma timogi.
