¿Bʼꞹbʼꞹ Mizhokjimi kja texe yo o dyⱥtrʼⱥ?
Kʼo mama ne Biblia
E Yose janrra trenxe i søø ra tsjaa trenxe kʼo nee (Proverbios 15:3; Hebreos 4:13). Pe, nu Biblia dya mama ke nge omnipresente o ke angeze bʼꞹbʼꞹ kja trenxe o bo dyⱥtrʼⱥ. Nu biblia mama ke nge dʼa espíritu i ke dʼatrjo lugar nge nu ja bʼꞹbʼꞹ angeze.
Ja ga kjaa e Yose: E Yose nge dʼa espíritu (Juan 4:24). Ngekʼo, dya søø ra janrraji angeze (Juan 1:18). Nu Biblia mama yo visión, nu ja ñetsjɇ ke e Yose je bʼꞹbʼꞹ kja dʼatrjo lugar. Dya mama ke bʼꞹbʼꞹ kja trenxe yo bo dyⱥtrʼⱥ (Isaías 6:1, 2; Revelación [Apocalipsis] 4:2, 3, 8).
Ja je bʼꞹbʼꞹ e Yose: E Yose bʼꞹbʼꞹ kja dʼatrjo lugar espiritual ke dya chjentrjui nu universo ke ri jantrji. Pɇsʼi dʼa “lugar” espiritual “ajensʼe” (1 Reyes 8:30). Nu biblia mama ke dʼa paa yo anxa “o bobʼꞹji a xojñi e Jehová”, a nujyo nee ra mama ke e Yose bʼꞹbʼꞹ kja dʼatrjo lugar (Job 1:6).
Ma e Yose dya bʼꞹbʼꞹ kja trenxe o bo dyⱥtrʼⱥ, ¿søø ra mbøkꞹgø?
Ja̱a̱. Zø angeze je bʼꞹbʼꞹ kja dʼa lugar espiritual, me mi sʼiyazgøji. Angeze janrrazgøji na joo ma ri ⱥtⱥji i pjøxkꞹgøji (1 Reyes 8:39; 2 Crónicas 16:9). ¿Ja rga ñetsjɇ ke angeze me sʼiyazuzgøji i pjøkꞹgøji?
Ma ra ñaji ko e Yose: E Jehová søø ra ⱥtkⱥgøji ma ra ñaji ko angeze (2 Crónicas 18:31).
Ma søø na ꞹꞹ in mꞹbʼꞹji: “Jehová bʼɇxtrjo ga bʼꞹbʼꞹ ko yo me sichʼi o mꞹbʼꞹ; pjøsʼꞹ yo me to̱gꞹ o mꞹbʼꞹ” (Salmo 34:18).
Ma ni jyodʼꞹ ra zongꞹji: Ko nu Jñaa, e Jehová “ra jitsʼi ngekʼua ri meya kʼe ñʼiji kʼua ja rgi nzhodʼꞹ” (Salmo 32:8).
¿Kjo na kjuana ke e Yose bʼꞹbʼꞹ kja trenxe o bo dyⱥtrʼⱥ?
Yo mama yo ntrʼee: E Yose bʼꞹbʼꞹ kja trenxe o bo dyⱥtrʼⱥ.
Yo mama nu Biblia: E Yose dya bʼꞹbʼꞹgua kja xoñijomꞹ ni xi bʼꞹbʼꞹ kja dʼa lugar kja universo ke ri janrraji (1 Reyes 8:27). Nu Biblia mama ke kja yo seje ñetexe yo bo dyⱥtrʼⱥ,exi ñetsjɇ “nu gloria e Yose” (Salmo 19:1). Nudyo dya nee ra mama ke e Yose bʼꞹbʼꞹ kja trenxe o bo dyⱥtrʼⱥ, nge nzikja dʼa ntee ke ⱥtrʼⱥ yo pintura, kʼe ntrʼee dya je bʼꞹbʼꞹ kja yo pintura. Pe nu pintura søø ra jitsʼkøji ja ga kja angeze. Je ga kjanu kjogꞹ ko e Yose, zø “dya søø ra jandaji angeze”, ko nrrenxe kʼo o dyⱥtrʼⱥ søø ra pa̱ra̱ji ke me na zɇzhi, ke me pa̱ra̱, i me sʼiyazgøji (Romanos 1:20).
Yo mama yo ntrʼee: E Yose dya me na zɇzhi ni xi me pa̱ra̱ nange dya bʼꞹbʼꞹ kja trenxe o bo dyⱥtrʼⱥ.
Yo mama nu Biblia: Nu espíritu santo nge nu zɇzhi e Diosi, ko nu zɇzhi, e Yose o pa̱ra̱ texe o kjogꞹ i o kjaa trenxe o nee kja yo nandyo lugar ñe kja nandyo nrrajme, dya ni jyodʼꞹ ra bʼꞹbʼꞹnu (Salmo 139:7).
Yo mama yo ntrʼee: Salmo 139:8 mama ke e Yose bʼꞹbʼꞹ kja trenxe o bo dyⱥtrʼⱥ nange mama: “Ma ra kjinsʼigø ajensʼe, je ri bʼꞹnkʼenu; ma ri dagø kja Seol [o kja trʼoʼo], ¡jñancha!, je ri bʼꞹnkʼenu”.
Yo mama nu Biblia: Nu texto dya nee ra mama ke kja nu mismo nrrajme, e Yose bʼꞹbʼꞹ kja trenxe o bo dyⱥtrʼⱥ, nee ra mama ke e Yose søø ra mbøxkꞹgøji zø ja ri bʼꞹnji.
a Nu Biblia mama ke nu trju̱u̱ e Yose nge Jehová.
Puede que también le interese
YO TRʹØNꞸ KJA O JÑAA E YOSE
¿Pje nge ne espíritu santo?
Kja nu Biblia mama ke nu espíritu santo nge nzakja o “dyɇɇ” e Yose. ¿Pje kja?
KJO NGEZGØJME
¿Gi nee kjo ra ma jitsʼi?
Ne Biblia ra nrrꞹrꞹ yo trʼønꞹ kʼꞹ i pɇsʼi ñe xo ri pa̱ra̱ kjo ngeje yo testigo e Jehová.