Chop chieng’ Tich Abich, Februar tarik 24, higa 2023, lweny ma dhi nyime e piny Ukraine nodonjo e higa mar ariyo. Ka luwore gi ripode moko, chiegni ni jolweny 300,000 mag Ukraine kod Russia osetho, to moko osehinyore. Ji ma dirom 30,000 bende osetho e lwenyno. Kata kamano, kwan-go nyalo bedo mang’eny moloyo mochiwgo.

 Gima lit en ni gie sani, onge gima nyiso ni lwenyno biro rumo machiegni.

•    “Higa achiel kama koro osekalo nyaka ne jolweny mag Russia monj piny Ukraine, kendo onge gima nyiso ni gibiro weyo lwenyno machiegnini. Kuom joma kedogo, onge ng’ama oikore goyo bade piny kendo onge gima nyiso ni gibiro bedo gi winjruok moro amora e wi wach ma chandogi.”​—NPR (National Public Radio), Februar 19, 2023.

 E piny ngima, ji mang’eny winjo malit nikech chandruoge ma lwenyno kod ma lwenje mamoko osekelo ne joma onge ketho. Be nitie geno ma Muma chiwo? Be lwenyno biro rumo?

 Muma wuoyo e wi lweny moro ma biro reso dhano kar mondo otiekgi. Lwenyno iluongo ni Har-Magedon, kendo Muma wacho ni en “lweny mar odiechieng’ maduong’ mar Nyasaye Manyalo Duto.” (Fweny 16:14, 16) Nyasaye biro tiyo gi lwenyno e tieko loje duto mag dhano mosekelo ne ji lwenje mang’eny. Mondo ing’e kaka lweny mar Har-Magedon biro kelo kuwe mosiko, som sula ma luwogi:

•   “Har-Magedon En Ang’o?”

•   “Har–Magedon En Gima Ber!”