Evanelia Luka 3:1-38
3 Tiberio Kaisara ena lohia laḡanina ihagwauta-imana ai, Pontio Pilato be Iudea edia gavana, bona Herod be Galilea lohiana, bona tadina Filipo be Iturea bona Trakonito lohiadia, bona Lusania be Abilene lohiana,
2 bona Ana bona Kaiafa be hahelaḡa taudia badadia, una negana ai Dirava ese Ioane Sakaria e hereva henia, tano ḡaḡaena ai.
3 Bena Ioane ese Ioridane sinavaina badina tanona idoinai e loa heniava, helalo bapatisona, dika igwau-taona, e harorolaiava.
4 Isaia, peroveta tauna, ena buka ai e torea na heto; eto,Gado ta tano ḡaḡaena ai e boi lolomu, e tomu,Lohiabada ena dala ba lailaia,
5 Koura iboudiai bae hahonu,Ororo badadia bona ororo maraḡidia iboudiai bae hataora,Gabu gageva-gagevadia bae hamaoromaoro,Rigika-rigikadia danu bae hamanada;
6 Bena taunimanima iboudiai ese Dirava ena Hahemauri bae itaia.
7 Hutuma ia dekena ela, baine bapatisodia totona; bena ia ese e gwau henidia, eto, Gaigai natudia e, daika ese e hamaoromui do baine vara baduna ba heautania?
8 Helalo anina ba hahedinaraia. Bona basioto “Ai tamamai na Abraham”; badina be na hamaoromuimu, Dirava na mai siahuna ini nadi amo natuna bema havaradia Abraham ena.
9 Harihari ira na au badidiai e atoamu; taunabunai huahua namodia asie dobimu audia iboudiai na be utumu, lahi ai be taho kaumu.
10 Aru taudia ese e nanadaia, eto, Ede baia kara toma?
11 Ia ese e haere henidia, eto, Mai ena hahedoki rua tauna na ta dabu tauna baine henia; mai ana tauna danu unu baine kara toma.
12 Tax gogo taudia danu bapatiso iabina totona ela, eto, Hahediba taumu e, ai na ede baia kara toma?
13 Ia e haere, eto, Taravatu e gwauraimu ḡauna mo bavabia, basio habadaia.
14 Tuari taudia danu e nanadaia, eto, Ai danu ede baia kara toma? Ia eto, Taunimanima basio daḡedaḡe henidia bona basio habadelaidia koikoi, bona davamui korikori mo bavabi mai lalo-namomui ida.
15 Taunimanima na e daradarava bona e haeroava, Ioane na Keriso eiava.
16 Bena ia ese iboudiai e hereva henidia, eto, Lau na ranu amo na bapatisomuimu, a ta be maimu, iena siahu ese lauegu e hereaiamu, lau na dia namo ena tamaka varona baina ruhaia; ia ese Lauma Helaḡa bona lahi amo baine bapatisomui.
17 Ena itapo na imana ai: ena uit ikwadina gabuna baine tapoa ḡoevaḡoeva, uit na ena roge ai baine haboua, a momona be basine bodo lahina ai baine doua vaitani.
18 Iena hereva bunu: ma sisiba herevadia diaḡau ia ese taunimanima e harorolai henidia.
19 Ia ese Herod Ḡaubada danu e sisiba henia, Herodia, ia kakana Filipo adavana, dainai, bona ena kara havara daidiai.
20 A Herod ese unu dika iboudiai latadiai ta ma e atoa kau: ia ese Ioane na dibura rumana ai e koua.
Iesu e bapatisoa
21 Taunimanima iboudiai e bapatisodia negana ai, Iesu danu e bapatisoa. Bena e ḡuriḡuriva ai guba vada e parara,
22 bona Lauma Helaḡa e diho, pune na heto, ia tubuana ai e kau. Bona gado ta guba amo e boi dobi, eto, “Oi na lau Natugu, egu lalokau; lau oi na lalo namo henimumu”.
23 Una negana ai Iesu ena vara laḡanidia na toi-ahui sisivana. Taunimanima e tomava ia naIosef natuna.
Besedia bini: Heli,
24 Matat,Levi,Melki,Ianai,Iosef,
25 Matatia,Amos,Nahumu,Esli,Nagai,
26 Maat,Matatia,Semein,Iosek,Ioda,
27 Ioanan,Resa,Serubabele,Sealtiele,Neri,
28 Melki,Adi,Kosam,Elmadam,Ere,
29 Iosua,Eliesere,Iorim,Matat,Levi,
30 Simeon,Iuda,Iosef,Ionam,Eliakim,
31 Melea,Mena,Matata,Natan,David,
32 Iese,Obed,Boa,Salmon,Nason,
33 Aminadab,Admin,Areni,Hesron,Perese,Iuda,
34 Iakob,Isaak,Abraham,Tera,Nahoro,
35 Serug,Reu,Peleg,Ebere,Sela,
36 Kenan,Afasad,Sem,Noa,Lamek,
37 Metusela,Enok,Iared,Mahalalel,Kenan,
38 Enos,Set,Adam,Dirava.
