YO RA TSJAJI YO XOO ÑE YO XAA
10. Tsjaa kʼua ja nzi gi mange
¿PJE NEE RA MAMAYO?
Na ntee ke dya kjo ompꞹ, kjaa kʼua janzi ga mama, sido mama kʼo na kjuana. Akjanꞹ o jyoo, o jñꞹꞹ, o dyojui ñe o lajmꞹ pa̱ra̱ji ke dya mama bʼɇchjinɇ.
¿PJENGA ME NA MUBIYO?
Ma i nee ke in jyoo ñe in jñꞹꞹ ra jyɇtsʼkʼi ri tsjaa kʼo i nege, ni jyodʼꞹ ra ñetse ke gi mange kʼo na kjuana.
“Ni tata ñe ni nana ra ejmetsʼꞹ nu kʼo i mange ma i trjꞹmbeñe na joo texe yo paa, dya ngextrjo ma i bʼꞹnkʼe ko angezebi” (Sarahi).
NE BIBLIA JIZHI: “Nutsʼkʼeji, ngets’kʼeji ni jyodʼꞹ ri ñutsjɇji kjo na kjuana i̱ ñenchʼeji in mꞹnʼkʼeji e Cristo” (2 Corintios 13:5).
¿PJE SØØ RI TSJAA?
Yo mamaba ra mbøxkʼꞹ ngekʼua ni tata ñe ni nana ra mba̱ra̱bi ke søø ri tsjage kʼo na joo ma gi bʼꞹntsjɇ.
Mange kʼo na kjuana. Ma i mange bʼɇchjine yo trre ra mba̱ra̱ji ke dya gi mange kʼo na kjuana. Ma dya i mange bʼɇchjine, yo dyaja ra tekañomꞹtsʼꞹ, xo na mubi ri mange kʼo na kjuana ma ri jyopꞹ.
“Dya na sʼɇzhi ri ñaa kʼo na kjuana ma bi tsjaa texe na joo, pe ma dya bi tsjaa na joo ñe gi pa̱rge ke ra uɇnchkʼi, nge ma yo dyaja ra tekañomꞹtsʼꞹ ma ri mange kʼo na kjuana” (Caiman).
NE BIBLIA JIZHI: “Me ri nee ra kjagø na joo texe” (Hebreos 13:18).
Tsjage ma pje ra øtrkʼꞹ ni tata ñe ni nana. Ma o dyønꞹji kʼo ntee a Estados Unidos kʼo me pa̱ra̱ji, o manji ke ma ri tsjaa ma pje ra otrʼkʼꞹji, “ngeje dʼaja kʼꞹ me ni mubi ngekʼua ri chøtrʼꞹ bʼɇpji“. Ma ri tsjaa kʼo pje nrre ra øtrʼkʼꞹjidya kja in bʼɇpji, ra mbøxkʼꞹ ma ri teʼe.
“Ma dabʼadʼitrjo ri kjagø ma pje ra dyøtrʼkꞹbi, in jyoo ñe in nana ra unꞹbi nguenrra. Ma ri kjagø texe kʼo øtrʼkꞹbi, ra mbarabi ke søø ri kjago na joo texe kʼꞹ xitsibi” (Sarah).
NE BIBLIA JIZHI: “Nange ri pa̱ra̱gø na joo kʼꞹ ri dyⱥtkⱥgø. Xo ri pa̱ra̱ na joo kʼꞹ xe ri pjøsʼꞹge na punkjꞹ [...] ke nu yo ri xitsʼkʼø” (Filemón 21).
Ri pɇsʼi paciencia. Dya ga sʼɇzhi ra unꞹji nguenda ma dʼa ntee a bo teʼe, pe me na sʼɇzhi ra unꞹji nguenda ma ya trjꞹmbeñe na joo.
“Dya ngextrjo naja kʼꞹ ri tsjaa ngekʼua yo dyaja ra ñejmetsʼꞹ kʼo i mange, ni jyodʼꞹ sido ri tsjaa kʼo na joo ngekʼua ra kreotsʼꞹ” (Brandon).
NE BIBLIA JIZHI: “Dya ri nzhopkꞹji kʼꞹ kjakʼꞹji kʼꞹ na sʼoo yo nin minteji” (Colosenses 3:12).
