Betel ngeje na jñaa hebreo kʼꞹ nee ra mama: Ngumꞹ Mizhokjimi (Génesis 28:17, 19, nota). Ngekʼua na joo ke go jñuspʼꞹji Betel texe yo oficina kʼꞹ pɇsʼiji yo testigo e Jehová kja nu Xoñijomꞹ. Kʼo bʼɇpji kʼo kjajinu nge pa ra mbøsʼꞹ yo ntee ra mba̱ra̱ji pje mama ne Biblia. Kʼe Cuerpo Gobernante bʼꞹbʼꞹ a Betel kja Nueva York (Estados Unidos), nunu nuji kʼo bʼɇpji kʼo kjaji kja yo ngumꞹ Betel kʼꞹ bʼꞹnji kja na punkjꞹ país. Texe kʼo kjuarma kʼꞹ pɇpjiji a Betel mimiji nzakja na pjamilia, oxꞹjinu, ñonꞹjinu, pɇpjijinu xo jmurꞹji ra xørꞹji ne Biblia (Salmo 133:1).

Me na zøø yo ngumꞹ Betel, kʼo bʼꞹbʼꞹnu pɇpjiji na punkjꞹ, pe kjaji ko texe o mꞹbʼꞹji. Texe yo bʼɇzo ñe yo ndinxu kʼo ka̱ra̱ji a Betel pa̱ra̱ji na joo ne Biblia, pama pama pɇpjijinu ñe mimiji ja ga nee e Jehová, neji ke yo ntee ra mba̱ra̱ji pje ra tsjaa o Reino Mizhokjimi kja ne Xoñijomꞹ (Mateo 6:33). Zo uiñiji ñe unꞹji ja ra oxꞹji, dya to̱nji merio, pe pjøsʼꞹjikʼo ngekʼua ra ndomꞹji kʼo nestaji. Bʼꞹnkʼo pɇpjiji kja oficina, bʼꞹnkʼo pɇpjiji kja ngosina, bʼꞹnkʼo pɇpjiji kja comedor, bʼꞹnkʼo ⱥtrʼⱥji yo libro, bʼꞹnkʼo paxꞹji ja oxꞹji, bʼꞹnkʼo pedyeji yo bʼitu ñe bʼꞹnkʼo jokꞹji yo máquina ma sʼodʼꞹji.

Na punkjꞹ bʼɇpji kʼo kjaji a Betel ngekʼua yo ntee ra mba̱ra̱ji o Reino Mizhokjimi. Kʼo bʼɇpji kʼo kjaji a Betel nge pa ra mbøsʼꞹji yo ntee ra pjechiji pje mama ne Biblia, nzakja ne skuama kʼꞹ i xørge. Kʼe Cuerpo Gobernante nuu kʼꞹ ra mbedye na joo yo skuama, ma ya na jotrjo, penpeji yo kjuarma kʼo pɇpji a Betel kʼo bʼꞹbʼꞹ kja texe ne Xoñijomꞹ ngekʼua ra dyopjꞹji ja ga ñaji kja in país. Ma ga nguarꞹji ga dyopjꞹji yo skuama, kjanu pejñeji kja yo imprenta, dabadiji ga mbedye na punkjꞹ skuama, ixi kjogꞹtrjo ciento diez mil congregación nu ja pejñeji yo skuamayo. Texe yo bʼɇpji kʼo kjaji a Betel nge pa ra kjajme na bʼɇpji kʼꞹ xe nda ni mubi, nge pa ra jichijme yo ntee kʼo mama ne Biblia (Marcos 13:10).

• ¿Kjo nge yo pɇpji a Betel ñe pje unꞹjinu?

• ¿Pjekja pɇpjiji na punkjꞹ a Betel?