E Jehová nge na Mizhokjimi kʼꞹ me mⱥjⱥ ngekʼua mama pje ra kjaji yo pjamilia ngekʼua ra minji na joo xo ñe me ra to̱jiaji (1 Timoteo 1:11, TNM). E Mizhokjimi go dyⱥtrʼⱥ e Adán go unꞹ dʼa nrrinxu ro mimibi. Ma dʼa bʼɇzo nee ra mimi kʼo dʼa nrrinxu ra chjꞹntꞹbi jaga manda kʼe gobierno. Ga kjanu ra minkui na joo ra mborꞹbi o trʼibi. Yo kristiano ma ra chjꞹntꞹji ra tsjaji jaga mama kʼo gobierno nuja menzumꞹji. Xorꞹge kja Lucas 2:1, 4, 5.

¿Pje nee Mizhokjimi ke ra kjaji yo ya chjꞹntꞹ? Angeze dya nee ke ra jiambꞹbi ra mimibi texe yo paa. E Jehová mama ke yo bʼɇzo ñe yo nrrinxu ke a chjꞹntꞹji dya kjo xe ra ñʼeje (Hebreos 13:4). E Jehová dya nee ke ri jiambꞹbi ni suu o ni xira (Malaquías 2:16). Ma ni xira ñʼeje na nrrinxu o ma ni male dyompꞹge ñʼeje na bʼɇzo nge ma soo ri jiambꞹbi. Xorꞹge kja Mateo 19:3-6, 9.

E Jehová go dyⱥtrʼⱥ e Eva ngekʼua ro mbøsʼꞹ o xira xo e Adán ro mbøsʼꞹ o suu (Génesis 2:18). Dʼa bʼɇzo kʼꞹ a chjꞹntꞹ ra sʼiya o suu ra dyonꞹ pje nee ke ra tsjabi, dya ra tsjaa ngextrjo kʼo mama angeze, ra dyⱥrⱥ kʼo mama o suu ra ngotrʼpꞹ ñiʼi angeze. Ma kʼe ndinxu pje go tsjaa o xira, ra pongatrjo dya ra ngotrʼꞹ ñiʼi kʼꞹ go tsjapʼꞹ ngekʼua ra mimibi na joo. Xorꞹge kja Efesios 4:31, 32; 5:22-25, 33; 1 Pedro 3:7.

Kʼo ya chjꞹntꞹ ma dya kja mimibi na joo ñe me chu̱bi, ne Biblia mama ke dya ra tsjabi ga kjanu, ra sʼiya o xira, ra sʼiya o suu, dya ra trjamabi, ra ñabi na joo ngekʼua ra mimibi na joo (1 Corintios 13:4, 5). E Mizhokjimi dya nee ke ri jiambꞹbi, nee ke ri ñubi pje ri tsjagebi ngekʼua ri minkui na joo. Xorꞹge kja 1 Corintios 7:10-13.

E Jehová nee ke ri mimige na joo ñe me ri mⱥge ngekʼua mama ke ri dyⱥtⱥge ni tatage ñe ni nanage akjanu ri pjechi pje ri tsjage (Colosenses 3:20). Xo nee ke ri tsjage kʼo mama angeze ñe kʼo mama o Trʼii ngekʼua ri mⱥge. Xorꞹge kja Eclesiastés 11:9–12:1; Mateo 19:13-15; 21:15, 16.

E Jehová mama ri pepjige ngekʼua ri chomꞹge pje ra zii in chʼigeji, ri chomꞹge bʼitu kʼꞹ ra jyeji, xo ri jyodʼꞹge na ngumꞹ nuja ra mimiji (1 Timoteo 5:8). Ri jichige in chʼige pje mama ne Biblia jaga kjaa e Jehová ngekʼua ra kjaji jaga nee angeze (Efesios 6:4). Ri tsjagebi kʼo mama e Jehová ngekʼua in chʼigebi ra jñanrraji kʼo i̱ kjagebi xo ra tsjaji akjanu. Ma ri zopjꞹgebi in chʼigebi ri jichigebi kʼo mama ne Biblia. Xorꞹge kja Deuteronomio 6:4-7; Proverbios 22:6.

Ma in chʼii kjaa kʼo na joo, ri xipji: “Me ri mⱥkjo ke i̱ kjage kʼo na joo, xe ri tsjage ga kjanu”. Pe ma ra tsjaa kʼo na sʼoo ri zopjꞹge ri xipji ra jyɇzikʼo (Proverbios 22:15). Dya ri dyɇɇ na punkjꞹ in chʼii, ma ri zopjꞹ dya ri sadʼꞹ, ri zopjꞹ na joo. Xorꞹge kja Colosenses 3:21.

Yo testigo e Jehová opjꞹji libro nuja mama pje ra tsjaji yo tata ngekʼua ra mbøsʼꞹji in chʼiji ñe ra pjechiji pje ra tsjaji. Kʼo mama yo libro je ni ñe̱je̱ kja ne Biblia. Xorꞹge kja Salmo 19:7, 11.