Chieng’ Wuok Tich gokinyi, Oktoba 10, 2022, jolweny mag Russia nodiro kombora e taonde mang’eny mag Ukraine ka gichulogo kuor nikech ndalo ariyo motelo, jolweny mag Ukraine nomuojo mbom moketho olalo ma tudo Crimea gi Russia. Gigo notimore mana matin bang’ ka josiasa nosechako wacho ni wachomo Har-Magedon.

•   “E kinde ma ne [president ma Amerka miluongo ni John F.] Kennedy odonjo e ywaruok mager ma nong’ere kaka Cuban Missile Crisis, ne nenore ka gima wachomo Har-Magedon. . . . Kata kamano, wang’ni nenore ni e ka wachomo Har-Magedon madier. Onge kaka wanyalo tiyo gi mbom mag nyuklia ma ok wachopo e Har-Magedon.”​—President ma Amerka, Joe Biden, Oktoba 6, 2022.

•   “Ayie ni mae en Har-Magedon, to mano nyalo kelo ne ji masira malich e piny ngima.”​—President ma Ukraine, Volodymyr Zelensky, ka nopenje pache e wi gima tiyo gi mbom mag nyuklia nyalo kelo, BBC News, Oktoba 8, 2022.

 Be lwenje mikedoe gi mbom mag nyuklia biro kelo Har-Magedon? Ang’o ma Muma wacho?

 Ooyo. “Har-Magedon” en wach ma yudore dichiel kende e Muma e Fweny 16:16. Ok en lweny manie kind pinje gi pinje, to en lweny manie kind Nyasaye gi “ruodhi mag piny mangima.” (Fweny 16:14) Nyasaye biro tiyo gi lweny mar Har-Magedon e tieko loch dhano chuth.​—Daniel 2:44.

 Mondo ing’e mathoth e wi lokruok ma Har-Magedon biro kelo e pinyni, som sula ma wacho ni Har-Magedon En Ang’o?

 Ooyo. Kata obedo ni dhano nyalo tiyo gi mbom mag nyuklia e lwenje mopogore opogore e kinde mabiro, Nyasaye ok bi yie mondo giketh piny. Muma wacho kama:

•   “Piny . . . osiko nyaka chieng’.”​—Eklesiastes 1:4.

•   “Jo makare nobed weg piny, kendo ginidagie nyaka chieng’.”​—Zaburi 37:29.

 Kata kamano, weche ma nokor e Muma kaachiel gi gik ma timore nyiso ni wachomo kama ngima mar dhano dhi bedo gi lokruok moko madongo ahinya. (Mathayo 24:3-7; 2 Timotheo 3:1-5) Mondo ing’e mathoth kuom gima Muma wacho e wi kinde mabiro, tem ane chenrowa mar puonjruok Muma.