Tsjɇma tsjɇma yo ri testigojme e Jehová ri kjagojme na punkjꞹ millón Biblia ñe skuama kja na punkjꞹ idioma, pe dya ri øtꞹjme merio yo ntee. Xo ri jⱥbʼⱥjme ngumꞹ nu ja ri jmurgojme ñe ri jⱥbʼⱥjme yo sucursal nu ja ri pɇpjijme, ma pje sʼodʼꞹ kja kʼo ngumꞹkʼo, ri nugojme ja rga jokꞹjme. Xo ri pjøsʼꞹjme yo betelita ñe yo misionero. Xo ri pjøsʼꞹjme yo ntee kʼꞹ bɇzhiji o ngumꞹ ma ga ñe̱je̱ trʼandajma o ma ga mbii nu xoñijomꞹ. ¿Gi nee ri pa̱ra̱ ja mbedye nu merio pa ra kjagojmekʼo?

Dya ri øtꞹjme diezmo yo ntee, dya kjo ri øtꞹjme merio. Zo ri nestajme na punkjꞹ merio ngekʼua ra jichijme yo ntee kʼo mama ne Biblia, dya kjo ri øtꞹjme merio. Ya zoo más de 100 kjɇɇ ma go jñusʼꞹji kja kʼe skuama La Atalaya: “O ntee e Mizhokjimi dya ra dyørꞹji merio yo ntee”. Ixi ñetsʼe ke e Mizhokjimi Jehová pjøxkojme ra kjagojme ne bʼɇpji (Mateo 10:8).

Ri unꞹjme merio ko texe in mꞹbʼꞹjme. Kja texe nu Xoñijomꞹ yo ri testigojme e Jehová ri juajnꞹjme paa ngekʼua ra pjøsʼꞹjme yo ntee ra mba̱ra̱ji e Mizhokjimi. Na punkjꞹ ntee nuji na joo yo ri kjagojme ngekʼua unꞹji merio ko texe o mꞹbʼꞹji, xo ñezgojme yo ri testigojme e Jehová ri unꞹjme merio (1 Crónicas 29:9). Kja kʼo ngumꞹ nu ja ri jmurgojme ñe nu ja ri kjagojme asamblea bʼꞹbʼꞹ tsʼicajanu, yo ntee kʼo nee ra jñutrʼꞹji merionu, søø ra tsjaji. O søø ra tsjaji kja jw.org nu ja mama ja rgi unꞹ merio. Kʼo xe nda jutrʼꞹji merio kja yo tsʼicaja nge yo ntee kʼꞹ dya pɇsʼiji na punkjꞹ merio, pe me jonteji. Angezeji kjaji kʼua ja nzi go tsjaa kʼe nrrinxu kʼꞹ dya mi ñʼeje o xira ñe kʼꞹ mi pobre. Ma e Jesús o jñanrra kʼe nrrinxu o jñutrʼꞹ yeje tsʼimerio kja tsʼicaja kʼꞹ mi bʼꞹbʼꞹ kja kʼe templo, go mama me mi jonte kʼe nrrinxu ke kʼo ntee kʼo mi jutrʼꞹji na punkjꞹ merio (Lucas 21:1-4). Nu kʼo nee ra jñutrʼꞹji merio kja yo tsʼicaja søø ra tsjaji, søø ra unꞹji “jakʼo nzi ba ngijñi in mꞹbʼꞹji” (1 Corintios 16:2; 2 Corintios 9:7).

E Jehová ra sido ra ñꞹnbꞹ o mꞹbʼꞹ yo ntee ra unꞹji kʼo me na joo kʼo pɇsʼiji ngekʼua ra mbøsʼꞹ o Reino angeze, ga kjanu nrrexe yo ka̱ra̱ji kja ne Xoñijomꞹ ra mba̱ra̱ji kʼo ra tsjaa e Mizhokjimi yo paa yo ba e̱je̱ (Proverbios 3:9).

• Yo ñaja religión ørꞹji merio yo ntee, pe yo ri testigojme e Jehová, ¿ja mbedye yo merio ke ri kjagojme in bʼɇpjigojme?

• ¿Pje kjaji yo testigo e Jehová ko ne merio ke unꞹji yo ntee ko texe o mꞹbʼꞹji?