¿B’emi b’ꞹb’ꞹ ne Diablo?

RI NEE RA A̸RGO KJA

Kʼo Biblia mama

Ja̱a̱, e Diablo bʼꞹbʼꞹ, ngeje na anxe ke o xo̱gꞹ e Jehová ñe dya kja o nee ro dyⱥtⱥ angeze. Ngekʼua, nge “nu kʼꞹ manda kja ne xoñijomꞹ” a yo na sʼonteji (Juan 14:30; Efesios 6:11, 12). Kja ne Biblia ju̱sʼꞹ nrre naño jaga xiji e Diablo. Ra nuji janziyo:

Nu jñaa Satanás nee ra mama ke “angeze dya nee ra dyⱥtⱥ e Jehová” (Job 1:6).
Ñu jñaa Diablo nee ra mama ke “angeze xospꞹ bʼɇchjine ñe jichi bʼɇchjine yo ntee” (Apocalipsis 12:9).
Kja ne Biblia nu jñaa Kʼimi nee ra mama na kʼꞹ ompꞹ yo dyaja (2 Corintios 11:3).
Nu kʼꞹ tsjapꞹ ra pjɇsʼeji(Mateo 4:3).
Nu kʼꞹ mama bʼɇchjine (Juan 8:44).

Nu Diablo dya ngeje texe yo na sʼoo ke bʼꞹbʼꞹ, xo dya ngeje yo na sʼoo ke bʼꞹbʼꞹ kja o pjeñe yo nte

Bʼꞹbʼꞹ ntee ke manji ke nu Diablo ngeje kʼo na sʼoo ke ri kjinkjøji. Pe kja ne Biblia ju̱nsʼꞹ ke e Diablo o ñaa ko e Mizhokjimi, pe e Palesito ajensʼe ngeje perfecto ngekʼua dya pje mbeñe kʼo na sʼoo ñe dya pje kjaa kʼo na sʼoo (Deuteronomio 32:4; Job 2:1-6). Xo kja ne Biblia mama ke e Diablo mi nee ke e Jesús ro tsjaa kʼo na sʼoo, pe nu Diablo dya mi ngeje kʼo na sʼoo ke mi bʼꞹbʼꞹ amboo kja o mꞹbʼꞹ e Jesús nangeje angeze mi ngeje perfecto (Mateo 4:8-10; 1 Juan 3:5.) Ngekʼua ne Biblia jitskʼøji ke nu Diablo na kjuana bʼꞹbʼꞹ, ngeje na anxe ke o xo̱gꞹ e Yose, dya ngeje kʼo na sʼoo ke bʼꞹbʼꞹ kja in mꞹnkʼøji.

Dya ri kentrjoji ma ri nuji ke bʼꞹbʼꞹ ntee kʼꞹ dya kreoji ke bʼꞹbʼꞹ e Diablo. Nangeje kja ne Biblia mama ke e Diablo jodʼꞹ ja rga dyømpꞹ yo ntee (2 Tesalonicenses 2:9,10). Nu Diablo a go tsjapꞹ ke na punkjꞹ ntee ra kreoji ke angeze dya bʼꞹbʼꞹ (2 Corintios 4:4).

Kʼo dya kjuana kʼo xiji yo ntree jaga kjaa e Diablo

Dya kjuana: Lucifer nge xe dʼa trju̱u̱ ke jñu̱spꞹji e Diablo.

Kʼo na kjuana: Bʼꞹbʼꞹ yo Biblia nuja ju̱nsʼꞹ nu jñaa hebreo “Lucifer” ke nee ra mama “onsʼꞹ sibi” (Isaías 14:12). Nu kʼe jñaa ba e̱je̱ kja na profecía nuja mama ke nu kʼo mi mandaji a Babilonia je nzi kja ke mi “onsʼꞹ sibi”, ñe e Jehová ro jñꞹnpꞹ nguenrra angezeji nangeje me mi nzhⱥsⱥji (Isaías 14:4, 13-20). Ma o zⱥdʼⱥ kʼo mi mama kʼe profecía ke ro chørꞹji yo rey a Babilonia, me mi trjembeji ñe mi manji ke je nzi kja ke me mi “onsʼꞹ sibi”.

Dya kjuana: E Diablo pɇpji pa e Diosi.

Kʼo na kjuana: E Diablo me nuu na ꞹꞹ e Diosi, ngekʼua dya søø ra pɇpji pa angeze. Xo e Satanás me nuu na ꞹꞹ yo matrʼꞹji e Jehová ngekʼua pje nrre tsjapꞹ kʼo na sʼoo ñe xøspꞹ bʼɇchjine angezeji (1 Pedro 5:8; Apocalipsis 12:10).