Malaki 3:1-18
3 “Neuru! Aoro jaotena mondo olosna yo.+ Kendo Ruoth madier ma umanyo nobi apoya e hekalune;+ jaote mar singruok nobi, jaote ma uhero. Neuru! Nobi ma ok obare,” Jehova Nyasach oganda lweny owacho.
2 “Kata kamano, ng’ano ma dichung’ e odiechieng’ ma obiroe, kendo ng’ano ma dibedie chieng’ ma ofwenyoree? Nimar obiro chalo gi mach mar jatheth, kendo gi sabun+ mar jalwok lewni.
3 Enobed kaka jatheth, kendo kaka japwodh fedha,+ mi enopwodh yawuot Lawi; enopwodhgi mana kaka ipwodho dhahabu gi fedha, eka ginibed ne Jehova kaka oganda ma chiwo mich makare.
4 Jehova nobed mamor gi mich mag Juda gi Jerusalem mana kaka e ndalo machon, kendo kaka e higni mosekalo.+
5 “Abiro sudo machiegni kodu mondo ang’adnu bura, kendo anabi piyo mondo abed janeno sa ma iyalo ajuoke,+ jochode, jo ma kuong’ore gi miriambo,+ jo ma mayo jotich chudogi,+ jo ma sando mond liete gi nyithi kiye,+ kaachiel gi jo ma tamore konyo welo.+ Jo ma timo timbego ok oluora,” Jehova Nyasach oganda lweny owacho.
6 “Nimar an Jehova; pok alokora.+ To un yawuot Jakobo; pok otieku.
7 Useweyo chikena, kendo usetamoru luwogi mana kaka kwereu ne otimo.+ Duoguru ira, to anaduog iru,”+ Jehova Nyasach oganda lweny owacho.
Kata kamano, upenjo niya: “Ere kaka wanyalo duogo iri?”
8 “Be dhano adhana nyalo mayo Nyasaye gimoro? Un to usemaya.”
Kendo upenjo niya: “Ere kaka wasemayi?”
“Usemaya achiel kuom apar kod chiwo magu.
9 Adier un jo ma okuong’* nikech usemaya, ee, oganda duto osetimo kamano.
10 To koro asayou, keluru achiel kuom apar e kar keno+ mondo chiemo obed e oda;+ temauru e wachni,” Jehova Nyasach oganda lweny owacho, “mondo une ka be ok abi yawonu rangeye mag polo,+ kendo olonu gueth mang’eny ma tamre gi nono.”*+
11 “Abiro kwero jaketh* mi ok noketh gik ma pinyu nyago, kendo yiend mzabibu manie puotheu biro nyago olembe,”+ Jehova Nyasach oganda lweny owacho.
12 “Ogendni duto biro luongou ni jo mamor,+ nimar unubed piny mar mor,” Jehova Nyasach oganda lweny owacho.
13 “Usewuoyo marach kuoma,” Jehova owacho.
Un to upenjo niya: “Ere kaka wasewuoyo marach kuomi?”+
14 “Uwacho ni, ‘Onge tiende tiyo ne Nyasaye.+ En ber mane ma waseyudo kuom rito chikene, kendo kuom wuotho adimba e nyim Jehova Nyasach oganda lweny?
15 E momiyo koro waneno ni jo ma sungore* e jo mamor. Bende, waneno ni jo ma timo richo e jo ma weche dhinegi maber.+ Gisetemo piem gi Nyasaye, to onge gima rach ma yudogi.’”
16 E kindeno jo ma ne oluoro Jehova ne owuoyo e kindgi, mi Jehova ne ochikonegi ite, mowinjogi. Kendo kitap rapar ne ondik e nyime,+ mana mar jogo moluoro Jehova kendo ma paro* nyinge.+
17 “Kendo ginibed joga,”+ Jehova Nyasach oganda lweny owacho, “e odiechieng’no ma abiro golo mwanduna ma ageno ahinya.+ Abiro kechogi mana kaka ng’ato kecho wuode ma tiyone.+
18 Eka unuchak une pogruok ma nitie e kind ng’at makare gi jaricho,+ kendo e kind ng’at ma tiyo ne Nyasaye kod ma ok tine.”
Weche Moler Piny
^ Kata nyalo bedo, “Adier ukuong’a.”
^ Hibrania, “ma onge gima uremo.”
^ Nyalo bedo ni iwuoyo kuom kudni ma kethoga cham.
^ Kata, “hedhore.”
^ Kata, “paro matut.” Kata nyalo bedo, “ogeno; okawo mapek.”
