1. Lauma dalanai ededia tahua ḡaudia baita ato diba?

 ITA NA Kristen tauda momokanidia dainai, Iehova na ta lalokau henia badamu. Ia ta hesiai heniamu neganai, ta uramu edai miadia ḡaudia iboudiai baita heni. To, bema ta uramu hesiai ḡaukara ai eda goada ibounai baita ḡaukaralaia, namona na lauma dalanai tahua ḡaudia haida baita ato, Kristen karadia baita hahedinarai, ḡaukara ta ikarana dalana baita diba, bona haida idurudia daladia baita tahu. b

2. Dahaka dainai lauma dalanai tahua ḡaudia baita ato bona baita ḡaukara goada baita haḡuḡurudia?

² Dahaka dainai lauma dalanai baita tubu karana baita laloa na ḡau badana? Badi badana na, ta uramu Tamada lalokauna guba ai baita hamoalea. Iehova na e moalemu bema e itaiamu ena hesiai ḡaukara ai mai eda goada idoinai ida eda diba na ta ḡaukaralaiamu. Bona ta uramu lauma dalanai baita tubu, unu amo tadikaka taihu baita durudia diba. (1 Tes. 4:9, 10) Herevana laḡani hida hereva momokani ai da ta noho, to ita iboudai na dounu lauma dalanai baita tubu diba. Mani una baita karaia dalana aita itaia.

3. Timoteo Ginigunana 4:12-16 ena hereva heḡereḡerena, aposetolo Paulo ese Timoteo be e hagoadaia dahaka baine kara?

³ Aposetolo Paulo ese ena revareva ginigunana Timoteo e tore henia neganai, Timoteo na vada elda namona ta. To, Paulo ese e hagoadaia dounu lauma dalanai baine goada. (1 Timoteo 4:12-16 ba duahi.) Paulo ena hereva bo lalodiamu neganai, bo itaiamu ia na e ura Timoteo na dala rua ai baine goada: Kristen  karadia heḡereḡere lalokau, abidadama, bona kara ḡoeva baine hahedinarai, bona taunimanima vairadiai ena duahiduahi dalana, ena hahegoada dalana, bona ena hahediba dalana baine hanamodia. Timoteo ena haheitalai ta laloamu lalonai, mani tahua ḡaudia namodia baita ato karana ese baine duruda, lauma dalanai baita goada daladia baita lalodia. Bona eda hesiai ḡaukara baita habadaia diba daladia haida danu baita herevalaimu.

4. Filipi 2:19-22 ena hereva heḡereḡerena, Timoteo be dahaka e kara dainai Iehova ena hesiai tauna namona ai ela?

⁴ Timoteo be dahaka e kara dainai, Iehova ena hesiai tauna namona ai ela? Ia ese Kristen karadia e hahedinarai dainai. (Filipi 2:19-22 ba duahi.) Paulo ese Timoteo e herevalaia dalana amo ta dibamu Timoteo na manau tauna, Dirava e badinaiava tauna, ḡaukara goadagoada tauna, bona ba abidadama henia diba tauna. Ia na lalokau bada tauna bona tadikaka taihu na e lalodia badava. Una dainai, Paulo ese ia na e lalokau henia badava bona Paulo na se halahe to ḡaukara badadia na e henia baine huadia. (1 Kor. 4:17) Una heḡereḡerena, bema Iehova ese e moalelaimu karadia baita hahedinaraimu, ia ese na be lalokau henidamu bona kongrigeisin iduruna totona be ḡaukaralaida momomu.​—Sal. 25:9; 138:6.

5. (a) Edena dala ai Kristen karana ta ba hahedinaraia totona tahua ḡauna ta bavatoa? (b) Laulau heḡereḡerena, ina eregabe taihuna be edena dala ai, ena tahua ḡauna, haida baine lalodia bada karana, e hahedinaraia?

⁵ Ba karaia diba tahua ḡauna ta bavabia hidi. Emu kara ai, edena be ba hanamoa na namo, ba laloa bona ba ḡuriḡurilaia. Bena o uramu ba hanamoa karana bavabia hidi. Heḡereḡere, reana bo uramu hebogahisi karana ba habadaia eiava tadikaka taihu idurudia urana ba habadaia, ani? Eiava maino bona dika igwautaona karadia ba habada be namo, a? Heduru dalana namona ta na, turamu namona ta ba noia, bena emu kara ihanamona totona heduru daladia haida baine henimu.​—Her. 27:6.

6. Edena dalai ba hekwarahi unu amo kara ta ihahedinaraina na emu tahua ḡauna ai ba halaoa?

⁶ Emu tahua ḡauna ihaḡuḡuruna karadia ba kara. Edena dala ai unu ba kara toma diba? Dala ta na o uramu ba hanamoa karana na ba stadilaia namonamo. Heḡereḡere, bema oi na o uramu ma haida edia dika igwautaona karana ba hahedinaraia. Reana Baibul ai, haida edia dika e gwautao bona se gwautao taudia  sivaraidia ba duahi bona ba lalodia dobu. Mani Iesu ena haheitalai aita laloa. Ia na mai ena ura ida haida edia dika e gwautao. (Luka 7:47, 48) Edia kerere na se lalodia noho lalodia noho, to bae kara diba ḡaudia hari e lalo bada. To, Iesu ena negai e noho Farisea taudia be i’idau, idia ese ma haida na ‘e dadaraidiava.’ (Luka 18:9) Unu haheitalai ba lalo dobu murinai, sibomu ba henanadai: ‘Lau be ma haida ediai ededia kara namodia na itamu? Idia ediai, lau ese edena kara be baina laloa bada?’ Bema oi na o hekwarahimu ta ena dika ba gwauatao, namona na iena kara ai o lalomu kara namodia iboudiai ba tore diho. Bena sibomu ba henanadai: ‘Iesu ese ia be ede e laloa tomamu? Iena dika bema gwauatao, a?’ Stadi karana unu bamona ese ita na be durudamu ta ta laloamu dalana baita haidaua totona. Matamanai, reana be aukamu ita e habaduda tauna ta ena dika baita gwauatao. To bema baita hekwarahimu, eda kara bona ia ta laloamu dalana baita haidauamu ena dika igwautaona na be haraḡamu.

7. Hereva Lada-isidia 22:29 ena hereva heḡereḡerena, edena dalai hari ina nega ai Iehova ese mai edia diba taudia e ḡaukaralaidiamu?

⁷ Tahua ḡauna ma ta na, ina ba karaia diba ḡaukarana ta ai emu diba ba habadaia diba. Mani a laloa Betele rumadia, Assembly Hall, bona Kingdom Hall e haginimu taudia na momo herea. Idia momo na mai edia diba bada tadikaka bona taihu ida e ḡaukarava amo unu ḡaukara idauidau ikaradia e diba. Laulau heḡereḡerena, tadikaka bona taihu na Assembly Hall bona Kingdom Hall inaridia ḡaukaradia idauidau e dibamu. Ini bona ma dala haida ai, Iehova Dirava, “uru iboudiai edia Pavapava,” bona Iesu Keriso, “pavapava edia Pavapava,” ese ḡaukara ikaradia mai dibadia taudia e ḡaukaralaidiamu ḡaukara hereadia e haḡuḡurumu. (1 Tim. 1:17; 6:15; Hereva Lada-isidia 22:29 ba duahia.) Dia siboda baita hahenamo, to ta uramu baita ḡaukara goada bona eda diba baita ḡaukaralai Iehova baita hanamoa.​—Ioa. 8:54.

8. Edena dala ai abi hidi ta ba karaia ḡaukara ta ikarana dalana ba dibaia totona?

⁸ Emu diba ba habadaia ḡaukarana bavabia hidi. Edena ḡaukara o uramu ba dibaia? Emu kongrigeisin elda bona sekit tauna ba nanadaidia diba oi be edena ḡaukara o uramu ba dibaia. Bema, heḡereḡere, idia ese oi bae hamaoromu emu hereva bona hahediba dalana ba hanamoa, ba nanadaidia oi ese ba hanamoa hereva dalanai oi bae durumu diba. Bena dala ba tahu unu ba hanamodia. Una be ede ba haḡuḡurua toma?

9. Edena dala ai ba hekwarahi unu amo ḡaukara ta ikarana dalana ba dibaia karana na emu tahua ḡauna ai ba halaoa?

⁹ Kara ta ba karaia emu tahua ḡauna ta ba haḡuḡurua totona. Bema heḡereḡere oi na o uramu emu hahediba dalana ba hanamoa. Duahiduahi Bona Hahediba Ba Goadalai buklet ba stadilaia namonamo. Bema oi na mai emu kaha midweek hebouna ai, mai ena diba bada tadikaka ta ba noia diba emu kaha do so heni ai baine hakalaia guna bona oi baine durumu totona heduru herevadia baine henimu diba. Emu kaha na nega badana ai ba heḡaeḡaelaia, unu amo taunimanima na bae itaia oi na oi ḡaukara goada bona emu kaha na o laloa bada dainai o heni.​—Her. 21:5; 2 Kor. 8:22.

10. Ḡau ta ikaranai eda diba baita habadaia dalana ena haheitalai ta ba gwauraia.

¹⁰ Dahaka ba kara diba bema emu tahua ḡauna na oiemu ai e aukamu ḡaukarana ikaranai o uramu diba ma haida bavabi? Basio hesiku! Tadikaka ta ladana Garry na se duahiduahi namonamova. E helalotaomu kongrigeisin heboudiai e duahiduahi badabadava neganai ia na e hemaraiva. To ia na dounu e hekwarahiva  una kaha baine hanamoa. Hari ia na e gwaumu e abia treininina dainai, Kingdom Hall, sekit heboudia, bona hebouhebou badadia ai tok baine heni diba!

11. Timoteo heḡereḡerena, dahaka ese baine duruda diba Iehova ihesiai heninai eda ḡaukara baita habadaia?

¹¹ Timoteo be taunimanima vairadiai hereva e heniva tauna namo hereana, a? Baibul ese una na se gwauraia. To asita daradaramu bona ta dibamu Timoteo ese ena maduna idauidau na e huadia namonamova badina ia ese Paulo ena sisiba na e badinaia. (2 Tim. 3:10) Una heḡereḡerena, bema ḡaukara ta ikarana ai eda diba baita habadaiamu, Iehova ihesiai heninai ḡaukara ma haida baita kara dibamu.

12. Edena dala ai ma haida edia heduru dainai namo o abi?

¹² Ita iboudai na haida edia heduru dainai namo ta abi. Ita na hospele ai ta nohova neganai haida na ḡau momo e kara ita iduruda totona, heḡereḡere Hospital Liaison Committee eiava Patient Visitation Group ai e ḡaukaramu elda taudia haida ese e vadivadida. Eda mauri ai hekwakwanai ta davarimu neganai, ta moalemu bema elda ta na mai lalokauna ida nega e atomu eda hereva e kamonaimu bona e hagoadadamu. Baibul stadi ta ikarana totona heduru ta uramu neganai, ta moalemu bema painia ḡaukara ai mai ena diba tadikaka o taihu ta na e uramu eda stadi ai baine helai vareai bona heduru herevadia e henimu. Unu tadikaka bona taihu iboudiai na e ura dikadikamu ita bae duruda. Baita moalemu bema dala baita tahumu tadikakada baita durudiamu. Iesu na e gwa, “Ḡau ihenina be namo bada, ḡau iabina be namo maraḡi.” (Apos. 20:35) Bema oi na o uramu ini dala eiava dala ma haida ai Iehova ihesiai henina ai emu ḡaukara ba habadaia, dahaka ese oi baine durumu emu tahua ḡaudia ba haḡuḡurudia totona?

13. Siboda edai tahua ḡauna ta ta uramu baita haḡuḡurua neganai, dahaka baita laloatao na ḡau badana?

¹³ Sibomu emu ai basio haḡuḡuru diba tahua ḡauna na basio karaia. Heḡereḡere, reana bo lalomu, ‘Na uramu kongrigeisin ai ḡaukara ma haida baina kara.’ To reana ba haḡuḡuru diba tahua ḡaudia idibadia karana be aukamu, bona oiemu ai na be aukamu ededia nega ai oi o uramu ba haḡuḡuru ḡaudia ba diba. Una dainai ba karaia diba tahua ḡauna ta bavabia hidi.  Reana una tahua ḡauna bona ba haḡuḡurua diba dalana ba torea diho.

14. Dahaka dainai ta uramu baita haḡuḡuru ḡaudia baita kara neganai, ḡau haida baita haidau na ḡau badana?

¹⁴ Baita haḡuḡuru ḡaudia baita karamu neganai, ḡau haida baita haidau na ḡau badana. Dahaka dainai? Badina eda mauri ai e varamu ḡaudia na basita biagudia diba. Haheitalai na ina: Aposetolo Paulo na Tesalonika ai kongrigeisin ta e hamatamaia. Bona ta dibamu ia na e ura unuseniai baine noho bona unu Kristen taudia matamatadia baine durudia. To daḡedaḡe taudia na asie urava Paulo na una gabu ai baine noho. (Apos. 17:1-5, 10) Bema Paulo na bema noho, ia ese tadikakana na dika ai bema atodia. To Paulo na se hesiku. Ena be ena noho dalana na e idau to ia na dounu dala matamatadia e ḡaukaralaiva baine haroro. Gabeai, Timoteo e siaia Tesalonika ai lauma dalanai tadikaka bona taihu baine durudia. (1 Tes. 3:1-3) Tesalonika taudia na e moale badina Timoteo na nega e ato bona dala e kara ia e siaiava gabudia ai ena hesiai ḡaukara e karaiava!

15. Edena dalai basita biagu diba noho daladia ese eda tahua ḡaudia bae kou diba? Haheitalai ta ba gwauraia.

¹⁵ Tesalonika ai Paulo ena haheitalai amo diba baita abi diba. Reana ita na ta uramu hesiai ḡaukara ena hahenamo ta baita abia, to basita biagu diba ḡaudia haida daidiai edai na be aukamu unu baita abi totona. (Koh. 9:11) Bema una na oiemu ai e varamu, namona na mai emu ura ida ba haḡuḡurua diba tahua ḡauna ta bavatoa. Headava taudia ladadia Ted bona Hiedi na unu e kara toma. Gorere badana ta dainai, Betele na e rakatania. To edia lalokau Iehova enai ese e hagoadadia dala e tahu edia hesiai ḡaukara Iehova enai bae habadaia totona. Ginigunana na, raruosi ese regula painia ḡaukarana e karaia. Gabeai, e abidia hidi spesol painia ḡaukarana bae karaia, bona Ted na trenini e abiva substitute sekit tauna ena ḡaukara baine karaia. Bena vaevae sekit taudia totodia mauri laḡanidia na e haidau. Ted bona Hiedi na e laloparara idia na dia heḡereḡere una hesiai ḡaukara ena hahenamo bae abia. Ena be raruosi e lalohisihisi, to e laloparara dala ma haida ai Iehova bae hesiai henia diba. Ted na e gwa, “Ai na a diba hesiai ḡaukara tamona mo basia laloa bada to ma ḡaukara haida danu baia lalodia bada.”

16. Galatia 6:4 amo dahaka ta dibamu?

¹⁶ Eda mauri ai e varamu ḡaudia iboudiai na basita biagu diba. Una dainai, eda hesiai ḡaukara ai ta moalelaimu hahenamodia na ma haida ese e moalelaimu hahenamodia ida na basita haheḡereḡere na mai anina bada. Hiedi ese una e herevalaia e gwa, “Bema haida edia mauri ai e varamu ḡaudia na oiemu ai e varamu ḡaudia ida bo haheḡereḡeremu, basio lalomainomu.” (Galatia 6:4 ba duahia.) Namona na  dala baita tahu baita kara diba ḡaudia hari baita lalo bada. c

17. Edena dala ai ba ḡaukara goada, unu amo ba heḡereḡere hesiai ḡaukara ai hahenamo ta bavabia diba?

¹⁷ Ba heḡereḡere hesiai ḡaukara ai hahenamo ta bavabia totona, namona na emu mauri ai moni bona kohu momo na basio tahu bona abitorehai asi anidia ikarana karana na ba dadaraia. Nega kwadoḡi lalonai ba kara diba tahua ḡaudia bavato una ese baine durumu nega daudau lalonai o uramu ba kara tahua ḡaudia ba haḡuḡuru diba. Heḡereḡere, bema nega daudau lalonai o uramu ba haḡuḡurua tahua ḡauna na regula painia ai baola, hari oi ese hua iboudiai heduru painia ḡaukarana ba karaia hesiriu diba, a? Bema emu tahua ḡauna na hesiai tauna ai baola, hesiai ḡaukara ai emu nega ba habadaia diba a, bona emu kongrigeisin ai gorere taudia bona iahudia ba vadivadidia diba, a? Hari o abiamu dibana ese dala be kehoamu vaira negai hesiai ḡaukara ena hahenamo idauidau bo moalelai dibamu. Lalomu ba hadaia herevana edena ḡaukara e henimumu, mai lalomu idoinai ida ba karaia.​—Roma 12:11.

18. Laulau ese e hahedinaraiamu heḡereḡerena, Beverley ena haheitalai amo dahaka o dibamu?

¹⁸ Herevana ita na mamatamata eiava buburuka, tahua ḡaudia baita ato bona baita haḡuḡuru diba. Mani laḡanina 75 taihu ladana Beverley ena haheitalai a laloa. Ia na gorere badana ta dainai se rakava. To ia na e ura dikadikava Memorial ena haroro ḡaukara badana ai baine vareai. Una dainai baine haḡuḡuru diba tahua ḡaudia e ato. Beverley ese haroro ḡaukara badana ai ena tahua ḡaudia e haḡuḡuru neganai, e moale dikadika. Ena hekwarahi ese haida na e hagoadadia edia hesiai ḡaukara bae habadaia. Iehova ese tadikaka bona taihu iahudia edia ḡaukara na e lalodia badamu, ena be edia noho daladia daidiai ḡau momo na basie kara diba.​—Sal. 71:17, 18.

19. Lauma dalanai ededia tahua ḡaudia baita ato diba?

¹⁹ Ba haḡuḡuru diba tahua ḡaudia bavato. Iehova ese e moalelaimu kara namodia ba hahedinarai. Dirava bona ena orea ai ba ḡaukaralai diba ḡaukaradiai diba ma haida bavabi. Dala ba tahu tadikaka bona taihu ba durudia namonamo. d Timoteo heḡereḡerena, Iehova ena hahenamo amo ‘emu goada na taunimanima iboudiai vairadiai be hedinaraimu.’​—1 Tim. 4:15.