Ja̱a̱, e Tsʼitajensʼe nee ke ra jmurꞹji ngekʼua ra matrʼꞹji. Ne Biblia mama: “Xo ni jyodʼꞹ ra pøtꞹ rga zopjꞹji yo mi kjuarmaji, ngekʼua ra sʼiyaji yo nin minteji y ra pjøskʼøjiyo. [...] Ni jyodʼꞹ ra jmurꞹgøji” (Hebreos 10:24, 25).

 E Jesús o xipji o discípulo ke me pøtka ro pɇpjiji, nu’ma o mama: “Ma ri pøtki sʼiyaji, akjanu ra mba̱ra̱ texe yo ntee ngetskʼeji in discípulotsʼꞹji” (Juan 13:35). Kʼua ro ñetse ke o mi nee ro sꞹtʼꞹji e Cristo me potka ro sʼiyaji, nge ma ro jmurꞹji ñe me joo rgo bʼꞹnji ko o dyoji. Pa ro tsjaji akjanu, ni jyodʼꞹ ke me potka ro pɇpjiji ñe ro jmurꞹji nge ro matrʼꞹji e Palesito ajensʼe (1 Corintios 16:19). Akjanu ro ngetskʼøji na pjamilia kja texe ne xoñijomꞹ (1 Pedro 2:​17).

Dya ngextrjo ra pɇsʼiji na religión, bʼꞹbʼꞹ kʼo xe ni jyodʼꞹ

 Ne Biblia mama ke yo trʼee ni jyodʼꞹ ra jmurꞹji nge ra matrʼꞹji e Yose. Pe ne Biblia axi mama ke mꞹ da ntee pɇsʼi na religión, ngextrjo kʼo ni jyodʼꞹ ngekʼua ra chɇzhi ko e Diosi. Me ni jyodʼꞹ ke o religión ra mbøsʼꞹ ra mimi na joo pama pama. Na ngeje ne Biblia mama: “Kʼo ix na kjuana matʼꞹ Mizhokjimi kʼin Tataji, pjøsʼꞹji yo ndixꞹ yo ya ndu̱u̱ nu xira, ñe yo jyoya ma supjreji. Xo pjørꞹtsjɇji ngekʼua dya ra ndɇpiji o ñʼiji yo ntee kja ne xoñijomꞹba yo dya pa̱ra̱ Mizhokjimi” (Santiago 1:​27).