¿KJO soo ra sechʼiji nrrumu̷ kʼu̷ na se̷zhi o mbepji Mizhokjimi, zo ra ngijñi dya pje ra nrro̱nji? O bʼu̷bʼu̷ na bʼe̷zo kʼu̷ o sechʼi nu ri mangojiba, ngeje e Job.

Kʼo paa kʼo mi ka̱ra̱ji kʼo israelita kja Egipto mi bʼu̷bʼu̷ a Arabia na bʼe̷zo kʼu̷ mi chju̱u̱ Job, mi ngeje nu bʼedyi e Abrahán. Na nu paa, e Jeoba o jmuru̷ ko o anxe ajensʼe, xo mi bʼu̷bʼu̷nu e Satanás. Nujnu e Jeoba o mama ke e Job me ma jonte, dya mi bʼu̷bʼu̷ na ntee jama kjaa angeze, e Jeoba mi pa̱ra̱ ke e Job dya ro tsjaa kʼo na sʼoo. Pero e Satanás o mama: E Job, ejmetsʼu̷gekʼu̷ nange i̱ unu̷ texe kʼo pe̷sʼi, ñe i̱ pjoru̷ge pero ma ri jñu̷nbu̷ texe kʼo pe̷sʼi, ri jñanrrama jarga zanku̷.

Ngekʼua e Mizhokjimi o jyezi e Satanás ro maa nrroru̷ e Job, nukʼua, e Satanás o jñu̷mbu̷ texe kʼo mi pe̷sʼi e Job, o tsjapu̷ ro zodye ñe o mbotrʼu̷ o trʼii. E Job dya mi pa̱ra̱ ke e Satanás mi nge kʼu̷ mi kjapu̷ ro supjre, angeze dya mi pa̱ra̱ pjenga Mizhokjimi dya mi pjosʼu̷ ma mi supjre, pero angeze dya go sadʼu̷ Mizhokjimi.

Mi bʼu̷bʼu̷ jñii bʼe̷zo kʼu̷ mi manji mi jobi ko e Job, pero angezeji mi mbʼechjineji dya mi neeji e Job. Ma o mba̱ra̱ji kʼo o kjogu̷ e Job o maa zenguaji mi xipjiji: Gui tsjaa kʼo na sʼoo ngekʼua o zu̷bu̷tsʼu̷ Mizhokjimi. Mi manji: E Mizhokjimi dya nezgoji, ixi pa̱ra̱ ke yo ntee dya soo ra tsjaji kʼo nee angeze. E Job dya go ngotrʼpu̷ ñiʼi kʼo mi manji kʼo jñii bʼe̷zo. Angeze o mama: Nutsʼkʼo dya ra jezgo Mizhokjimi jesta ma ra tu̱u̱go. Kja ne Biblia kja kʼe libro Job ri chotrʼu̷ nrrexe kʼo o xipjiji kʼo jñii bʼe̷zo e Job.

E Job me mi mbeñe pje ro manji yo ntee kʼu̷ dya ma joo angeze, o jyombeñe ro ñana Mizhokjimi. E Elihú kja mi trʼii mi a̷ra̷trjo nrrexe kjanu o xipji e Job: Nutsʼkʼe gui mange ke me na jontetsʼu̷, ke dya pje i̱ kjage, ke e Mizhokjimi dya nee ra mboxkʼu̷, dya ga joo kʼo i̱ mange. Ma o nguaru̷ o zopju̷ e Job, kjanu e Elihú o ue̷nchʼi kʼo bʼe̷zokʼo go xipji dya go ñaaji kʼo na kjuana.

Nudyakʼua e Jeoba go zopju̷ e Job o jichi nrrexe nu kʼo mi janrra ajensʼe ñe kja ne Xoñijomu̷. Nudyakʼua e Job o mama: Nutsʼkʼe Jeoba me na zetsʼkʼe ke nutsʼkʼojme ke ri ntegojme, dya ri chjekjojme nzakjazge. Nukʼua e Jeoba “me go juentsʼe e Job, o mbosʼu̷” o jobkʼu̷ o ngijeme kʼu̷ mi soʼo, nrro go unu̷ nzhu̷nu̷, o unu̷ nrrenchju̷ru̷, o unu̷ dyechʼa chʼii, o unu̷ na punkju̷, xi nrro go jñusbʼu̷ kʼo o unu̷ (Santiago 5:11). Ko nu kʼo go tsjaa e Job o ngotrʼbʼu̷ a nee e Satanás kʼu̷ me mbʼechjine, xo ra kjaji jagua tsjaa e Job dya ra jeziji ra kjaji kʼo nee e Jeoba zo ra kjogu̷ji nrrumu̷ kʼu̷ na se̷zhi.

(Nu kʼo gua e̱je̱ba xo ri jyodʼu̷ kja kʼe libro e Job.)