KARA havara tanobadana ai ta nohomu dainai, namona na baita ḡaukara goada maino ai baita noho. To danu, ena be maino ai ta nohomu, nega momo una kara baita hahedinaraia na auka. Edena dala ai Dirava ena Hereva ese baine duruda maino korikorina eiava mia hanaihanai mainona baita abia? Bona edena dala ai ma haida baita durudia unu bae kara toma?

Baita noho namonamomu bona baita moalemu neganai, maino korikorina baita abia dibamu. Danu, ma haida ida eda hetura karana baita hagoadaia na namo. Mia hanaihanai mainona baita abia totona, ḡau badana na eda hetura karana Dirava ida baita hagoadaia. Edena dala ai una baita karaia diba?

Iehova ena kara maoromaoro taravatudia bona ena hahekau herevadia baita badinamu neganai, baita hahedinaraiamu ita na Ia ta abidadama heniamu bona ta uramu eda hetura karana ia ida baita hagoadaia. (Ier. 17:7, 8; Iak. 2:22, 23) Unu amo, Ia na turada ai be laomu bona lalomaino be henidamu. Isaia 32:17 na e gwaumu: “Kara maoromaoro anina na maino, bona kara maoromaoro amo laḡa-ani bona heabidadama bae hesiriu hanaihanai.” Mai kudouda idoinai ida Iehova baita badinaiamu neganai, lalomaino korikorina baita abia dibamu.​—Isa. 48:18, 19.

Danu, Tamada guba ai ese e heni harihari ḡauna hereadaena​—iena lauma helaḡa​—ese baine duruda mia hanaihanai mainona baita abia.​—Kara 9:31.

Maino na aposetolo Paulo ese e herevalaia “lauma huahuana” ihatoina. (Gal. 5:22, 23) Maino korikorina na Dirava ena lauma ese e havaraiamu dainai, lauma helaḡa ese baine hakauda na namo una kara baita hahedinaraia totona. Dirava ena lauma ese baine duruda maino baita abia daladia rua mani aita lalodia.

 Ginigunana na, Dirava ena Hereva baita duahia hanaihanai karana ese baine duruda maino baita abia totona. (Sal. 1:2, 3) Baibul ena hereva baita laloa dobumu neganai, Dirava ena lauma ese be durudamu ḡau iboudiai lalodiai Iehova ena lalohadai baita lalopararalaiamu. Heḡereḡere, baita dibamu edena dala ai ia na maino ai e nohomu bona dahaka dainai maino karana na e laloa badamu. Dirava ena Hereva amo unu ta diba ḡaudia baita badinamu neganai, eda mauri lalonai maino ai baita nohomu.​—Her. 3:1, 2.

Iharuana na, Dirava ena lauma helaḡa baita noia na namo. (Luka 11:13) Iehova na e gwauhamata bema ena heduru baita noia, “Dirava ena maino, eda diba idoinai e hereaiamu mainona, ese [laloda] bona [darada] baine gima, Keriso Iesu lalonai.” (Fili. 4:6, 7) Hanaihanai Iehova ena lauma helaḡa baita noiamu neganai, eda Dirava ese lalomaino be henidamu, una maino na ia e hetura heniamu taudia mo e henidiamu.​—Roma 15:13.

Edena dala ai haida ese una sisiba Baibul ai e badinaia bona edia kara e haidau unu amo mia hanaihanai mainona​—Iehova ida, idia sibodia, bona ma haida ida​—e abia?

Hari ina negai, Kristen kongrigeisen ai haida na guna ‘badu taudia,’ to hari idia ese ma haida e lalodiamu, kara namodia e hahedinaraimu, e haheaukamu, bona maino ai e nohomu. * (Her. 29:22) Tadikaka ta bona taihu ta ediai una na e vara, e durudia badu karana e hahanaia unu amo ma haida ida maino ai e noho.

David na lalohadai kereredia e abiva dainai ena hereva amo ma haida e hadikadiava. Dirava enai ena mauri do se gwauhamatalaia neganai, nega momo ma haida e gwauraidia dikava bona ena ruma bese na e hereva auka henidiava. Gabeai, e laloparara ena lalohadai baine haidaua bona maino tauna ai bainela na namo. Edena dala ai maino e abia? Ia na eto: “Egu mauri ai Baibul ena hahekau herevadia na badina matama dainai, lau bona egu ruma bese na a hemataurai heheniva.”

Rachel na ena noho dalana ese ena kara e haidaua. Ia na eto: “Ema bona hari, lau na na hekwarahimu egu badu baina biagua badina egu ruma bese na badu momo taudia.” Dahaka  ese e durua dainai maino e abia? Ia na e haere, “Ḡuriḡuri karana amo Iehova enai na tabekaumu.”

David bona Rachel edia haheitalai ese e hahedinaraiamu Baibul ena hahekau herevadia baita badinamu bona Dirava ena lauma helaḡa ena heduru ai baita tabekaumu neganai, maino baita abia dibamu. E hahedinaraia ḡoevaḡoevamu, ena be tanobada oromana dikana ai ta nohomu, to lalomaino baita abia diba, unu amo eda ruma bese bona Kristen tadikakadia ida lalotamona ai baita noho. Iehova ese e hadibadamu “taunimanima iboudiai ida” baita noho mai mainoda ida. (Roma 12:18) Una baita karaia diba, a? Bona maino ikarana totona baita ḡaukara goadamu neganai dahaka hahenamo baita abimu?

Eda haroro ḡaukara amo, taunimanima ta boiridiamu Dirava ena Basileia ena sivarai namona amo namo bae abia. (Isa. 9:6, 7; Mat. 24:14) Ta moalemu badina momo na e kamonaimu. Una dainai, asie lalometau momomu eiava e varamu ḡaudia daidiai asie badumu. To, helaro korikorina e dibamu dainai, una ese e hagoadadiamu ‘maino bae tahua, bona bae ḡavaia.’​—Sal. 34:14.

Ena be momo na asie uramu eda haroro herevana bae abia dae. (Ioa. 3:19) To, Dirava ena lauma helaḡa ese e durudamu dainai sivarai namona na mai mainoda bona hematauraida ida ta herevalaiamu. Unu amo Iesu ese haroro ḡaukara totona e heni hahediba herevana ta badinaiamu, una na Mataio 10:11-13 ai, eto: “Ruma na ba raka vareai negana ai na ba hanamoa; bena ruma na baine namo, emui maino ia latanai bavatoa kau, a basine namo, emui maino na bavabia lou.” Iesu ena hereva baita badinaiamu neganai, mai mainoda ida ruma tauna baita rakatania dibamu bona baita abia daemu nega ta ia na be kamonaimu.

Danu, gavamani taudia​—eda ḡaukara e kouamu taudia danu​—na hemataurai dalana ai baita hereva henidiamu neganai, maino ai baita nohomu. Heḡereḡere, Africa tanona ta ena gavamani ese tomadiho dainai heinai heheni karana na e abia dae unu amo idia ese gwaumaoro na basie heni Kingdom Hall bae hagini totona. Una hekwakwanai ihamaoromaorona totona, una Africa tanona ai guna misinari ḡaukara e karaiava tadikakana ta ese una tano ena High Commissioner e vadivadia London, England ai. Badina e urava Iehova ena Witnes edia ḡaukara namona baine herevalaia. Bena dahaka e vara?

Tadikaka na eto: “Risepsen ai na vareai neganai, risepsen hahinena ena heḡoeva dalana amo na diba ia na lau na dibaia gadona hanuana ta amo. Una dainai ena gado ai na hanamoa. Ia na e hoa, bena e nanadaigu, ‘Dahaka dainai oma?’ Mai hematauraigu ida na hamaoroa lau na na urava edia High Commissioner baina itaia. Ia ese una tau e rini henia, bena una tau na ema lau e hedavari henigu bona ena gado ai e hanamogu. Una murinai, lau ese Witnes taudia edia ḡaukara namona na herevalaia neganai, ia na e kamonai namonamo.”

Una tadikaka na mai hematauraina ida eda ḡaukara e herevalaia dainai, commissioner na lalohadai maorona e abia bona eda ḡaukara na e abia dae. Dina haida muridiai, una Africa tanona ena gavamani ese Kingdom Hall ihaginidia totona e ato taravatudia na e koki. Una maino karana dainai tadikaka na e moale dikadika! Momokani, mai hematauraida ida ma haida baita kara namo henidiamu neganai hahenamo namodia momo baita davarimu​—maino danu.

Hari ina negai, Iehova ena taunimanima na maino ai e nohomu. Una maino na ba habadaia diba bema ba ḡaukara goada emu mauri lalonai una lauma huahuana ba hahedinaraia. Mai anina bada ḡauna na, Iehova ena lalonamo bo abiamu bona Dirava ena tanobada matamatana ai maino ai bo noho hanaihanaimu.​—2 Pet. 3:13, 14.