Ũthũgaania: Julia aitega kĩoniine, acionaga airũi mono. Agaciĩra “Nĩmbuĩri gũtunatunĩa,” kinya kethĩra aciari baawe na acoore bamwĩraga nathongi.

O rua, Julia nathũgaanĩtie kũjũkia ĩtagaaria rĩĩnene kenda “no atunatunĩa.” Ũrĩa akaathithia nĩ gwaka maguta jeena ndaawa ntukũ ing’anona . . .

Ũrĩngĩĩthĩrwa ũkiigagua ta Julia, ũrĩngĩthithia atĩa?

Tĩ bũthũũku kũthũgaanĩria ũrĩa ũkwonekana. Kinya Bibiria nĩgwetaga na njĩra ĩnjega ũrĩa ekũrũ na arũme bang’anona ta Sara, Raheli, Abigaili, Jusufu, na Daudi, boonekanaga bakari. Bibiria yugaga mwarĩ wetagwa Abishaki “aari umuthongi mono akionwa.”​—1 Anene 1:4.

Ĩndĩ antũ babaingĩ babeethĩ nĩbacũmbũragwa mono nĩ ũrĩa bakari. Bũu no bũrete mathĩĩna jamanene. Thũgaania:

• Kĩrĩ ũcũnkũũni bũmwe, aarĩ 58 kĩrĩ ĩgana, baaugĩre nĩbanori nkũrũki ya kĩthimi, na kamma nĩ 17 akĩ kĩrĩ ĩgana baakari ũu.

• Kĩrĩ ũcũnkũũni bũngĩ, ekũrũ 45 kĩrĩ ĩgana, barĩa baarĩ na ũrito bwa nthĩ nkũrũki ya kĩthimi, baathũgaanagia baaritũi nkũrũki!

• Bagĩcwaa kũnyiiyia ũrito, antũ bamwe babeethĩ nĩ bethĩrĩtwe barĩ na mũrimo jwa anorexia—jũrĩa jũũmba kũũraga muntũ nĩũntũ bwa gũciata biakũrĩa.

 Kethĩra nũkwonania wĩna anorexia, kana thĩĩna ĩngĩ ya kũrĩa, cwaa ũteethio. Ambia na kwĩra mũciari kana muntũ ũngĩ mũgima ũgwĩtĩkia. Bibiria yugaga: “Mucore akaraga ari na wendani magita jonthe, mutano-ng’ina wa muntu aciari nikenda agatethia igita ria mithangiko.”​—Njuno 17:17.

Ũrĩa muntũ akari ndeene, nĩku gũtũmaga athongoma kana arega kũthongoma. Thũgaanĩria Abisalomu mũtaana wa Mũnene Daudi. Bibiria yugaga:

‘Gũtaari muntu ungi wagongagwa kuthongoma nkuruki ya Abisalomu; ataari na ruguma no rumwe.’​—2 Samweli 14:25.

Ĩndĩ mũthaka ũu aikumĩtie mono, aaciendagĩra mantũ jamanene, na aarĩ mũkunyanĩri! Kwou Bibiria, ĩtĩkũgweta Abisalomu na njĩra ĩnjega, ĩndĩ ĩrĩmwonania arĩ muntũ ũtĩ na nthoni, ũtĩgwĩtĩkĩkua, na ũrĩ na rũmena rwa ũũragani.

Bibiria ĩrĩna gĩtũmi gĩkĩega kĩa gũtwaa ũtaaro bũbũ:

‘Ciikireni mwiri jungi jumweru’—Akolosai 3:10.

‘Kwigemia kwenu nigutige kwaa kwa ome, indi tueni kugemagia muntu uria wa witho wa nkorone ndene’​—1 Petero 3:3, 4.

Kinya kethĩra tĩ bũthũũku kwenda kwĩthĩrwa ũrĩ ũmũthongi, ũntũ bwa gĩtũmi nkũrũki ya ũrĩa ũkwonekana nĩ ũmũntũ bwaku. Mũthiene, nkuma injega igakũthongomia nkũrũki ya ũrĩa kwonekana kwa oome kũũmba! Mwarĩ ũgwĩtwa Phylicia aaugĩre: “Ũthongi no bwonwe na mpwĩ, ĩndĩ ũrĩa ũkari ndeene na nkuma ciaku injega, nĩjo jakariikanwa nkũrũki.”

Kaingĩ nwigagua bũthũũku nĩ ũrĩa ũkari?

Ũrathũgaania gũtumĩra ndaawa nna kenda wonekana ũthoongi nkũrũki?

Kethĩra no ũũmbe, nĩmbi wenda kũthithia kenda ũgarũra ũrĩa ũkari? (Thiũrũnkĩria kunthe arĩa wenda.)

• ŨRAAJA

• ŨRITO

• MŨTUNDU

• ŨRĨA MWĨRĨ

• JŨKARI

• ŨTHIŨ RANGI

Ũkethĩrwa ũgũcookia ĩĩ kĩrĩ biũria biĩrĩ bia mbere na wathiũrũnkĩria mantũ jathatũ kana nkũrũki kĩrĩ kĩũria kĩa bithatũ, thũgaanĩria ũntũ bũbũ: Kũrĩonekana bangĩ batĩkwonaga na njĩra ĩtĩbuugi ja ũrĩa ũũgwe ũcionaga. Nĩ ũntũ bũbũũthũ gũkũrũkithia mĩanka na gũcumbũrwa mono nĩ ũrĩa ũkari.​—1 Samweli 16:7.