1, 2. Hari ina negai eda roho mauri gabuna be dahaka?

MANI a laloa, oi na lai bada negana ai dala amo o raka o laomu. Guba e koremamu. Kevaru e hekaramu, guba e rahuamu, bona medu da baine diho. Oi na o ura dikadikamu gabu metaina ta ba davaria. Bena o roha lao dala badinai ruma ta o itaia. Una ruma na auka, ia na kaukau bona namo herea. Una ruma dainai bo moalemu!

² Ita na hekwakwanai negadiai ta nohomu. Kara dika na e bada e laomu. To gabu metaina ta na mia, ita baine gimada ḡau ta ese basine hadikada helaoreana. Una be dahaka? Baibul na e gwaumu Iehova baita hereva henia, baitato: “Egu roho-mauri gabuna bona egu kohoro; egu Dirava, na abidadama henimumu.”​—Salamo 91:2.

3. Edena dalai Iehova na eda roho mauri gabunai baita halaoa diba?

³ Mani a laloa! Iehova, ḡau iboudiai ihavaradia Diravana na eda roho mauri gabuna. Ia ese baine gimada diba badina iena siahu na bada herea, bona ita ihadikada tauna  o ḡauna ta ese iena siahu na se hereaia. Ena be dika baita davari, to Iehova ese unu dika na baine haoredia. Edena dalai Iehova na eda roho mauri gabunai baita halaoa? Namona na Ia baita abidadama henia. Danu, Baibul na e gwaumu: “Dirava ena lalokau ai ba noho.” (Iuda 21) Oibe, namona na Dirava ena lalokau ai baita noho, unu amo Tamada gubai e nohomu ilalokau henina karana baita hagoadaia. Bena baita abia dae momokani ia na eda roho mauri gabuna. To edena dalai ia ilalokau henina karana baita hagoadaia?

4, 5. Iehova ese ena lalokau e hahedinaraia daladia haida be dahaka?

⁴ Dirava ena lalokau ai baita noho totona, namona na ena lalokau ita edai e hahedinaraia dalana baita lalopararalaia. Ina buka amo Baibul ena hahediba herevadia haida o diba ḡaudia mani a lalodia. Iehova na ihavarada Diravana dainai, tanobada e henida baita noholaia. Tanobada na aniani, ranu, tano ai e miamu ḡaudia bona animal idauidau amo e hahonua bona mai hairaina. Dirava ese Baibul e havaraia dainai, Baibul amo ia ladana bona ena kara e hahedinarai. Danu, Baibul ese e hahedinaraia Dirava ese natuna lalokauna Iesu e siaia tanobada, ita daidai baine hisihisi bona baine mase. (Ioane 3:16) Una anina ita edai be dahaka? Ita ese vaira neganai helaro namona baita abia.

⁵ Dirava ese ḡau ma ta e karaia, vaira nega helarona baita abia totona. Iehova ese guba gavamanina ta e haginia, una na Mesia Basileiana. Kahirakahira una Basileia ese hisihisi iboudiai be haorediamu bona tanobada na paradaiso ai be halaoamu. Mani a laloa! Unuseniai ita na maino bona moale ai baita noho hanaihanaimu. (Salamo 37:29) To hari, Dirava ese ita e durudamu dala maorona baita badinaia totona. Danu, ḡuriḡuri na ia ese e heni harihari ḡauna ta, unu amo dala idauidau ai ia baita hereva henia diba. Unu na Iehova ese ena lalokau ita taunimanima edai e hahedinaraia daladia haida.

6. Iehova ese ena lalokau emu ai e hahedinaraia dainai dahaka ba kara?

 ⁶ Ba laloa henanadai badana ta na ina: Iehova ena lalokau dainai dahaka baina kara? Momo na be gwaumu, “Namona na Iehova baina lalokau henia.” Emu hemami be unu bamona eiava? Iesu ese ina haheḡani badana e heni: “Lohiabada emu Dirava ba lalokau henia mai lalomu idoinai, mai laumamu [“emu mauri” Nega Matamata Baibel] idoinai, mai daramu idoinai.” (Mataio 22:37) Iehova Dirava ba lalokau henia badidia na momo. To, una lalokau be hemami ai mo o abiamu dainai, bo gwau dibamu mai lalomu idoinai, emu mauri idoinai, bona daramu idoinai ida Iehova o lalokau heniamu eiava?

7. Edena haheitalai ese e hahedinaraiamu Dirava ilalokau henina karana na dia hemami ai mo baita hahedinaraia ḡauna?

⁷ Baibul ese e hahedinaraiamu heḡereḡerena, Dirava ilalokau henina karana na dia hemami ai mo baita hahedinaraia ḡauna. Momokani, ena be Iehova ilalokau henina hemamina baita abia na namo, to una hemami na Ia ilalokau henina momokani karana matamana mo. Ina haheitalai aita laloa: Apolo uhena na mai anina bada, apolo auna badana ta baine vara totona, to ia na una au ena tubu ihamatamana ḡauna mo. Bema oi na apolo ta o uramu, oi bo moalemu bema ta ese apolo uhena mo be henimumu? Lasi! Una heḡereḡerena, Iehova Dirava ilalokau henina hemamina baita abia mo na dia heḡereḡere. Baibul na e gwaumu: “Dirava iura-henina anina binai: ena haheḡani baita badina. Ena haheḡani danu dia memetau.” (1 Ioane 5:3) Dirava baita lalokau henia momokani karana ese huahua namona baine havaraia na namo. Una na eda kara amo baita hahedinaraia.​—Mataio 7:16-20 ba duahi.

8, 9. Edena dalai Dirava baita lalokau henia bona tanikiu henia?

⁸ Dirava ena haheḡani baita lalodia badamu bona ena hahekau herevadia baita badinadiamu neganai, baita hahedinaraiamu  Ia ta lalokau heniamu. Unu baita kara toma na dia auka. Iehova ena taravatu na dia memetau, to ita baine duruda mauri namona baita moalelaia totona. (Isaia 48:17, 18) Iehova ena hahekau dalana baita badinaiamu neganai, baita hahedinaraiamu Tamada gubai ese ita daidai e kara ḡaudia na ta lalodia badamu. To, hari ina negai momo na Dirava ese e kara ḡaudia na asie lalo badamu. Asita uramu Iesu ena negai e nohova taudia haida edia kara baita tohotoho. Iesu ese lepera taudia 10 edia gorere e hanamo neganai, tamona mo e lou Iesu e tanikiu henia. (Luka 17:12-17) Ita na ta uramu Iesu e tanikiu henia tauna baita tohotohoa!

⁹ Iehova ena haheḡani be dahaka? Ina buka lalonai momo ta herevalaidia, to mani haida baita riviulaidia. Dirava ena haheḡani baita lalodia bada karana ese baine duruda Iena lalokau ai baita noho totona.

10. Hahetalai ta amo ba hahedinaraia dahaka dainai Iehova Dirava baita dibaia noho na mai anina bada.

¹⁰ Iehova ba dibaia karana na Ia iraka heni  kahina dalana badana. Una diba iabina na asi dokona. Bema oi na hanuaboi parakana ta ai murimuri ai noho bona lahi badinai taumu o hasiahuamu, una lahi bo raraia taomu bena be bodomu eiava? Lasi. Oi na au haida bo rakumu lahi basine bodo totona. Unu basio kara tomamu neganai, be kerumu masemu. Au rakuraku ese lahi e habadaiamu heḡereḡerena, “Dirava idibana” karana ese eda lalokau Iehova enai baine hagoadaia.​—Hereva Lada-isidia 2:1-5.

11. Iesu ena hereva ese ena hahediba taudia be ede e durudia toma?

¹¹ Iesu na e ura ena hahediba ese Iehova bae lalokau henia bona Iena Hereva momokani bae ura henia. Iesu e toreisi lou murinai, ienai e ḡuḡuru peroveta herevadia haida Heberu Toretoredia ai na ena hahediba rarua vairadiai e gwaurai. Una ese idia be ede e durudia toma? Idia na e gwa: “Dala ai e hereva henida, bona Buka Helaḡa anina e hadibalaida negana ai, laloda e siahu ani?”​—Luka 24:32.

12, 13. (a) Hari, taunimanima edia lalokau Dirava enai bona Baibul ai be ede e hetomu? (b) Edena dalai eda lalokau baita hagoadaia?

¹² Baibul ena hahediba maorodia o diba matama neganai, kudoumu na e moale, o ura dikadika haida vairadiai hereva momokani ba herevalaia, bona Dirava ilalokau henina urana o habadaia, ani? Momo edia hemami danu unu bamona. To una lalokau karana ba habadaia noho na ḡau badana. Asita uramu ina tanobada ena kara baita tohotohoa. Iesu na e gwa: “Diaḡau edia lalokau do baine keruma.” (Mataio 24:12) Edena dalai Iehova bona iena hereva momokani ba ura henidia bada?

¹³ Namona na hanaihanai Iehova Dirava bona Iesu Keriso ba dibadia. (Ioane 17:3) Dirava ena Hereva amo o diba ḡaudia na ba haero, bena sibomu ba henanadai: ‘Lau be dahaka e hadibagumu Iehova Dirava enai? Dahaka dainai mai kudougu idoinai, egu mauri idoinai, bona daragu idoinai ida Iehova baina lalokau henia?’ (Salamo 143:5 ba duahia.) Unu bamona lalo dobu karana ese baine durumu emu lalokau Iehova enai ba hagoadaia noho.

14. Ḡuriḡuri karana ese edena dalai eda lalokau Iehova enai baine hagoadaia?

 ¹⁴ Emu lalokau Dirava enai ba hagoadaia dalana ma ta na ba ḡuriḡuri hanaihanai. (1 Tesalonika 5:17) Ina buka ena Karoa 17 ai ta diba, ḡuriḡuri na Dirava ese e henida harihari ḡauna hereadaena ta. Haida ida hanaihanai ta herevaherevamu karana ese eda hetura karana e hagoadaiamu heḡereḡerena, ḡuriḡuri hanaihanai karana ese eda hetura karana Iehova ida baine hagoadaia. Ḡau badana na eda ḡuriḡuri ai hereva tamodia basita gwaurai loulou eiava basita ḡuriḡuri kava. Iehova baita hereva henia, natu ta ese tamana lalokauna e hereva heniamu heḡereḡerena. Namona na mai hematauraida ida, mai momokanida ida, bona mai kudouda idoinai Ia baita hereva henia. (Salamo 62:8) Siboda eda stadi karana bona kudouda amo baita ḡuriḡuri karana na eda tomadiho kahadia badadia, bona bae duruda Dirava ena lalokau ai baita noho totona.

15, 16. Dahaka dainai Basileia iharorolaina na ḡaukara hereadaena bona kohu namona ta bamona baita laloa?

¹⁵ Baibul istadilaina karana bona ḡuriḡuri na siboda baita kara diba tomadiho karadia. To, taunimanima vairadiai baita karaia tomadiho karana ma ta mani aita laloa: Haida vairadiai eda abidadama baita gwaurai hedinarai. Haida vairadiai Baibul ena hereva momokani do herevalai, eiava? Bema oibe, una na hahenamo namona ta. (Luka 1:74) Iehova Dirava sivaraina momokanina ta herevalaiamu neganai, ita na Kristen taudia korikoridia ese e karaiamu ḡaukara badana ta karaiamu, una na Dirava ena Basileia sivaraina namona iharorolaina ḡaukarana.​—Mataio 24:14; 28:19, 20 ba duahi.

¹⁶ Aposetolo Paulo ese ena hesiai ḡaukara na e laloa bada, kohu namona ta na heto. (2 Korinto 4:7) Taunimanima vairadiai Iehova Dirava bona ena ura ba herevalaidia karana na ḡaukara hereadaena. Ita na Biaguda namona ta hesiai  heniamu bona hahenamo namodia momo baita abi dibamu. Una ḡaukara amo kudou maoro taudia ba durudia, Dirava bae raka henia kahi bona mauri hanaihanai dalanai bae raka. Una na ḡaukara hereadaena, ani? Danu, Iehova bona iena Hereva ba herevalaia karana ese emu abidadama  bona emu lalokau ienai baine hagoadaia diba. Bona Iehova ese emu hekwarahi na e laloa badamu. (Heberu 6:10) Una ḡaukara ba karaia hanaihanai karana ese baine durumu Dirava ena lalokau ai ba noho.​—1 Korinto 15:58 ba duahia.

17. Dahaka dainai hari haroro ḡaukara baita goadalaia?

¹⁷ Baita helalotao Basileia iharorolaina ḡaukarana baita goadalaia na mai anina bada. Baibul na e gwaumu: “Hereva iharorolaina ai ba goada balaheni.” (2 Timoteo 4:2) Dahaka dainai una na mai anina bada? Baibul na e gwaumu: “Iehova ena dina badana vada eme kahikahi, e kahira-kahiramu, e mai haraḡamu.” (Sefania 1:14) Oibe, Iehova ese ina nega oromana dikana baine haorea negana na vada kahirakahira. Taunimanima baita hadibadia haraḡa na namo! Namona na bae diba hari na nega namona Iehova na edia Lohia Badana ai bae halaoa. Dokona na “basine halahe.”​—Habakuku 2:3.

18. Dahaka dainai Kristen taudia momokanidia ida Iehova baita tomadiho henia na namo?

¹⁸ Iehova na e uramu Kristen taudia momokanidia ida Ia baita tomadiho henia. Una dainai Baibul na e gwaumu: “Baita helalolai heheni, bena baita hahealo heheni, lalokau bona kara namodia baita havara. Eda hegogo karadia danu basita nege, haida ese e nege heḡereḡerena, a baita hahealo heheni; oibe, ina kara baita habadaia, badina be, o itaiamu, dina badana eme kahikahi.” (Heberu 10:24, 25) Kristen heboudia ai iseda abidadama tamona taudia ida ta heboumu karana ese dala baine kehoa, eda lalokau Diravana baita tomadiho henia bona baita hanamoa. Danu baita hahegoada heheni.

19. Edena dalai Kristen kongrigeisen ai lalokau karana baita hagoadaia?

¹⁹ Kongrigeisen ai, Iehova e tomadiho heniamu taudia ta bamodiamu karana amo eda lalokau bona hebamo karana ta hagoadaiamu. Mai anina bada ḡauna na haida edia kara namodia baita lalo, Iehova ese iseda kara namodia e lalomu heḡereḡerena. Namona na ba helalotao iseda abidadama tamona taudia na dia ḡoḡoeva. Danu, ba helalotao Dirava ihetura henina karanai eda tubu daladia na idauidau bona  iboudai na ta kereremu. (Kolose 3:13 ba duahia.) Iehova e lalokau heniamu taudia ida emu hebamo karana ba hagoadaia, bena emu hetura karana Dirava ida na be goada be laomu. Oibe, emu Kristen tadikaka bona taihu ida Iehova ba tomadiho henia karana ese baine durumu Dirava ena lalokau ai ba noho. Iehova ese mai momokanidia ida ia e tomadiho heniamu bona iena lalokau ai e nohomu taudia be ede e hanamodia tomamu?

20, 21. “Mauri korikori” be dahaka, bona dahaka dainai ia na helaro namona?

²⁰ Iehova ese iena abidadama hesiai taudia na mauri e henidiamu, to edena mauri? Hari oi na doini mauri, ani? Ita momo na baita gwaumu oibe, badina ta hahodimu, ta anianimu, bona ranu ta inumu. Bona ta moalemu negadiai, ta gwaumu, “Mauri korikori bina!” To, Baibul ese e hahedinaraiamu, una na dia mauri korikorina.

²¹ Baibul ese e hagoadadamu ‘mauri korikori baita abia tao.’ (1 Timoteo 6:19) Una ese e hahedinaraiamu “mauri korikori” na vaira negana ai baita abia ḡauna. Oibe, baita ḡoevadae neganai, mauri korikorina baita moalelaiamu, badina matamanai Dirava ena ura na unu bamona. Tanobada paradaisona ai basita goreremu, maino bona moale ai baita nohomu neganai, “mauri korikorina”​—mauri hanaihanai​—baita moalelaiamu. (1 Timoteo 6:12) Una na helaro namona, ani?

22. Edena dalai ‘mauri korikori baita abia tao’ diba?

²² Edena dalai ‘mauri korikori baita abia tao’ diba? Paulo ese Kristen taudia e hagoadadia “kara namodia bae kara, edia taḡa ḡaudia bunu.” (1 Timoteo 6:18) E hahedinaraia ḡoevaḡoevamu, Baibul amo ta dibamu hereva momokanidia baita badinadia na ḡau badana. To Paulo ena hereva anina be iseda kara namodia dainai “mauri korikori” baita abia, eiava? Lasi, una hahenamo na Dirava ena “harihari-bada” dainai baita abia dibamu. (Roma 5:15) To, Iehova  ese mai edia abidadama ida ia e hesiai heniamu taudia na e hanamodiamu. Ia na e uramu “mauri korikori” bavabia. Dirava ena lalokau ai e nohomu taudia ese una mauri hanaihanai mai moalena bona mainona bae abia diba.

23. Dahaka dainai Dirava ena lalokau ai baita noho na mai anina bada?

²³ Namona na siboda baita henanadai, ‘Lau be Dirava ese Baibul ai e gwauraia dalana heḡereḡerenai ia na tomadiho heniamu eiava?’ Bema dina ta ta ai ta karamu ḡaudia ese e hahedinaraiamu, haere na oibe, ita na dala maorona ta badinaiamu. Ta diba momokanimu Iehova na iseda roho mauri gabuna. Ia e abidadama heniamu taudia na baine gimadia, ina nega oromana dikana ese basine hametaudia. Danu, Iehova ese baine hamaurida bena e maimu nega oromana matamatana ai baita noho. Una nega baita itaiamu na moale ḡauna, ani? Bona dina gabediai abi hidi maorodia ta kara dainai, baita moalemu! Bema hari abi hidi maorodia bo karamu, matamanai Iehova Dirava e ura baine heni “mauri korikori” na bo moalelaia hanaihanaimu!