Tinde ji mathoth ok timne jowetegi gik mabeyo. Yot yudo ka jotuwo ma igi owang’ goyo koko ne lakteche; joma odhi chiemo e otel dhawo ne joma kelonegi chiemo; joma oidho ndege dhawo ne joma tiyo e ndege kanyo; nyithindo ma wigi tek jaro jopuonjegi, bwogogi, kendo gimonjogi; kendo josiasa moko donjore e timbe mag mibadhi ka moko to temo wacho ni gibeyo.

 Muma nyalo konyowa mondo wabed gi timbe mabeyo. Olero bende gimomiyo ji mang’eny tinde onge timbe gi mabeyo.

 E piny mangima, tinde thoth ji onge gi timbe mabeyo.

•   Nonro moro ma notim machiegni e piny Amerka nyiso ni timbe ji osemedo bedo maricho ahinya kuom higni 22 mokalo.

•   E nonro moro machielo, nowuo gi ji 32,000 ma nowuok e pinje 28 mopogore opogore. Pasent 65 mar jogo nowacho ni timbe maricho onya ahinya e kindewagi moloyo kinde moro amora mosekalo.

 Muma nosekoro chon ni e kindewagi, timbe maricho ne dhi medore.

•   “To ng’e wachni, ni kinde matek ahinya nobedie e ndalo mag giko. Nimar ji nobed jo moherore giwegi, jo mohero pesa, jo ma pakore, jong’ayi, jo achaya, jo ma ok winj jonyuolgi, jo ma ok go erokamano . . . jo ma onge hera [kod] jo mager.”​—2 Timotheo 3:1-3.

 Mondo ing’e weche momedore e wi kaka weche mokorgo chopo e kindewagi, inyalo somo sula ma wiye wacho ni, “Je, Biblia Ilitabiri Mitazamo na Matendo ya Watu Leo?”

 E piny ma timbe maricho onya ahinyani, ji milionde mang’eny osefwenyo ni Muma nyalo konyogi mondo gibed gi timbe mabeyo. Muma chiwo puonj ‘minyalo gen kinde duto.’ (Zaburi 111:8) Wane ane ranyisi moko:

•   Gima Muma wacho: “Gik moko duto ma udwaro ni ji otimnu, un bende utimnegiuru kamano.”​—Mathayo 7:12.

   Tiende ni: Onego wanyis ni wadewo jomamoko kendo wanyisgi luor mana kaka dwaher ni gitimnwa.

•   Gima Muma wacho: “Kuom mano, nikech usegolo wuond kuomu, ng’ato ka ng’ato owach ne wadgi adiera.”​—Jo-Efeso 4:25.

   Tiende ni: Onego wabed joratiro kinde duto e wechewa kod e timbewa.

 Mondo ing’e weche momedore kuom wachni, inyalo somo:

•   Ohinga mar Jarito ma wiye wacho ni, “Ang’o ma Nyalo Konyi Pogo Ber gi Rach?”

•   Sula ma wacho ni “Kaka Muma Nyalo Konyowa Chiwo Luor ne Paro ma Jomamoko Nigo.”