Efeso 3:1-21
3 Badina bunai lau Paulo na Keriso Iesu ese e ḡuigu, idau bese taumui daimui ai.
2 Reana vada o kamonai, ena harihari-bada dainai Dirava ese ḡaukara e henigu, umui daimui ai;
3 hereva hehunina, vada na torea kwadoḡi ḡauna, ia ese e hahedinarai henigu.
4 Iduahina ai do ba diba, lau na Keriso sivaraina hehunina na mai dibagu.
5 Uru gunadia ediai se hedinarai; a harihari ena aposetolo taudia helaḡadia bona peroveta taudia na Lauma ese vada e hahedinarai henidia.
6 Herevana binai: idau bese taudia bona Iuda taudia na ahudia be tamona, bona tau-anidia be tamona; gwauhamata tamona danu e abia heboumu Iesu Keriso lalonai, sivarai namo dainai.
7 Dirava ena harihari-bada dainai ena siahu ese egu ai vada e ḡaukara, sivarai namo isiaina ilaohenina taugu ai vada e halaogu.
8 Helaḡa taudia iboudiai lau mo sibogu maraḡi-maraḡi herea; to ia ese vada e harihari henigu, bese idau-idau vairadiai Keriso ena taḡa, iduahina ta asi dibana taḡana, baina harorolaia,
9 bona ḡau iboudiai ikaradia Diravana ese sene negadia ema harihari vada e hunia herevana anina baina hahedinaraia taunimanima iboudiai ediai.
10 Harihari, ekalesia ena amo, lohia hereadia bona siahu taudia, guba ai e nohomu, ese Dirava ena aonega idau-idau bae diba,
11 nega hanaihanai e lalo-hadailaia heḡereḡerena ai, Keriso Iesu eda Lohiabada lalonai e hamomokania.
12 Ia lalonai ita na mai boga-aukada bona mai goadada baita raka henia kahi, ta abidadama heniamu dainai.
13 Taunabunai na noimuimu, daramui basie doko umui bagumui ai na hisihisimu; lauegu hisihisi na umui ihahairaimui ḡauna.
Egu ḡuriḡuri daimui ai
14 Una dainai lau na Tamada vairanai na hetuituimu.
15 Bese iboudiai guba ai bona tanobada ai be ia nemaina.
16 Na noiamu, ia hairaina taḡadia amo ia Laumana ese siahu baine henimui, bena lalomui idoidiai do bae goada,
17 bona emui abidadama dainai Keriso na umui lalomui ai baine noho. Bena lalokau ai ba gini tutuka-tutuka bona ba badinaia tarika-tarika dainai, ba goada momokani;
18 bena helaḡa taudia iboudiai ida Keriso ena lalokau lababana bona rohana bona harana-latana bona dobuna
19 vada ba diba, bona basita diba ḡuḡuru lalokauna, Keriso ena, danu. Unu amo Dirava ena honuhonu-dae ese baine hahonumui.
20 Ita laloda ai mai siahuna ida e ḡaukaramu Diravana do baine ḡaukara, ela bona eda noinoi bona eda lalo-hadai idoidiai baine hereadia;
21 ia hairaina be ekalesia lalonai bona Keriso Iesu lalonai baine mia, ela bona uru iboudiai ela hanaihanai. Amen.
