Tarik 19 dwe mar Mei 2022, United Nations Security Council noyudo ripot mowuok kuom jotelo mokalo 75 ka giwacho ni “nok mar chiemo ma nosebetie e piny ngima nikech tuo mar korona kod nikech lokruok ma timore e kor lwasi koro medo bedo marach moloyo nikech lweny ma dhi nyime e piny Ukraine.” Mapiyo bang’ mano, gaset mar The Economist nowacho ni “lwenyno kelo kech e piny ngima, to chandruoge mamoko bende dhi mana nyime.” Muma nokoro chon ni e ndalowagi, chiemo ne dhi bedo manok e piny ngima; bende, okonyowa ng’eyo kaka wanyalo nyagore gi nok mar chiemo.

•    Yesu nokoro kama: “Oganda noked gi oganda kendo pinyruoth noked gi pinyruoth, bende chiemo nobed manok.”​—Mathayo 24:7.

•    Bug Fweny manie Muma wuoyo kuom joidh farese moko ang’wen. Achiel kuom joidh faresego ochung’ ne lweny. Nitie jaidh faras machielo ma luwe mochung’ ne kech, ma nyiso kinde ma chiemo ne dhi bedo manok kendo nidhi usgi e nengo matek. Fwenyno wacho kama: “Ne nitiere faras marateng’! Ng’ama oidhe ne oting’o ratil e luete. Ne awinjo gima chalo gi duol . . . kawacho ni, ‘Koro gorogoro mar ngano ibiro ng’iew gi nengo maromre gi chudo michulo jatich e odiechieng’ achiel kendo nengo mar thowe gorogoro adek bende [ibiro ng’iew gi nengo maromre gi chudo michulo jatich e odiechieng’ achiel].’”​—Fweny 6:5, 6, Luo New Testament, 2003.

 Weche ma Muma nokoro e wi nok mar chiemo sani timore nikech wadak e kinde ma Muma luongo ni “ndalo mag giko.” (2 Timotheo 3:1) Mondo ipuonjri weche momedore e wi “ndalo mag giko” kod joidh farese ang’wen miwuoye e bug Fweny, ne vidio ma wiye wacho ni, Kaka Piny Oselokore Chakre Higa mar 1914 kendo isom sula ma wiye wacho ni, “Joidh Farese Ang’wen Gin Jomage?”

•    Muma oting’o puonj ma nyalo konyowa nyagore gi chandruoge ma waromogo e kindegi, moriwo nyaka nengo chiemo ma medo idho kaachiel gi nok mar chiemo. Ne moko kuom puonjgo e sula ma wiye wacho ni, “Jinsi ya Kuishi Ukiwa na Pesa Kidogo.”

•    Bende, Muma miyowa geno ni ngima biro bedo maber e kinde mabiro. Osingonwa kinde ma “cham nobed mang’eny e piny,” kendo ji duto nobed gi chiemo moromogi. (Zaburi 72:16) Mondo ing’e weche momedore e wi geno ma Muma chiwono kod gimomiyo inyalo bedo gadier ni wechego biro timore, som sula ma wiye wacho ni, “Tumaini Bora la Wakati Ujao.”