¿Gi kjijñige nzakja angezeji? Bʼꞹma gui ñee rgui xørge ne Biblia, pe go bʼꞹbʼꞹ kʼo go tsʼaxkʼꞹ. Nan  punkjꞹ ntee ma kjijñiji ke ra xørꞹji ne Biblia, me nrrijemeji. Pe ¿ri tsjinkje akjanu ma ri unꞹ nguenrra ke kʼo mama søø ra tsjaa ke ri mⱥjⱥ ñe ri mimi na joo? ¿I ma ri pa̱rge ke pje nrre søø ri tsjaa ngekʼua ri mⱥjⱥ rgi xørge ne Biblia? ¿Gi nee ri jñanrra pje ni mbe kʼo ra jitsʼi ne Biblia?

Jñanrra kʼo mama janzi ntee kʼꞹ o mbꞹrꞹ jo xørꞹji nu Biblia ñe o unꞹji nguenrra ja ga mbøsʼꞹji kʼo xørꞹji.

E Ezequiel ke ya tsjopkꞹ yo 20  kjɇɇ mama: “Mi chjegøbʼe nzakja yo ntee ke poji kja nrrañʼii, dya pa̱ra̱ji ja ra zⱥtrʼⱥji, kʼꞹ ro xørgø ne Biblia me go mbøxkꞹgø. Pɇsʼi jñaa ke dya ga sʼɇzhi pa texe yo paa”.

E Frieda ke xo i kjogꞹ yo 20 kjɇɇ, mama: “Por nrrexe mi mbɇkuɇgø, pe kʼo ro pjechkʼø kja ne Biblia, o mbøxkꞹ ro sɇchi kʼo mi sentio akjanu dya ro mbɇkuɇgø. Nudya xenrra ri ñekjø jobi”.

Dʼa nrrinxu ke ni chju̱u̱ Eunice ke ya i kjogꞹ yo 50  kjɇɇ mama: “Na pjøxkꞹgø ra jonte, ñe ra potꞹ kʼo mi kjaa kʼo dya nrra ma joo”.

Kʼꞹ ri xørꞹ ne Biblia søø ra tsjaa ke ri mⱥjⱥ rgi mimi, kʼꞹ ja xo ba kjogꞹ yo nan punkjꞹ ntee kʼꞹ xo go xørꞹji ne Biblia (Isaías 48:​17, 18). Søø ra mbøxkʼꞹ ri pa̱ra̱ pje ri tsjaa, ri ñeje jobi kʼꞹ na joo, ri sɇchi nu estrés, i nujyo me na mubi, ri pjechi kʼꞹ na kjuana ja ga kjaa e Yose. Yo consejo ke unꞹ ne Biblia je ni ñeje kja e Yose, akjanu dya ra jyopkøji ma ra kjagøjiyo. Angeze dya unꞹ consejos kʼꞹ dya ga joo.

Kʼo  nda ni mubi nge kʼꞹ ri pjꞹrꞹ ri xørꞹ ne Biblia. Kja yo artículo ke ba e̱je̱ mama ja rgi tsjageyo, akjanu ri mⱥjⱥ rgi xørꞹ.