Mika 6:1-16
6 Iehova ena hereva a kamonai:
A tore isi, ororo vairadiai emui gini-kau gabuna ba herevalaia,ororo komutadia na gadomui bae kamonai.
2 Ororo e, Iehova ena gwau-gwau herevadia a kamonai,tanobada badidia, o mia hanaihanaimu gabudia, danu a kamonai;badina be Iehova ese ena bese taudia e gwau henidiamu,ia ese Israel baine heai henia.
3 Egu bese taumui e, ede vada na karamui toma?
Ede vada na hahisihisimui toma?
A haere henigu.
4 Badina be Aigupto tanona amo na hakaumui lasi,iḡui rumana amo na hamaurimui;Mose bona Aaron bona Miriama naumui vairamui ai na siaidia guna.
5 Egu bese taumui e, ba laloa,Balak, Moab pavapavana, ena lalo-hata be dahaka,bona Balaam Beoro ese ede e haere henia toma,bona Sitim ela bona Gilgal dahaka e vara;bena Iehova ena hahemauri karadia ba diba.
Iehova ena ura
6 Dahaka baina mailai Iehova vairanai,atai Diravana baina toma henia diho totona?
Ḡole-oho boubou ḡaudia ia vairanai baina mailaidia a?
Boromakau natudia, laḡani tamona ḡaudia, a?
7 Iehova ese nani mamaruanedia daha daha baine moalelaidia a?
Eiava dehoro sinavaidia gerebu gerebu a?
Natugu roboana baina heni, egu kerere davana, a?
tau-anigu amo e vara ḡauna baina heni, laumagu ena dika davana, a?
8 Taunimanima e, ia ese vada e hamaoromu, kara namona be dahaka,Iehova ena ura oiemu ai be dahaka.
Ina mo: ba hahemaoro ḡoevaḡoeva, hebogahisi ba ura henia,bona emu Dirava ida ba raka hebou mai manaumu ida, ani?
9 Iehova gadona ese hanua e boi heniamu,(oi ladamu igarilaina na aonega namona),e tomu: Bese taumui bona hanua taumui e, a kamonai!
10 Kara dika kohudia, kara dika taudia edia ruma ai,bona hahetoho koikoi karadia, e uduguiraidiamu ḡaudia,baina lalodia boio diba a?
11 Mai ena hahetoho ḡauna dikanabona ena hahetoho auridia koikoidia modana tauna namaorona baina gwauraia a?
12 Emui taḡa taudia na daḡedaḡe ai e honumu;emui hanua taudia na e hereva koikoimu,maladia na mai koikoidia, ududia lalodiai.
13 Taunabunai lau ese vada na rahumui mase matama;vada na habuamui, emui kara dika daidiai.
14 Bavaniani, a bogamui basie kunu,tau-animui do bae hitolo;ḡau bavato tabe, to basio gogo,bona ba gogo ḡaudia na lau ese dare baina henia.
15 Ba hadohado, to basio ḡeiḡei;olive huahuadia ba moimoilai, to kopimui na dehorodia basio dahulai;vine huahuadia ba moimoilai, to vine ranuna basio inua.
16 Badina be Omri ena taravatu vada o badinadia,bona Ahaba iduhuna ena ḡaukara idoinai danu,bona edia hahealo ai vada o raka;una dainai baina habuamui tari,emui hanua taudia na bae si henidia,bona bese idau-idau ese bae ihi-ihiraimui.
