Yo ri testigojme e Jehová ri potpꞹjme nguenrra kʼo mama ne Biblia ma ri mbeñejme kʼe paa ma go nrru̱u̱ e Jesús, ke xo xiji nu “cena del Señor” (1 Corintios 11:20). Pe ma yo dyaja religión mbeñeji ma go nrru̱u̱ e Jesús dya kjaji ja nzi ga mama ne Biblia.

 Ri jmurꞹjme ngekʼua ra mbeñejme ke e Jesús o nrru̱u̱, ñe akjanu ra unꞹjme pøjøyo (Mateo 20:28; 1 Corintios 11:24). Nujyo dya ngeje na sacramento, xo dya nge kʼua nzi ga kjaji yo dyaja religión ke kreoji ke ma ra tsjajiyo e Yosi ra pombꞹ o nzhubꞹji. a Ne Biblia mama ke e Mizhokjimi ngextrjo søø ra pongꞹzꞹji in nzhubꞹji ma ri pɇsʼkøji fe e Jesús, dya nge ma yo ntee kjaji na rito kja o religión (Romanos 3:25; 1 Juan 2:1, 2).

 E Jesús o xipji o discípulo ke ro mbeñeji kʼe paa ma go nrru̱u̱, pe dya go xipji janzi vez ro tsjajiyo (Lucas 22:19). Bʼꞹbʼꞹ yo ntee yo manji ke søø ra mbeñeji nzi d’a zana, ngoma ngoma, pama pama, janzi vez nzi dʼa paa ñe bʼꞹbʼꞹ yo manji ke nzi d’a ntee søø ra juajnꞹ jingua ra mbeñeyo. Pe bʼꞹbʼꞹ kʼo ni jyodꞹ ra kjapkøji nguenda ma ra mbeñeji kʼe paa ma go nrru̱u̱ e Jesús.

 Nu paa ma yo judío mi mbeñeji nu mbaxua ke mi chju̱u̱ Pascua xo go ngeje nu paa ma e Jesús o xipji o discípulo ke ro mbeñeji ma angeze ro nrru̱u̱; ñe kʼe paa ma o kjogꞹ janzi hora o nrru̱u̱ (Mateo 26:1, 2). O kjogꞹ akjanu nangeje ne Biblia mama ke e Jesús dyotrjobi nu cordero de Pascua (1 Corintios 5:7, 8). Ne Pascua ngextrjo mi kjaji tsjɇma tsjɇma (Éxodo 12:1-6; Levítico 23:5). Yo cristiano ke o nga̱ra̱ji kja nu siglo dʼaja xo mi mbeñeji nu paa ma o nrru̱u̱ e Jesús tsjɇma tsjɇma ñe yo testigo e Jehová xo ri kjagøjme akjanu, ri kjajme kʼua nzi ga mama ne Biblia. b

 Kʼua nzi go tsjaa e Jesús pjøxkꞹji ngekʼua ra pa̱ra̱ji pje ma paa ñe pje ma hora ra mbeñeji ma o nrru̱u̱. Angeze o tsjaa nu paa 14 nu zana nisán nu kjɇɇ 33 ma o ngibʼi nu jyarꞹ, akjanu mi ju̱sʼꞹ kja nu calendario lunar bíblico (Mateo 26:18-20, 26). Yo Testigo e Jehová xo ri mbenkʼøjme ma o nrru̱u̱ e Jesús nu paa ma yo cristiano kja nu siglo dʼaja xo mi tsjaji, akjanu ri xⱥkⱥjme kʼua nzi go tsjaji angezeji. c

 Ne paa 14 nu zana nisán nu kjɇɇ 33 go zoo vernexi, pe nudya nrre nʼaño paa kʼꞹ zoo. Pa ra pa̱ra̱jme jingua ra zoo nu paa 14 nu zana nisán, yo testigo e Jehová ri kjapꞹjme kʼua nzi ma kjaji yo ntee ma o mimi e Jesús kja ne xoñijomꞹ, dya nge k’ua nzi ga kjaji yo judío yo paa ke ri b’ꞹnjidya. d

 Ma o nguarꞹji o tsjaji ne mbaxua Pascua, e Jesús o xipji yo o discípulo ke ro mbeñeji k’e paa ma ro nrru̱u̱ angeze, ñe o siji nu trjomechʼi ñe nu vino ke o mbonkjꞹ ma o mbeñeji kʼe Pascua (Mateo 26:26-28). Xo akjanu nuzgøji ma ri mbeñejme nu paa ma go nrru̱u̱ e Jesús ri pɇsʼkøjme nu trjomechʼi ke dya o chja̱mba̱ji levadura ñe nu vino tinto ke dya ngeje nu jugo de uva ke dya ixki, ni ri ngeje nu vino ke o chja̱mba̱ji azucar, licor, hierbas ñe especias.

 Na punkjꞹ religión chja̱mba̱ji levadura nu trjomechʼi. Pe kja ne Biblia mama ke nu levadura je nzikja nu pecado ñe kʼꞹ dya ga joo (Lucas 12:1; 1 Corintios 5:6-8; Gálatas 5:7-9). Ngekʼua nu trjomechʼi ke dya pje chja̱mba̱ji je nzikja o kuerpo e Jesús ke dya mi pɇsʼi pecado, ke mi ngeje perfecto (1 Pedro 2:22). Xo bʼꞹbʼꞹ yo religión ke siji jugo de uva, kja ne Biblia dya mama ke ra kjajikʼo, angezeji kjaji akjanu nageje manji ke dya ga joo ra siji vino (1 Timoteo 5:23).

 Kja nu Conmemoración nu trjomechʼi ke dya o chja̱mba̱ji levadura ñe nu vino tinto je nzikja o kuerpo ñe o kjii e Jesús. Kja na punkjꞹ religión jizhiji ke nu trjomechʼi ñe nu vino ngeji o kuerpo ñe o kjii e Jesús, pe dya kjuanakʼo. Xo bʼꞹbʼꞹ kʼo manji ke nu trjomechʼi ñe nu vino mbɇzhi o kuerpo ñe o kjii e Jesús, pe ra nuji pje jitsʼkøji ne Biblia.

•   Mꞹ e Jesús rgo xipji o discípulo ke ro siji o kjii, nu kʼꞹ rma øtꞹ nge ke dya ro kjapꞹji nguenda kʼo mama e Yosi ke dya ra siji kjii (Génesis 9:4; Hechos 15:28, 29). Pe e Jesús dya ro dyøtꞹji ke dya ro dyⱥtⱥji o ley e Diosi (Juan 8:28, 29).

•   Kʼe xomꞹ ma e Jesús o jmurꞹ ko yo o apóstol dya o siji o kjii nangeje e Jesús o mantsjɇ ke dya kja ro mezhe ro pjodʼꞹ o kjii, ngekʼua yo apóstol o tendioji ke kja ro unꞹ o vida (Mateo 26:28).

•   Ne Biblia mama ke e Jesús “natjo vez ke o ñe̱e̱ ndu̱u̱” (Hebreos 9:25, 26). Bʼꞹbʼꞹ ntee kʼo kreoji ke nzi da vez ke siji nu trjomechʼi ñe nu vino e Jesús ra yepe ra nrru̱trjø nge ra pombꞹ o nzhubꞹji, pe dya ga kjuanakʼo nangeje e Jesús o unꞹ o vida natjro vez.

•   E Jesús go mama: “Nu na kjagejidya dya ri jyombeñeji ri tsjagejinu ngekʼua ri mbenzgøji”, angeze dya go mama: “Nzi dʼa paa ke ri tsjageji nu na kjagejidya ra yepe ra pjodʼꞹ i tsjii” (1 Corintios 11:24).

 Na punkjꞹ ntee kreoji kja nu transubstanciación —nu jñaa nee ra mama ke nu trjomechʼi ñe nu vino mbɇzhi nu kuerpo ñe o kjii e Jesús— kreoji akjanu nangeje bʼꞹbʼꞹ yo Biblia ke ma o potꞹji janzi versículos go tendioji akjanu. Bʼꞹbʼꞹ yo Biblia kʼꞹ junsʼꞹ akjanu kʼo go mama e Jesús ma o unꞹ nu vino o discípulo: “Nujnu nge in tsjigønu” (Mateo 26:28). K’o go mama e Jesús o ngeje: “Nujnu nge nzakja in tsjigø”. e E Jesús ma jizhi akjanu, ko yo metáfora (Mateo 13:34, 35).

 Ma yo testigo e Jehová ri mbeñejme kʼe paa ma go nrru̱u̱ e Jesús, janzitrjo kʼꞹ siji nu trjomechʼi ñe nu vino. ¿Pjenga?

 Ma e Jesús o pjodʼꞹ o kjii, e Jehová o tsjaa na “dʼadyo pacto” ko nu israel espiritual ñe akjanu o nguarꞹ nu pacto kʼꞹ bi tsjaa e Jehová ko o jñiñi a Israel mi jingua (Hebreos 8:10-13). E Jehová o tsjaa nu d’adyo pacto ko yo ntee yo ra moji ajensʼe ngek’ua ngextrjo angezeji søø ra siji nu trjomechʼi ñe nu vino ma ra mbeñejme nu paa ma go nrru̱u̱ e Jesús. Dya søø ra tsjajiyo texe yo matr’ꞹjikjimi, ngextrjo “k’o o juajnꞹ e Jehová” ra moji ajens’e (Hebreos 9:15; Lucas 22:20). Angezeji ra mandaji ajensʼe ko e Jesús. Ne Biblia mama ke ngextrjo 144.000 ntee ra tsjajiyo (Lucas 22:28-30; Apocalipsis 5:9, 10; 14:1, 3).

 Ne Biblia mama ke janzitrjo yo ra mandaji ko e Cristo ajens’e ñe na “trʼapunkjꞹ ntee” ra minjiba kja ne xoñijomꞹ texe yo paa, napunkjꞹzgøji ri tʼebejikʼo (Lucas 12:32; Apocalipsis 7:9, 10). Yo ri tʼebeji ra minjiba kja ne xoñijomꞹ dya ri sigøji nu trjomechʼi ñe nu vino, pe ri jmurꞹji nu paa ma ri mbeñeji ma o nrru̱u̱ e Cristo nange ri nee ra unꞹji pøjø ke angeze o unꞹ o vida ngekʼua ro ngꞹxkꞹji (1 Juan 2:2).