Efeso 6:1-24
6 Memero kekeni e, tamamui sinamui ba kamonai henidia, Lohiabada lalonai, badina be ena na maoro.
2 “Tamamu sinamu ba matauraidia,” (ina na haheḡani mai gwauhamatana gini-gunana),
3 “bena ba namo, ba mauri daudau tanobada ai.”
4 Tama e, natumui basio habadudia, a Lohiabada ena hahediba herevadia bona ena sisiba herevadia ba ubulaidia.
5 Hesiai memeromui e, biagumui tanobada ai ba kamonai henidia mai heude-heudemui ida bona mai lalomui tamona ida, Keriso boma kamonai henia heḡereḡerena.
6 Isiaidia ba lao heni, dia vairadiai mo, taunimanima ihamoaledia e uramu taudia na heheto, a Keriso ena hesiai taudia ese Dirava ena ura e karamu mai lalodia ida na heto.
7 Emui hesiai ilao-henina ba karaia mai lalo-manaumui ida, Lohiabada enai boma karaia na heto.
8 Umui dibamui ita ta ta baita kara namo negadia ai na davada baita abi, Lohiabada ena amo; iḡui tauna eiava ura-kwalimu tauna, dava tamona.
9 Biagu e, kara heḡereḡeredia ba kara henidia; ihagarilaidia herevadia na ba hadoko. Umui dibamui umui bona idia Biagumui be tamona guba ai; ia ese taunimanima toadia se lalomu.
10 Hereva dokona binai: Lohiabada siahuna ai ba siahu, bona goadana ai ba goada.
11 Dirava ena tuari dabuadia iboudiai ba hahedokilai; bena ba goada, diabolo ena kara dibaka ba laoa ahu.
12 Badina be ita eda tuari na dia taunimanima ida, a ḡaubada hereadia bona siahu taudia bona tanobada diburana lohiadia bona lauma dikadia guba gabudia ai ida ta tuarimu.
13 Una dainai Dirava ena tuari dabuadia iboudiai ba hahedokilai, bena dika dinana ai ba laodia ahu diba; ḡau iboudiai ba kara ḡuḡuru, bena ba gini.
14 Benaini, ba gini: koekoemui ai hereva momokani ba ḡeḡea; kememui ai kara maoromaoro ba hadabualai;
15 aemui palapaladia sivarai namo mainona iseuna ba kumilai.
16 Nega idoinai abidadama kesina bavabia kau, unu amo Tau Dikana ena diba lahidia ba habodo diba.
17 Hahemauri bavabia, emui kwara ḡauna; bona Lauma ena dare, Dirava ena hereva bunai.
18 Ḡuriḡuri bona noinoi iboudiai Lauma lalonai ba gwaurai, nega idoinai. Ba gima malaka-malaka; helaḡa taudia daidiai ba noinoi,
19 lau daigu ai danu ba noinoi, baina haroro negadia ai sivarai namo ena hereva hehunidia baina hahedinarai ḡoevaḡoeva.
20 Badina bunai lau na hesiai taugu mai iḡuigu ida na nohomu. Lau daigu ai ba noinoi, baina hereva goadagoada, vada e haduagu heḡereḡerena.
21 Egu noho bona egu gaukara sivaraidia ba diba totona, varavarada Tukiko, egu lalokau, Lohiabada ena hesiai tauna namona, ese idoinai baine hamaorolaimui.
22 Una totona vada na siaia vasi, ai sivaraimai baine hamaorolaimui, bona lalomui baine hagoadadia.
23 Maino bona lalokau bona heabidadama, Tamada Dirava ena amo bona Lohiabada lesu Keriso ena amo, varavara ese bae abi.
24 Harihari-bada be eda Lohiabada lesu Keriso e lalokau henia hanaihanaimu taudia iboudiai ediai baine mia.
