Kohelete 12:1-14
12 Eregabemu dinadia ai ikaramu Diravana na ba laloa tao, hahedika dinadia do asie kau ai, bona ba herevalaidia baoto “Asina moalelaidiamu” laḡanidia do asie kahira-kahira ai;
2 dina bona diari bona hua bona hisiu do asie dibura bona medu murinai dagadaga do asie hahebou lou negana ai.
3 Una dina ai ruma igimana taudia na bae heude-heude, bona goada taudia dorudia bae laoho; uit iriridia bae hadoko badina be, idia na gagadoi mo, bona gaba-mauru amo e igo lasimu hahinedia na matadia bae valahu-valahu,
4 bona ariara ai ruma iduaradia bae hekou. Una dina ai uit iririna reḡena baine maraḡi, bona ta baine noga haraḡa manu ena tai ai, bona ane-abi hahinedia eredia bae manoka.
5 Una dina ai atai gabudia garidia bae gari, bona dala ai danu hahegari ḡaudia bae mia. Una dina ai sakada* auna baine burea, bona kwadi baine bainabaina lao, bona heḡahusi baine ore. Badina be taunimanima na baine noho henia hanaihanai gabuna e laomu, bona taitai taudia na ariara ai e tai loaloamu.
6 Ia ba laloa tao, silver varona do se motu, eiava gold dihuna do se makohi, eiava hodu na ranu gabuna ai do se hesea rohoroho, eiava ava keikeina na ranu gurina isena ai do se kwaidu ai;
7 ḡahu ese tano do se lou henia, oromana gunana heḡereḡerena do se abia, bona lauma na e henia Diravana dekena do se lou lao negana ai.
8 Haroro Tauna na e tomu: Asi anidia ḡaudia, ḡau iboudiai be asi anidia.
9 Haroro Tauna na mai aonegana, bona ia ese taunimanima e ha-aonegadiava. Hereva lada-isidia e tahudia, bona e haerodia, bona e haboudia ḡoevaḡoeva.
10 Haroro Tauna na hereva mai mamidia e tahudia, bona hereva momokanidia e tore maoromaoro.
11 Aonega taudia edia hereva na ikodo na heheto; bona e haboudia herevadia na e kokodia kau ikokodia na heheto; idia na Hereḡu Tauna tamona ese e heni.
12 Natugu e, ini e hereadiamu ḡaudia nahuadia ba toho. Buka momo itoredia na asi dokona, bona ihaerodia ese hesiku e havaraiamu.
13 Ḡaukara dokona binai; hereva iboudiai vada o kamonai. Dirava garina ba gari, bona ena haheḡani ba badinadia; badina be una na taunimanima ena kara korikori idoinai.
14 Badina be Dirava ese kara iboudiai bona ḡau hehunidia iboudiai, namodia bona dikadia, na baine hahemaoro henidia.
Footnotes
^ “Sakada” na au ta ladana Heberu gado ai; una au burena na kuroka-kuroka herea.
