Lau na 1927, Chicago badinai, taon maraḡina ta ladana Illinois, U.S.A. ai na vara. Ai taumai na 5: Jetha, Don, lau, Karl, bona Joy. Ai na lalomai a hadai Iehova baia hesiai henia emai mauri ibounai lalonai. Laḡani 1943 ai lau taihugu Jetha na Gilead skul ena klas namba 2 ela. Laḡani 1944 ai Don na Brooklyn New York Betel ai e vareai, Karl be 1947 ai, bona Joy be 1951 ai. Idia bona tamagu sinagu edia haheitalai namona ese e hagoadagu Iehova baina hesiai henia.

Tamagu bona sinagu na Baibul e duahiava bona Dirava e lalokau heniava taudia, una dainai ai danu e hadibamai Dirava baia lalokau henia. To, Tanobada Tuarina Ginigunana ai tamagu na Europe soldiana ta ai ela, una murinai ia ese dubu na se laloa badava. Sinagu na e moale dikadika badina tuari murinai tamagu na e lou ruma, una dainai e hamaoroa: “Karl aitala dubu, guna ta karava heḡereḡerena.” Tamagu na e gwa: “Baina lao haimui, to lau na basina vareaimu.” Sinagu ese e nanadaia: “Dahaka dainai so uramu?” Ia na e gwa: “Tuari lalonai tomadiho tamona taudia na e hetuari heheniva bona edia dubu igunalaidia taudia na idia daidiai e ḡuriḡuriva! Dirava be edena tuari oreana e duruava?”

Sinagu ela dubu murinai Iehova ena Witnes taudia rarua na emai ruma ela. Idia ese tamagu na Baibul stadi bukana ladana Light—volium 1 bona 2—e henia. Unu buka na Apokalupo bukana e herevalaia. Tamagu ese unu buka na e ura heni dainai e abi. Sinagu ese unu buka e ita neganai, e duahidia matama. Dina ta sinagu na niuspepa ai hahediba herevana ta e itaia, una hahediba herevana ai Baibul e urava bae stadilaia taudia e boiridiava Light bukana amo bae durudia. Bena ia na lalona e hadaia, bona ela. E kau neganai hahine ta ese iduarana e kehoa. Bena sinagu na una stadi bukana ta e hahedinaraia bona e gwa: “Ina buka be iniseniai o stadilaiamu, a?” Una hahine na e gwa: “Oibe, mani emu kara, a vareai.” Una murina wikinai sinagu ese ai danu e laohaimai, bona una nega amo hanaihanai a laova.

Hebou ta ai tadikaka ese e noigu Salamo 144:15 baina duahia, una siri ese e hahedinaraiamu Iehova e tomadiho heniamu taudia na e moalemu.  Una siri bona siri ma haida ese lalogu e veria, heḡereḡere 1 Timoteo 1:11 na e gwaumu Iehova na “moale Diravana,” bona Efeso 5:1 be e tomu, “Dirava ba haḡoia.” Na laloparara namona na mai moalegu ida e Havaragu Tauna baina hesiai henia bona baina tenkiu henia una hahenamo dainai—egu mauri lalonai unu ḡau ruaosi baina karadia na mai anina bada.

A nohova gabuna amo a lao heniava kongrigeisin Chicago ai ena daudau na 32 kilomita. To hebou na dounu a laova, bona egu diba Baibul ai na e badava. Na helalotaomu hebou ta lalonai hakaua tauna ese Jetha e abia hidi baine haere. Ena haere na kamonaia neganai, na lalo: ‘Lau na mai dibagu. Lau danu imagu baina abia isi bona baina haere diba.’ Una nega amo lau na na heḡaeḡaeva bona egu haere na makava. Moale ḡauna na ai iboumai ai na lauma dalanai a goada. Lau na laḡani 1941 ai na bapatiso.

Laḡani 1942 Cleveland, Ohio hebouhebouna na doini na laloa taomu. Una hebouhebou na United States ena gabu 50 ai danu telefon amo e kamonaiva. Una neganai ai bona tadikaka taihu ma haida na tent ai a mahutava una hebou gabuna badinai. Una na Tanobada Tuarina Iharuana e varava negana, bona Iehova ena Witnes taudia e inai henidiava karana danu e badava. Adorahi ai tadikaka na itadiava edia motuka e tu’va neganai, motuka laitidia na dala e vaira heniava. Unu tadikaka iboudiai na e lalo tamona, motuka ta ta ai ta na baine noho hanuaboi ibounai lalonai. Bena hekwakwanai bae vara neganai, tadikaka ese motuka laitidia bae ha aradia bona bae kibi, unu amo raskolo na bae ha-daradaradia. Una na nega maorona heduru taudia vada baema. Na laloparara ‘Iehova’ ena taunimanima na ḡau iboudiai lalodiai e heḡaeḡaemu!’ Ḡau dikana ta se vara, bona na mamiava ḡau iboudiai na nanamo dainai, na mahuta namonamova.

Laḡani haida muridiai una hebouhebou na laloa loumu neganai, na dibamu sinagu na ḡau ta se lalohekwarahilaia bona se gari. Sinagu ese Iehova bona ena orea na e abidadama henidia momokaniva. Lau ese ena haheitalai namodia na basina lalodia boio dibamu.

Hebouhebou negana e lao heniava lalonai, sinagu ese regula painia ḡaukarana e hamatamaia. Una dainai, tadikaka ese edia tok ai ful-taim hesiai ḡaukara e herevalaiva neganai, ia na e hakala namonamova. A lou a laova ruma lalonai, ia na e gwa: “Lau na na uramu dounu baina painia, to una baina karaia bona umui baina narimui egu ai na auka.” Una dainai e noimai ia baia durua. Iboumai ai a lalotamona. Sinagu ese ḡaukara e henimai daiutu ta ta baia haḡoevadia, bona e hamaoromai daba anianina do asia abia neganai unu ḡaukara baia kara diba. A laova skul murinai, ia ese ruma e sekeava namo neganai, haroro gabuna e laova. Ia na ḡaukara momo hahinena, to nega iboudiai ai na e haeromaiva. Lunch bona adorahi ai ruma a laova negadiai, ia na hanaihanai nega e atova ai baine durumai. Dina haida skul e oreva muridiai ia a bamoava bona a harorova, una ese ai na e durumai painia ḡaukara a lalopararalaia.

Laḡanigu 16 neganai painia ḡaukara na hamatamaia. Ena be tamagu na do dia Witnes to egu hesiai ḡaukara na e moalelaiava. Adorahi ta ai na hamaoroa, ena be na hekwarahiva, to Baibul stadi ta do asina davaria. Bena na gwa: “O uramu baita stadi?” Egu hereva e laloa murinai egu noinoi e abia dae. Oibe, tamagu na egu Baibul stadi ginigunana. Lauegu ai una na hahenamo hereadaena!

Ai na “The Truth Shall Make You Free” bukana ai a stadiva. Emai stadi na e heau namonamova, una neganai na laloparara tamagu ese lau na e duruguva egu Baibul stadi ikarana dalana baina hanamoa bona ma haida baina hadibadia. Heḡereḡere, adorahi ta ai, paragraf ta a duahia ore murinai ia na e gwa: “Ina buka ai e hetore ḡauna na na lalopararamu, to oi be ede o diba tomamu ina buka ena hereva na maoro?” Una na asina heḡaeḡaelaia dainai, na gwa: “Ina na basina haerelaiamu, to eda stadi gabena ai haerena baina gwauraia.” Bona unu na kara toma. Una kaha e duruamu siridia na davari. Una murinai, hetahu karana na dibaia bona gabeai baia stadilai kahadia na na heḡaeḡaelai namonamova. Una ese e durugu, Baibul stiuden namona ai nala bona tamagu danu e durua. Baibul amo e diba ḡaudia na e badina, bona 1952 ai e bapatiso.

Laḡanigu 17 neganai, ruma na rakatania. Jetha a na misinari ḡaukaradia e karava, bona Don be betel ai e nohova. Edia asainmen na e moalelaiva. Una ese lau na e hagoadagu bada dainai betel bona Gilead Skul totona na aplai bena Iehova imanai na rakatania. Laḡani 1946 ai e boirigu betel nala.

Laḡani momo lalodiai, lau na Betel ai ḡaukara idauidau na karava dainai, ḡau matamatadia momo na diba. Laḡani 75 lalodiai Betel ai ini ḡaukara haida na kara, heḡereḡere buka iprintidia dalana bona account ḡaukarana e hadibagu. Danu, tano ma haida amo Betel ai baia ḡaukaralai kohudia ihoidia bona isiaidia daladia na diba. Bona hereadaena na, Betel ai morning worship bona program ma haida amo e halasimu Baibul edukeisin namona na moalelaia.

Lau na tadigu Karl ena amo danu diba na abi, ia na laḡani 1947 ai Betel ela. Ia na stiuden namona bona Baibul danu e hahedibalaia namonamova. Nega ta ai na noia baine durugu, egu tok baia heḡaeḡaelaia. Karl na hamaoroa, lau na refrens momo na davari to na hekwarahimu, edena baina ḡaukaralaia. Bena ia ese e nanadaigu, “Joel, emu sinado be dahaka?” Maoromaoro ena poin na vada na abia—lau na egu sinado e duruamu poinidia  mo baina herevalai to haidia na basina herevalai. Una na asina laloa boiomu.

Betel ḡaukara baita moalelaia totona, mai laloda idoinai ida haroro ḡaukara na hanaihanai baita karaia, bema unu baita kara tomamu ekspiriens momo baita davarimu. Adorahi ta, Bronx New York City ai e vara ḡauna ta na doini na laloa taomu. Tadikaka ta ida ala, The Watchtower bona Awake! e abi hahinena ta a vadivadia. Ladamai a gwaurai murinai, a gwa: “Hari adorahi ai, ai na Baibul ena hereva amo taunimanima a durudiamu.” Bena e gwa: “Bema una na Baibul ena hereva, ame vareai.” Ai ese Dirava ena Gavamani bona tanobada matamatana e herevalaiamu siridia haida a herevalai hebou. Una ese lalona e veria dainai, murina wikinai ala neganai, ia na turana momo e boiridia. Ia bona adavana na gabeai Iehova ena Witnes taudia ai ela.

Lalogu na hadaia baina headava. To, lau na laḡani 10 muridiai taihu namona ta na davaria. Dahaka ese e durugu una hahine namona na davaria? Una na Iehova enai na ḡuriḡurilaia, bona baia headava murinai baia kara hebou ḡaudia danu na lalova.

Laḡani 1953 hebouhebouna, Yankee Stadium ai taihu ladana Mary Aniol na davaria. Ia bona Jetha na Gilead skul ena klas iharuana ela taudia, bona Mary na lau taihugu ida gabu tamona ai misinari ḡaukaradia e karava. Mary na mai ena ura ida Caribbean ai ena misinari ḡaukara bona unu negadiai Baibul stadi e kara sivaraidia na lau e hamaorolaiguva. A hediba heheniva lalonai a laloparara, ai raruosi emai tahua ḡauna na tamona, ful-taim hesiai ḡaukara. Emai lalokau e goada dainai, April 1955 ai a headava. Dala momo ai Mary na harihari ḡauna Iehova ena amo bona ia na haheitalai namona. Ia ese e abiva asainmen idauidau na e moalelaiva. Ia na ḡaukara goada hahinena, mai momokanina ida haida e lalodia badava, bona ena mauri lalonai Iehova ena ura na e atoa gunava. (Mat. 6:33) Laḡani toi seket ḡaukaradia a kara bona laḡani 1958 ai e boirimai Betel ala.

Mary ena amo ḡau momo na diba. Heḡereḡere, a headava matama neganai ai na Baibul a duahia hebouva, nega iboudiai karoa ta amo siri 1 ela 15 a duahiva. Kahana ta a duahiava murinai, unu siri amo emai lalohadai a herevalaiva bona emai mauri ai baia badina daladia danu a herevalaiva. Mary ese Gilead bona ena misinari ḡaukarana ai e diba ḡaudia danu e herevalaiva. Iena amo na diba ḡaudia ese e durugu egu tok baina heni dalana bona taihu baina hagoadadia daladia na diba.—Her. 25:11.

Adavagu lalokauna Mary na laḡani 2013 ai e mase. Na narimu tanobada matamata ai ia baina itaia lou! Una nega na nariamu lalonai, na uramu ḡau momo baina diba, bona mai kudougu ibounai ida Iehova baina abidadama henia. (Her. 3:​5, 6) Tanobada matamatana ai Iehova ena taunimanima ese be karamu ḡaudia na lalomu ese tauhalo e henigumu bona e hamoalegumu. Momokani ḡau matamatadia momo baita dibamu bona Ihadibada Tauna Badana danu baita dibaiamu! Oibe, Iehova ese ḡau momo e hadibagu bona ena hebogahisi hereadaena dainai, ia na tenkiu heniamu.