Tich Joote 16:1-40
16 Koro nochopo Derbe kendo ne odhi Lustra bende.+ To kanyo ne nitie japuonjre moro ma nyinge Timotheo,+ wuod nya Jo-Yahudi moro ma ne en japuonjre, to wuon mare ne en Ja-Grik,
2 kendo owete man Lustra gi Ikonio ne wuoyo maber kuome.
3 Paulo ne dwaro ni Timotheo odhi kode, omiyo ne okawe motere nyangu nikech Jo-Yahudi ma ne ni kuondego,+ nimar giduto ne ging’eyo ni wuon Timotheo ne en Ja-Grik.
4 Ka ne giwuotho e mier, ne ginyiso jo ma ne ni kuondego weche ma joote kod jodongo ma ne ni Jerusalem nosechiko.+
5 To kanyakla man kuondego nomedo gurore e yie kendo kwan-gi ne medore pile ka pile.
6 Bende, ne giwuotho e piny Frugia kod Galatia,+ nikech roho maler nokwerogi ni kik giyal wach Nyasaye e alwora mar Asia.
7 To sa ma ne gidhi Musia, ne gitemo ahinya mondo gidonj Bithunia,+ to roho mar Yesu ne otamogi.
8 Omiyo, ne gikalo Musia mi gilor mwalo nyaka Troa.
9 To gotieno, fweny moro nobiro ne Paulo—mi noneno Ja-Makedonia moro kochung’ kanyo kendo ka saye niya: “Bi Makedonia mondo ikonywa.”
10 Mapiyo bang’ neno fwenyno, ne watemo dhi Makedonia ka waneno ni kuno e ma Nyasaye noseluongowa mondo wadhi wayalie wach maber.
11 Omiyo, ne waidho yie ka wawuok Troa mi wadhi moriere nyaka Samothraki, to kinyne ne wadhi Neapoli.
12 Bang’ wuok kanyo, ne wadhi Filipi+ manie bwo loch Rumi, kendo en e dala maduong’ e alwora mar Makedonia. Ne wabet kuno kuom ndalo moko.
13 Chieng’ Sabato, ne wawuok oko mar rangach mi wadhi e bath aora moro kama ne waparo ni ne nitie kar lamo. Ne wabet piny kendo ne wachako wuoyo gi mon ma ne ochokore kanyo.
14 Dhako moro ma nyinge Ludia ma a e dala mar Thuatira+ ma ne uso lewni ma rajamna, kendo ma ne lamo Nyasaye, ne winjowa, kendo Jehova* noyawo chunye ahinya mondo ochik ite malong’o ne gik ma Paulo ne wacho.
15 Koro ka nosebatis Ludia kod joode,+ nokwayowa kama: “Ka ukwana ni an ng’at moluoro Jehova,* to biuru e oda.” Kendo nosayowa ahinya mi ne wadhi.
16 Koro ka ne wadhi kar lemo, jatich moro ma nyako ma ne nigi jachien ma ne miyo okoro wach,+ noromo kodwa. Jo ma nyakono ne tiyonegi ne yudoga ohala mang’eny nikech tichne mar koro wach.
17 Nyakono ne siko ka luwowa gi Paulo kendo nokok kowacho kama: “Jo ma sani yalonu wach warruokni, gin wasumbni mag Nyasaye Mamalo Chutho.”+
18 Ne osiko kotimo kamano kuom ndalo mang’eny. Gikone, Paulo ne ool gi wachno mi nolokore mowacho ne jachiendno niya: “Achiki e nying Yesu Kristo ni wuog ia kuome.” Mi jachiendno nowuok gie sano.+
19 Kuom mano, ka jo ma nyakono ne tiyonegi noneno ni koro yorgi mar yudo ohala ne oselal,+ ne gimako Paulo gi Sila kendo ne giywayogi nyaka e chiro ir jotelo.+
20 Bang’ terogi nyaka ir jotelo mag dala mar Filipi, ne giwacho kama: “Jogi chando dalawani ahinya.+ Gin Jo-Yahudi,
21 kendo giyalo timbe ma ok owinjore watim kaluwore gi kitwa, nimar wan Jo-Rumi.”
22 Eka ogandano ne oa malo kanyachiel ka gin gi mirima mager, kendo bang’ ka jotelogo noseyiecho lepgi, ne gichiko mondo ochwadgi.+
23 Ka ne gisechwadogi del mang’eny, ne giwitogi e jela kendo ne gichiko jarit jela mondo oritgi kik giring.+
24 Nikech ne ochike kamano, nowitogi e jela ma iye mi notueyo tiendegi e lodi* mag yien.
25 Paulo gi Sila ne lemo ka gipako Nyasaye gi wer e dier otieno+ kendo mabuse ne winjogi.
26 Apoya nono yiengni maduong’ mar piny ne otimore, kendo mise mag jelano ne oyiengni mi dhoudi duto ne oyawore gikanyono, kendo rateke mag ng’ato ka ng’ato ne ogonyore.+
27 To ka jarit ne ochiew moneno ni dhoudi mag jela oyawore, nowuodho liganglane kendo ne ochiegni negore koparo ni mabuse oseringo.+
28 To Paulo nokok gi dwol maduong’ niya: “Kik ihinyri nimar waduto wan kae!”
29 Omiyo, nokwayo teyni mi nodonjo e jela mapiyo, kendo luoro ne omake ahinya mi nopodho piny e tiend Paulo gi Sila.
30 Nogologi oko mopenjogi niya: “Ruodhina, en ang’o ma onego atim mondo oresa?”
31 Ne gidwoke kama: “Yie kuom Ruoth Yesu to ibiro resi, in kaachiel gi joodi.”+
32 Eka ne giyalone wach Jehova* kanyachiel gi jogo duto manie ode.
33 Kendo nokawogi gotienono mi ne olwokonegi kuonde mohinyore. Kae to en kaachiel gi joode duto ne obatisgi.+
34 Norwakogi e ode moketonegi chiemo e mesa, kendo nomor ahinya kaachiel gi joode duto nikech koro ne giseyie kuom Nyasaye.
35 Ka piny noseru, jotelogo nooro askeche mondo giwach niya: “Gonyuru jogo.”
36 Jarit jelano nonyiso Paulo kama: “Jotelo oseoro jomoko kae gi wach ni mondo ogonyu karu ji ariyo. Omiyo, koro wuoguru kendo udhi gi kuwe.”
37 To Paulo nodwoko kama: “Nyoro gichwadowa e lela ka pok giyalowa, kae to ne giwitowa e jela to wan Jo-Rumi.+ Sani koro gidwaro golowa oko ling’ling’? Ooyo ngang’! Gibi mondo gin giwegi gikowwa oko.”
38 Askechego notero wechego ne jotelo. Jotelogo nobedo maluor bang’ fwenyo ni jogo ne gin Jo-Rumi.+
39 Omiyo, ne gibiro mi gisayogi, kae to bang’ kowogi oko, ne gikwayogi mondo giwuog gia e dalano.
40 Eka ne giwuok e jela mi gidhi nyaka e od Ludia; kendo bang’ neno owete, ne gijiwogi+ kae to ne giwuok mi gidhi.
