“Ofungu mag Pinyruoth” Ochung’ne Ang’o”?
Dwoko ma Muma Chiwo
‘Ofungu mag Pinyruoth’ ochung’ne ratiro mar yawo ne ji thuolo mar donjo e “Pinyruodh Nyasaye.” (Mathayo 16:19; The New American Bible; Tich Joote 14:22) * Yesu nomiyo Petro “ofungu mag Pinyruodh polo.” Mano nyiso ni Petro ema nomi ratiro mar elo weche manyiso kaka joma omakore gi Jehova ne dhi yudo roho maler, kendo kaka ne gidhi donjo e pinyruodh Nyasaye e polo.
Ofungugo ne itiyogo nade?
Petro notiyo gi teko ma noyudo kuom Nyasaye mondo oyaw thuolo ne grube moko adek mondo odonj e Pinyruodh Nyasaye:
Jo-Yahudi gi joma ok Jo-Yahudi ma norwako yie. Bang’ tho Yesu, Petro nojiwo Jo-Yahudi mondo obed gi yie kuom Yesu ma en jal ma Nyasaye noyiero mondo oloch e wi Pinyruodhe. Petro nonyisogi gima onego gitim mondo giyud warruok. Omiyo noyawonegi thuolo mar donjo e Pinyruoth, kendo ji alufe mang’eny “norwako wachno.”—Tich Joote 2:38-41.
Jo-Samaria. Bang’e noor Petro ir Jo-Samaria. * Notiyo gi ofungu mar Pinyruoth kendo ka en kaachiel gi Johana, ne ‘gilemo ne Jo-Samaria mondo giyud roho maler.’ (Tich Joote 8:14-17) Mano nomiyo oyawone Jo-Samaria thuolo mar donjo e Pinyruoth.
Joma ok Jo-Yahudi. Higni adek gi nus bang’ ka Yesu nosetho, Nyasaye nofwenyo ne Petro ni joma ok gin Jo-Yahudi bende ne dhi yudo thuolo mar donjo e Pinyruodh Nyasaye. Nikech mano, Petro notiyo gi achiel kuom ofungu mag Pinyruoth ka olendo ne joma ok gin Jo-Yahudi, kendo mano nomiyo giyudo roho maler kaachiel gi thuolo mar bedo jokanyo mag Pinyruoth.—Tich Joote 10:30-35, 44, 45.
Tiend “Donjo e Pinyruoth” en ang’o?
Joma “donjo e Pinyruoth” ne dhi locho gi Yesu e polo. Muma wacho ni ne gidhi “bedo e kombe ruodhi” kendo ‘locho kaka ruodhi e wi piny.’—Luka 22:29, 30; Fweny 5:9, 10.
Miriambo e wi ofungu mag Pinyruoth
Miriambo: Petro ema yiero joma dhi e polo.
Adiera: Muma wacho ni Yesu ema biro “ng’ado bura ne joma ngima gi joma otho” to ok Petro. (2 Timotheo 4:1, 8; Johana 5:22) E wi mano, Petro owuon nowacho ni Yesu “e ma Nyasaye noketo mondo obed jang’ad-bura ne joma ngima gi joma otho.”—Tich Joote 10:34, 42.
Miriambo: Petro ema ne dhi chiko kaka otiyo gi ofungu mag Pinyruoth.
Adiera: Muma moko wacho kama ka giwuoyo e wi gima Yesu nonyiso Petro e wi ofungu mag Pinyruoth: “Gino ma nitue e piny ka, notue e polo, kendo gino ma nigony e piny ka, nogony e polo.” (Mathayo 16:19, The Bible in Luo, 1968) Kata obedo ni jomoko nyalo winjo tiend ndikoni ni Petro ema ne nigi ratiro mar chiko gik matimore e polo, weche ma nodik e dho Grik nyiso maler ni Petro ne luwo mana paro ma ne oseng’ad e polo, to ok ni en ema nong’ado parogo. *
Ndiko mamoko e Muma bende wacho ni Petro ne en achiel kuom joma dhi e polo, emomiyo notiyo gi ofungu mag Pinyruoth. Kuom ranyisi, notiyo gi ofungu mar adek koluwo kaka Nyasaye nochike.—Tich Joote 10:19, 20.
^ par. 1 Kinde moko Muma tiyo gi “ofungu” kowuoyo kuom teko kata migawo moro.—Isaiah 22:20-22; Fweny 3:7, 8.
^ par. 4 Jo-Samaria ne nie din moro ma nowuok kuom Jo-Juda, kendo dinno nokopo puonj moko ma yudore e Chike Musa.
^ par. 10 Ne weche mag timo nonro mag ndiko mar Mathayo 16:19 e Muma mar New World Translation of the Holy Scriptures (Gocho mar Puonjruok).
Samoro Inyalo Hero Magi Bende
DWOKO PENJO MA JI NIGO E WI MUMA
Pinyruodh Nyasaye En Ang’o?
Ne gik moko 6 mamiyo Pinyruodh Nyasaye bedo maber moloyo sirkande mag dhano.
ESSENTIAL BIBLE TEACHINGS
Pinyruodh Nyasaye En Ang’o?
Kinde duto ma Yesu ne yalo, nojapuonjo ji wach Pinyruodh Nyasaye nyading’eny moloyo wach moro amora. Ji osebedo kalemo kuom higni mang’eny mondo pinyruodhno obi.
DWOKO PENJO MA JI NIGO E WI MUMA
Gin Jomage Madhi e Polo?
En miriambo monya ahinya ni ji duto mabeyo dhi e polo. Ang’o ma Muma puonjo?
