Nicolas bona Céline ese e davaria hekwakwanaina be idau. Idia ese France brens amo asainmen ta e abia bona una na kongrigeisin matamatana ta baela. Idia na e gwa: “Matamanai a moale dikadika to gabeai turamai a readia. Danu kongrigeisin matamatana ai tadikaka bona taihu na do asia manadadia namonamo.” a Ena be unu hekwakwanai idauidau e varamu, to dahaka ba kara unu amo kongrigeisin matamatana ba durua bona ba moale diba? Haida be dahaka bae kara oi bae durumu totona? Bona ededia dala ai umui ese kongrigeisin matamatana ba hagoadaia bona una ese umui danu baine hagoadamui diba?

HAHEKAU HEREVADIA HANI ESE BAE DURUMU KONGRIGEISIN MATAMATANA BA MANADAIA

1. Iehova bavabidadama henia. (Sal. 37:5) Japan ai, taihu ta ladana Kazumi na kongrigeisin ta ai laḡani 20 bamona e noho, to adavana na ḡaukara matamatana ta e abia dainai una kongrigeisin e rakatania. Edena dala ai ia ese ḡau iboudiai na ‘Iehova imanai e ato’? Ia na e gwa: “Ḡuriḡuri amo Iehova enai egu lalohekwarahi iboudiai na gwauraiva neganai na mamiava ia ese goada e heniguva.”

Edena dala ai emu abidadama Iehova enai ba hagoadaia? Hadohado ḡaudia na tano namona ai e hadomu bona ranu e abimu neganai e tubu namonamomu, una heḡereḡerena eda abidadama baine goada totona ḡau haida baita kara na namo. Matamanai tame herevalaia tadikakana Nicolas ese Abraham, Iesu, bona Paulo edia haheitalai e lalodia dobu, ini tatau na ḡau momo e dadarai Dirava ena ura bae karaia totona, una dainai Nicolas na e abia dae momokani Iehova  ese ia na be durua dibamu. Bema hanaihanai Baibul bo stadilaiamu una ese be durumumu emu mauri ai e varamu sensi idauidau na bo haheaukalaimu, bona o diba ḡaudia na bo ḡaukaralaidiamu emu kongrigeisin matamatana bo hagoadaia dibamu.

2. Kongrigeisin matamatana na gunana ida basio haheḡereḡerea. (Koh. 7:10) Jules na Benin amo ela United States neganai, e davaria idia edia noho dalana na idau herea. Ia na e gwa: “Na hedavari henidiava taudia iboudiai ediai sivaraigu na gwaurai loulouva.” Una dainai ia na e urava sibona baine noho. To tadikaka taihu e dibadia namonamo murinai, ena lalohadai na e haidaua. Ia na e gwa: “Lau na laloparara, herevana oi na ede kaha bo laomu to taunimanima iboudiai na heḡereḡere. To edia hereva bona kara na i’idau. Namona na bavabia dae una na idia edia mauri.” Una dainai emu kongrigeisin gunana na matamatana ida basio haheḡereḡerea. Painia taihuna ta, Anne-Lise, na e gwa: “Lau nala badina na ḡau matamatadia baina dibadia, dia noho gabuna gunana ai na rakatani ḡaudia iboudiai na gabu matamatana ai baina davari dainai.”

Elda danu edia kongrigeisin matamatana na gunana ida basie haheḡereḡerea. Badina kongrigeisin matamatana ai tadikaka ese ḡau e karamu daladia na i’idau. Una ese se hahedinaraiamu idia na kerere. To aonega dalana na tadikaka taihu edia noho dalana ba dibaia guna, bena gabeai heduru herevadia ba gwaurai. (Koh. 3:​1, 7b) Emu haheitalai namona amo tadikaka ba durudia, a dia ba doridia emu lalohadai bae abi dae.—2 Kor. 1:24.

3. Emu kongrigeisin matamatana ai ba bisi. (Fili. 1:27) Gabu matamatana ta bo laomu na mai hekwarahina bona emu nega bada bo ḡaukaralaiamu, to namona na kongrigeisin heboudia baola na mai anina bada. Unu amo kongrigeisin matamatana ai tadikaka taihu ese bae dibamu bona bae durumu diba. Taihu ta ladana Lucinda na natuna kekenidia rarua ida South Africa ena siti badana ta ela neganai, ia na e gwa: “Turagu ese e hagoadagu kongrigeisin matamatana ai tadikaka taihu baina dibadia namonamo, anina na baia haroro hebou, bona hebou negadia ai baia haere. Danu tadikaka a hadibadia emai ruma ai haroro grup bae abia diba.”

Emu kongrigeisin matamatana ai tadikaka bona taihu ida tiokratik ḡaukaradia bo kara heboumu neganai, ta ta bo hahegoada hehenimu. Matamanai tame herevalaia taihuna Anne-Lise, na elda ese e hagoadaia kongrigeisin taudia ida baine haroro. Bena dahaka e vara? Ia na e gwa: “Una na kongrigeisin taudia ba dibadia dalana namona ta.” Danu Kingdom Hall ihaḡoevana bona ihanamona ḡaukaradia ai bo hedurumu neganai, bo hahedinaraiamu emu kongrigeisin matamatana na o moalelaiamu. Unu bo kara tomamu neganai tadikaka bona taihu na turamu namodia ai be laomu, bona bo hemamimu idia na emu ruma bese ta na heto.

 4. Ma haida ba hetura henidia. (2 Kor. 6:​11-13) Ma haida ba hetura henidia dalana ta na edia namo ba lalo bada, hebou vairanai bona murinai nega baita ato ma haida ida baita hedavari. Baita hekwarahi ta ta ladadia baita diba. Bema taunimanima ladadia bo lalotaomu bona bo kara namo henidiamu neganai, idia ese oi na be dibamu namonamomu bona umui na tura namodia ai bo laomu.

Tadikaka bona taihu ese bae dibamu namonamo totona, ḡau haida ba kara hebou. Lucinda amo ḡau ta ta dibamu, ia na e gwa: “Ai ese tura namodia a davari badina matamanai ai ese ma haida a boiridia emai ruma ema.”

“BA HEABI-DAE HEHENI”

Haida na edia nega ginigunana Kingdom Hall ai e vareaimu neganai e garimu. To idia be ede baita kara henidia toma? Aposetolo Paulo na e gwa: “Ba heabi-dae heheni, Keriso ese umui e abimui dae heḡereḡerena.” (Roma 15:7) Elda taudia ese Keriso bae tohotohoa dalana ta na, matamatadia bae welkam henidia. (Maua ba itaia “ Dahaka ese Bae Durumu Emu Kongrigeisin Matamatana Ba Moalelaia.”) To, kongrigeisin taudia iboudiai, natu danu ese ḡau haida bae kara matamatadia bae welkam henidia.

Ma haida baita welkam henidia dalana ta na eda ruma ai baita abidia dae bona idia idurudia karadia haida ma baita kara. Heḡereḡere, taihu ta na nega e ato taihu matamatana ta na taoni ai e loalaia bona basi iabidia dalana e hadibaia. Una taihu ena kara ese taihu matamatana e durua gabu matamatana baine manadalaia.

LAUMA DALANAI BA GOADA DIBA

Kwadi na e bada e laomu lalonai kopina gunadia na e koki louloumu, unu amo baine roho diba. Una heḡereḡerena, ta na kongrigeisin matamatana e laomu neganai, ia ese lalohekwarahi ḡaudia baine koki guna, unu amo Iehova baine hesiai henia diba. Nicolas bona Céline na e gwa: “O nohomu gabuna amo ma bo laomu gabu matamatana  na treinin namona, badina ai ese taunimanima idaudia a dibadia bona gabu idauna a manadalaia dainai, una ese e durumai kara namodia ma haida baia hahedinarai.” Matamanai tame herevalaia tadikakana Jean-Charles, na ena ruma bese ese namo e davaria dalana na ini e herevalaia toma: “Emai kongrigeisin matamatana ai, natumai na lo taudia ai ela bona edia hetura karana Iehova ida na e goada. Hua haida muridiai natumai kekenina na midwik hebouna ai asainmen e abi, a natumai merona be bapatiso lasi pablisa ai ela.”

Bema emu noho dalana dainai oi na gabu ma ta baola na auka, dahaka ba kara diba? Ina atikol ai tame herevalai heduru herevadia na emu kongrigeisin ai ba badina diba. Iehova enai ba tabekau, bona emu kongrigeisin ida palani ba kara haroro ai ba ḡaukara hebou, bona tura matamatadia ba tahu, eiava turamu ba dibadia namonamo. Eiava heduru daladia ba tahu unu amo matamatadia eiava dabu taudia ba durudia totona. Kristen korikori edia kara badana na lalokau. (Ioa. 13:35) Bema una kara amo ma haida baita durudiamu ita na Iehova kahirakahira baita lao dibamu. Namona na bavabia dae “Dirava ese helaḡa karadia enehetomadia e moalelaimu.”—Heb. 13:16.

Ena be Kristen taudia momo na kongrigeisin matamatadia ela neganai, hekwakwanai na e davari to e moale bona ḡau momo e kara. Emu ai danu baine vara diba! Anne-Lise na e gwa: “Egu kongrigeisin na haidaua neganai una ese e durugu ma haida baina hetura henidia diba.” Kazumi danu e gwa: “Kongrigeisin matamatana bo laomu neganai, oi ese so lalomu daladiai Iehova ena heduru bo mamiamu.” Bona Jules ena hemami be ede bamona? Ia na e gwa: “Egu kongrigeisin matamatana ai, tura momo na davari bona idia na egu ruma bese ta bamona, danu irakatanidia na auka.”