Injili mar Johana 7:1-52
7 Bang’ mano, Yesu nodhi nyime wuotho e Galili nikech ne ok odwar wuotho e Judea, nimar Jo-Yahudi ne dwaro nege.+
2 Kata kamano, Sawo mar Kiche+ mar Jo-Yahudi ne chiegni.
3 Omiyo, owetene+ nowachone kama: “Wuog kae idhi Judea eka jopuonjreni bende one gik mitimo.
4 Nimar ng’at ma dwaro ni ji ong’eye ok tim gik moko ling’ling’. Ka itimo gigi, nyisri iwuon ne piny.”
5 To adier, owetene ne ok nyis yie kuome.+
6 Omiyo, Yesu nodwokogi niya: “Sana pok ochopo,+ un to unyalo timo kamano sa asaya.
7 Onge tiende mondo piny osin kodu, an to piny osin koda, nimar achiwo neno kuome ni timbene richo.+
8 Un dhiuru e sawono; an pod ok adhi, nimar sana pok ochopo e wang’e.”+
9 Bang’ wachonegi wechego, ne odong’ Galili.
10 To ka owetene nosedhi e sawo, en bende nodhi ling’ling’ to ok ayanga.
11 Omiyo, Jo-Yahudi nochako manye e sawono ka gipenjo niya: “Ng’atcha ni kanye?”
12 Kendo ne nitiere weche moko ma ji ne kuodho kuome e kind oganda. Jomoko ne wacho niya: “En ng’at maber.” To moko ne wacho kama: “Ok en ng’at maber. Olalo oganda.”+
13 To adier, onge ng’at ma ne wuoyo kuome e lela nikech ne giluoro Jo-Yahudi.+
14 Ka sawo nosechopo e diere, Yesu nodhi e hekalu kendo nochako puonjo.
15 To Jo-Yahudi nowuoro ka gipenjore niya: “Ere kaka ng’atni ong’eyo Ndiko+ kama to pok opuonjore e skunde?”*+
16 Yesu to nodwokogi niya: “Weche ma apuonjo ok gin maga, to gin mag ng’at ma ne oora.+
17 Ka ng’ato gombo timo dwach Ng’atno, obiro ng’eyo ka be puonjgo oa kuom Nyasaye+ kata ka gik ma awacho gin moa kuoma awuon.
18 Ng’at ma wacho wechene owuon dwaro duong’ne owuon; to ng’at ma dwaro ni ng’atno ma oore oyud duong’,+ jali en ja adier kendo onge tim ma ok kare kuome.
19 Donge Musa nomiyou Chik,+ koso? To onge ng’ato kuomu ma timo kaka Chik dwaro. Ang’o momiyo udwaro nega?”+
20 Oganda nodwoko kama: “In gi jachien. En ng’a ma dwaro negi?”
21 Yesu nodwokogi kama: “Ne atimo mana gimoro achiel, to uduto uwuoro.
22 Nikech mano, Musa osemiyou tim tero nyangu+—ok ni en tim mowuok kuom Musa, to owuok kuom kwere+—kendo un utero ng’ato nyangu chieng’ sabato.
23 Ka ng’ato itero nyangu chieng’ sabato mondo eka kik keth Chik Musa, nang’o ubedo gi mirima mager koda nikech ne achango ng’ato chieng’ sabato?+
24 Weuru ng’ado bura gi kaka uneno ng’ato gi oko, to ng’aduru bura makare.”+
25 Eka moko kuom jo ma nodak Jerusalem nochako wacho kama: “Donge ng’atni e jal ma gidwaro nego, koso?+
26 To neuru! pod owuoyo e lela, to onge gima giwachone. Dibed ni jotelo pok ong’eyo ni kuom adier ng’atni e Kristo, koso?
27 Mopogore gi mano, wang’eyo kama ng’atni owuokie;+ to ka Kristo obiro, onge ng’at ma biro ng’eyo kama owuokie.”
28 Sa ma Yesu ne puonjo e hekalu, nokok niya: “Ung’eya kendo ung’eyo ka ma awuokie. Ok abiro kuom dwacha awuon,+ to Ng’atno ma ne oora en ng’at ma nitie adier, to un ok ung’eye.+
29 An ang’eye,+ nimar abiro e loye, kendo Ng’atno e ma ne oora.”
30 Omiyo, ne gichako manyo kaka ne ginyalo make,+ to onge ng’at ma noketo lwete kuome nikech sane pok nochopo.+
31 To pod thoth ji noketo yie kuome+ kendo ne giwacho niya: “Ka Kristo obiro, be obiro timo honni mang’eny moloyo ma ng’atni osetimo, koso?”
32 Jo-Farisai nowinjo ka oganda kuodho wechego e wi Yesu, omiyo jotend-jodolo kod Jo-Farisai nooro askeche mondo omake.
33 Eka Yesu nowacho niya: “Abiro bet kodu kuom kinde matin ka pok adhi ir Ng’at ma ne oora.+
34 Ubiro manya, to ok ununwang’a, kendo ka ma antie ok unyal biroe.”+
35 Omiyo, Jo-Yahudi nopenjore kama: “Ng’atni chano dhi kanye ma ok wabi nwang’ee? Dibed ni ochano dhi ir Jo-Yahudi mosekere e kind Jo-Grik mondo opuonj Jo-Grik, koso?
36 Wach ma owacho ni, ‘Ubiro manya, to ok ununwang’a, kendo kama antie ok unyal biroe,’ tiende en ang’o?”
37 E odiechieng’ mogik ma ne en chieng’ maduong’ mar sawo,+ Yesu ne ochung’ mokok niya: “Ka ng’ato nigi riyo, to obi ira mondo omodhi.+
38 Ng’at ma keto yie kuoma, notimrene mana kaka Ndiko osewacho ni, ‘Aoche mag pi mangima biro mol koa e chunye ma iye.’”+
39 Kata kamano, nowacho mano kowuoyo kuom roho maler ma jo ma noketo yie kuome ne chiegni yudo; nikech nyaka chop kanyo ne pok giyudo roho maler,+ nimar ne pok omi Yesu duong’.+
40 Jomoko ma ne ni e oganda ma nowinjo wechego nochako wacho niya: “Adier, jali e Janabi.”+
41 Moko ne wacho kama: “Mani e Kristo.”+ To moko ne penjore niya: “Be Kristo onego obed Ja-Galili?+
42 Donge Ndiko nowacho ni Kristo biro wuok e koth Daudi+ kendo wuok Bethlehem,+ ma en gweng’ ma Daudi ne nitie?”+
43 Omiyo, ywaruok nobetie e kind oganda nikech en.
44 Moko kuomgi ne dwaro make, to onge ng’at ma noketo lwete kuome.
45 Eka askeche nodok ir jotend-jodolo gi Jo-Farisai mi ne gipenjo askechego kama: “Ang’o momiyo ok ukele?”
46 Askechego nodwoko niya: “Onge ng’at ma osegawuoyo kamano ngang’.”+
47 To Jo-Farisai nopenjogi kama: “Dibed ni un bende osewuondu, koso?
48 Onge jatelo moro kata Ja-Farisai moseketo yie kuome, koso?+
49 To oganda ma ok ong’eyo chikni gin jo ma osekuong’.”
50 Ja-Farisai ma nyinge Nikodemo ma noyudo osebiro ire motelo, nowachonegi niya:
51 “Chikwa ok ng’ad ne ng’ato bura ka pok owinje mi ong’e gima osetimo, koso?”+
52 Gin ne gidwoke kama: “Dibed ni in bende in Ja-Galili? Non ane, to ibiro neno ni onge janabi ma ne dhi wuok Galili.”*
Weche Moler Piny
^ Tiende ni, skunde Jo-rabi.
^ Buge moko machon migeno ahinya onge gi kwan matindo 53 nyaka sula 8 kwan matindo 11.
