Baibel na “moale Diravana ena hairai sivarai” namodia amo e honu dae. (1 Timoteo 1:11, NW) Una moale Diravana na e uramu famili iboudiai bae moale. Ia na headava e hamatamaia. Famili baine moale totona, ḡau badana na tau bona hahine na dala maorona ai bae headava, badina una ese tama sina bona natu baine gimadia. Keristani taudia ese edia tano o gavamani ena taravatu heḡereḡerena, edia headava bae rejistaia na namo.​—Luka 2:1, 4, 5 duahidia.

Dirava ese headava be ede e laloa tomamu? Ia na e uramu tau tamona bona hahine tamona bae headava neganai, bae noho hebou ela bona hanaihanai. Iehova na se uramu headava taudia bae heudahanai. (Heberu 13:4) Iehova ese divos o headava ihadokona karana na e inai heniamu. (Malaki 2:16) To, bema Keristani tauna ta na adavana e heudahanaimu dainai, ena headava baine hadokoa bona hahine ma ta baine adavaia, Dirava matanai, una Keristani tauna ena abia hidi na dia kerere.​—Mataio 19:3-6, 9 duahidia.

Iehova ese tau bona hahine e karadia, headava maduna idauidau bae hua hebou totona. (Genese 2:18) Namona na famili kwarana ese ena ruma bese baine ubudia, baine naridia, bona Dirava sivaraina baine hadibalaidia. Namona na tau sibona ena ura ḡaudia haida baine dadarai, adavana baine lalokau henia totona. Headava taudia bae helalokau heheni bona bae hemataurai heheni na namo. Ena be headava taudia na dia ḡoevadae, to edia headava lalonai moale baine mia totona, ḡau badana na idia ta ta edia dika bae hegwau tao heheni.​—Efeso 4:31, 32; 5:22-25, 33; 1 Petro 3:7 duahidia.

Bema headava lalonai hekwakwanai e varamu, namona na oi bona adavamu na lalokau ai una hekwakwanai ba hamaoromaoroa. (1 Korinto 13:4, 5) Vaia, headava iboudiai lalodiai, hekwakwanai na bae vara, to Baibel na e tomu, ta ese adavana baine dihotania na taravatu.​—1 Korinto 7:10-13 duahidia.

Iehova na e uramu oi na ba moale. Ia ese oi e hadibamumu, emu eregabe maurina be ede ba ḡaukaralaia namonamo toma. Ia na e uramu tamamu bona sinamu ediai e vara ḡaudia bona edia sisiba amo aonega ba davari. (Kolose 3:20) Danu, Iehova na e uramu Ihavaramu Diravana bona Ia Natuna daidiai o karamu ḡaudia o karadia ba moalelai.​—Kohelete 11:9–12:1; Mataio 19:13-15; 21:15, 16 duahidia.

Namona na ba ḡaukara goada natu edia dabu ḡaudia ba havara heni, heḡereḡere aniani, ruma, bona dabua. (1 Timoteo 5:8) To, natu ese moale bae davari totona, namona na ba hadibadia Dirava bae lalokau henia bona bae dibaia. (Efeso 6:4) Oi ese Iehova bo lalokau heniamu neganai, natu danu Iehova be lalokau heniamu. Dirava ena Hereva amo natu ba hadibadia neganai, natu ena lalohadai dalana danu baine namo.​—Deuteronomi 6:4-7; Hereva Lada-isidia 22:6 duahidia.

Natu ba hagoadadia bona ba hanamodia o ba tanikiu henidia neganai, una ese natu baine durudia. Danu, natu ese matahakani bae abi na mai anina bada. Una ese baine gimadia, edia moale bae hadika karadia basie kara totona. (Hereva Lada-isidia 22:15) To, natu o matahakani henidiamu neganai, basio lalodika henidia o basio kara auka henidia.​—Kolose 3:21 duahia.

Iehova ena Witnes taudia edia buka haida ese tama sina bona natu bae durudia diba. Unu buka na mai Baibel siridia.​—Salamo 19:7, 11 duahidia.