Apokalupo Ioane E Haheitalaia Herevadia 11:1-19
11 Bena siriho ta, itotohi na heto, e henigu, eto, A tore isi, Dirava ena Dubu Helaḡa bona pata helaḡana ba hahetoho, bona lalonai e toma dihomu taudia ba hagaudia.
2 A Dubu Helaḡa maḡuna na basio hahetohoa, badina be bese idau-idau taudia vada e henidia, idia na hua hari-ahui rua hanua helaḡana bae moimoilaia.
3 A egu hereva igwauraina taudia raruosi na siahu baina henidia, puse dabuadia bae dokilai, bena dina daha-ta sinahu-rua tauratoi-ahui bae haroro.
4 Ini na olive audia aurua bona lamepa aurua, tanobada Lohiana vairanai e ginimu.
5 Ta ihadikadia urana bema ura, ududia amo lahi bema lasi, inaidia bunu bema aradia ore: taunabunai ta ihadikadia urana baine ura, ia na unu baine mase toma.
6 Idia na mai siahudia guba bae koua, bena edia haroro dinadia lalodiai medu basine diho. Mai siahudia danu ranu na rara ai bae halaoa; bena bae ura negadia ai hisihisi idau-idau bae havara tanobada ai.
7 Edia haroro bae haḡuḡuru, bena mauri ḡauna mai daḡedaḡena, guri dobu-hereana amo e daemu ḡauna, ese baine tuari henidia, baine hadareredia, baine aladia mase.
8 Bena tau-anidia masedia na hanua badana ariarana ai bae mia, Hehuni herevadia heḡereḡerena ai ladana e gwauraia “Sodoma” na “Aigupto”; raruosi edia lohiabada na e hasatauroa hanuana.
9 Bena dina toi mai dina kahana taunimanima idau-idau, iduhu idau-idau, gado idau-idau, bese idau-idau, taudia ese tau-anidia masedia bae itadia, a iguridia bae lao ahu.
10 Bona tanobada taudia na edia mase dainai bae moale, bae hisi dae, bona harihari ḡaudia bae hegidu heheni; badina be unu peroveta taudia raruosi ese tanobada taudia e hahisidiava.
11 A dina toi mai dina kahana e ore, bena mauri laḡana Dirava ena amo na raruosi lalodiai e vareai, bena e gini tore. Bena gari bada ese e itadia taudia e butudia tao.
12 Bena gado ta guba amo e kamonai, e hereva badabada, e boiridia, eto “Ini aoma”. Bena raruosi na ori ta lalonai guba ai e dae, inaidia vairadiai.
13 Una hora lalonai tano-laga badana ta e vara, bena hanua kahadia gwautaosi amo kaha ta e kohu; bona tano-laga dainai taunimanima daha hitu e mase. Taunimanima oredia na e gari dikadika, Guba Diravana e heatolaia.
14 Dika iharuana vada e ore; to ba itaia, ihatoina danu ma vada ba maimu.
Kibi ihahituna
15 Aneru ihahituna ese ena kibi e hiriria. Bena gado badadia guba ai e hereva, eto “Tanobada basileiadia na eda Lohiabada bona ena Keriso edia basileia ai vada ela. Ia na baine lohia hanaihanai”.
16 Bena heitatao taudia ruahui-haniosi, Dirava vairanai terono ai e helaimu taudia, ese e goru diho, Dirava e toma henia diho, eto,
17 Lohiabada e, siahu idoidiai Diravana; o nohomu, o nohova.
Ai ese a hanamomumu;Badina be emu siahu badana vada o abia isi,Emu basileia o halohiaiamu.
18 Bese idau-idau taudia e badu,A oiemu badu vada eme kau;Mase taudia edia nega danu vada eme kau, ba hahemaoro henidia;Emu hesiai taudia, peroveta bona helaḡa taudia, edia nega danu vada eme kau,Bona oi ladamu e matauraiamu taudia kikina badana edia danu.
Iboudiai davadia namodia ba henidia;Bona tanobada ihadikana taudia ba hadikadia negana danu vada eme kau.
19 Bena Dirava ena Dubu Helaḡa guba ai na e kehoa, bona ena taravatu mauana Dubu Helaḡa lalonai na e hedinarai. Bena kevaru bona ere bona guba-rahu bona tano-laga bona medu-hetari e vara badabada.
