1. Dahaka dainai tauhalo baita abi na namo?

ITA iboudai ese tauhalo baita abi na namo. Reana eda mauri lalonai ta lalohekwarahimu bona ta hisihisimu. Eiava ta burukamu, ta goreremu, o eda lalokau tauna ta e mase dainai ta lalometaumu. Bona daḡedaḡe karadia na e badamu. Momokani, ini “nega dikadia” ese e hahedinaraiamu ita na “dina gabedia ai” ta nohomu bona tanobada matamatana na kahirakahira be varamu. (2 Tim. 3:1) To, Iehova ena gwauhamata bae ḡuḡuru totona reana nega daudau lalonai vada tame nari, bona eda hekwakwanai na e bada e laomu. Una dainai tauhalo be edeseni ai baita abimu?

2, 3. (a) Habakuku be daika? (b) Dahaka dainai Habakuku bukana baita herevalaiamu?

² Haere baita diba totona, mani Habakuku bukana aita herevalaia. Ena be Baibul ese Habakuku ena mauri bona e kara ḡaudia maraḡi-maraḡidia iboudiai na se herevalai, to Habakuku ese e torea bukana na ita e hagoadadamu. Reana ia ladana anina na “Rosia.” Una na vaitani Iehova ese ia e tomadiho heniamu taudia na e rosidiamu, taudia baine halo totona, eiava idia  na ia enai e tabekaumu karana e herevalaiamu. Habakuku na henanadai haida Dirava e henia. Baita gwau dibamu, Habakuku na ita daidai e henanadai, badina Iehova ese ena lauma helaḡa amo e durua e gwaurai herevadia baine toredia.​—Hab. 2:2.

³ Baibul ese Iehova bona e lalohisihisi peroveta tauna Habakuku edia herevahereva karana e hahedinaraia. Buka Helaḡa ai Habakuku bukana na “e tore guna ḡaudia” kahana ta, bona unu ese “haheauka bona tauhalo bae havara, ela bona helaro baita davaria.” (Roma 15:4) Habakuku bukana ese ede baine duruda toma? Be durudamu Iehova iabidadama henina karana anina baita lalopararalaiamu. Danu, Habakuku ena peroveta herevadia ese e hadibadamu, hisihisi bona hekwakwanai negadia ai lalomaino baita abi diba. Mani Habakuku bukana aita herevalaia.

4. Dahaka dainai Habakuku na e lalohisihisi?

⁴ Habakuku 1:2, 3 ba duahi. Habakuku na nega aukadia lalodiai e nohova. Ia na e lalohisihisi badina taunimanima na kara dika bona daḡedaḡe karadia e ura heni badava. Edia kara dikadia be edena nega ai bae ore? Dahaka dainai Iehova na kara ta se karaia haraḡa? Habakuku ese taunimanima edia hahemaoro kereredia bona daḡedaḡe karadia e itava. E mamiava ia na asi iduruna. Una dainai Iehova e noia kara ta baine karaia. Reana Habakuku na e mamiava Iehova ese se laloava. Bona toana na Dirava na kara ta basine karaia haraḡamu. Oi danu nega haida unu o hemami tomamu, a?

5. Habakuku bukana amo dahaka mai anina bada ḡauna ta dibamu? (Rau 13 ai laulau ba itaia.)

⁵ Habakuku be Iehova se abidadama henia, a? Dirava ena gwauhamata be e lalodia boio, a? Lasi! Habakuku ena lalohekwarahi na Iehova e hamaorolaia, dia taunimanima, una amo e hahedinaraia Habakuku na dounu Iehova e abidadama heniava. Ia na e daradara badina se lalopararava dahaka dainai Iehova na kara ta do se karaia haraḡa. Dirava ena hahekau henunai, Habakuku ese e lalohekwarahilaiva ḡaudia na Baibul ai e tore, bona una dala amo Iehova ese e hadibadamu, namona na basita gari to eda lalohekwarahi eiava daradara ḡaudia na ia baita hamaorolaia. Momokani, e noidamu lalodai e miamu ḡaudia iboudiai baita gwaurai hedinarai. (Sal. 50:15; 62:8) Hereva Lada-isidia 3:5 na e gwaumu: “Iehova bavabidadama henia mai lalomu idoinai; sibomu emu lalo-parara basio abidadama henia.” Habakuku na mai dibana una hereva, bona ena mauri ai e badinaia.

6. Dahaka dainai ḡuriḡuri na mai anina bada?

⁶ Habakuku na Iehova e raka henia kahi, Turana bona Tamana ai e halaoa. Habakuku na ena hekwakwanai mo se lalo eiava sibona ese se hamaoromaorodia toho. To ena hemami bona lalohekwarahi na Dirava enai e ḡuriḡurilai, unu amo haheitalai namona e hahedinaraia. Danu, Iehova, ḡuriḡuri ikamonaina Diravana, na ita e noidamu eda lalohekwarahi ia baita hamaorolaia, unu amo baita hahedinaraia Ia ta abidadama heniamu. (Sal. 65:2) Unu baita kara tomamu neganai, Iehova ese eda ḡuriḡuri be haerelaiamu dalana baita itaiamu, bona ena lalokau baita mamiamu. (Sal. 73:23, 24) Herevana dahaka hekwakwanai baita davari, Ia ese be durudamu eda hekwakwanai e laloamu dalana baita lalopararalaia. Mai kudouda idoinai ida baita ḡuriḡuri, unu amo eda abidadama Dirava enai ta hahedinaraiamu.

7. Habakuku ese ena lalohekwarahi e gwaurai neganai, Iehova be dahaka e kara?

⁷ Habakuku 1:5-7 ba duahi. Habakuku ese ena lalohekwarahi na Iehova enai e taho kau murinai, reana Iehova ese baine karaia ḡauna e laloa. Iehova na ma haida edia hemami e lalomu bona e lalopararalaidiamu Diravana dainai, Habakuku na se gwau henia. Dirava na mai dibana Habakuku na e dara doko dainai ia enai heduru e noi. Una dainai Iehova ese gwau-edeede Iuda taudia ediai baine vara ḡauna na ia e hadibaia. Iehova ese Habakuku e hamaoroa, daḡedaḡe karadia na kahirakahira baine haoredia, reana Habakuku na una sivarai e kamonaia tauna ginigunana.

8. Dahaka dainai Iehova ese e herevalaia ḡauna dainai Habakuku na e hoa?

⁸ Iehova ese Habakuku e hadibaia ia na vada heḡaeḡae kara ta baine karaia. Una gwau-edeede besena na edia kara dikadia daidiai Dirava ese davadia baine heni. Iehova ese ina hereva “emui nega ai” amo e hahedinaraia iena hahemaoro karana na Habakuku eiava ena negai e nohova peroveta taudia edia nega ai baine vara. Iehova ese e herevalaia ḡauna na Habakuku ese se laloa ḡauna. Una be ena noinoi haerena, eiava? Iehova ese e hamaoroa herevana anina na Iuda taudia iboudiai edia hisihisi na baine bada herea. Kaldea taudia (Babulono taudia) na daḡedaḡe taudia, edia kara ese Habakuku ena taunimanima​—Iehova ena taravatu e dibaia taudia​—edia daḡedaḡe karadia na e hereadia. Dahaka dainai Iehova ese dirava koikoi e tomadiho henia besena e ḡaukaralaia ena taunimanima e hahemaoro henidia? Bema oi na Dirava ese e gwauraia herevana boma kamonai, dahaka boma kara?

9. Habakuku be dahaka henanadai ma haida e gwaurai?

⁹ Habakuku 1:12-14, 17 ba duahi. Habakuku na e laloparara Iehova ese Babulono taudia baine ḡaukaralaidia kara dika taudia baine hahemaoro henidia bona davadia baine heni, to Habakuku na dounu e daradarava. To mai manauna ida eto, Iehova na ena “Nadi-ginina.” (Deu. 32:4; Isa. 26:4) Habakuku na mai haheaukana ida Iehova ena lalokau bona hebogahisi karana e abidadama henia. Una dainai se gari Iehova baine nanadaia lou. Dahaka dainai Dirava ese Iuda ai e varava kara dikadia na se koudia? Dahaka dainai kara ta se karaia haraḡa? Dahaka dainai Siahu Idoinai Diravana ese kara dikadia e karava taudia na e raraidia tao? Kara dika taudia e hutumava neganai, dahaka dainai Ia na ‘asi reḡereḡena’? Ia na “Helaḡa Diravana,” bona ‘ia matana na ḡoeva-dae dainai, kara dika basine itaia.’

10. Dahaka dainai eda hemami na Habakuku ena heḡereḡerena?

¹⁰ Nega haida, eda hemami na Habakuku ena heḡereḡerena. Iehova ta kamonai heniamu. Mai eda abidadama ida ena Hereva ta duahiamu bona ta stadilaiamu, bona una ese helaro e henidamu. Ena orea amo ena gwauhamata herevadia e hadibadamu. To reana baita lalomu, ‘Eda hisihisi be edena negai bae ore?’ Habakuku ena kara ma ta amo dahaka ta dibamu?

11. Habakuku na Iehova ena hereva e kamonai murinai, dahaka e kara?

¹¹ Habakuku 2:1 ba duahia. Habakuku na Iehova ida e herevahereva neganai lalomaino e abia. Una dainai lalona e hadaia Iehova baine naria kara ta baine karaia totona. Una na nega bada lalonai e lalohadailaia ḡauna, badina ena hereva ma ta ai, eto: “Asi reḡereḡegu  hekwakwanai dinana baina naria.” (Hab. 3:16) Dirava e hesiai heniava taudia haida danu una haheauka karana e hahedinaraia, una ese e hagoadadamu basita hesiku to Iehova baita naria kara ta baine karaia totona.​—Mika 7:7; Iak. 5:7, 8.

12. Habakuku amo dahaka ḡau ma haida ta dibamu?

¹² Habakuku ese e karaia karana amo dahaka ta dibamu? Ḡau ginigunana na, Iehova iḡuriḡuri henina karana na basita hadokoa, ena be hahetoho idauidau baita davari. Ḡau iharuana na, Iehova ese ena Hereva bona orea amo e hamaorodamu ḡaudia baita kamonai na namo. Ḡau ihatoina be, mai eda haheauka ida Iehova baita naria, bona baita abidadama ia ese ena nega korikori ai eda hisihisi iboudiai baine haoredia. Bema ḡuriḡuri amo Iehova baita hereva heniamu bona baita kamonai heniamu, Habakuku heḡereḡerena lalomaino baita abiamu, una ese be durudamu baita haheauka totona. Eda helaro ese be durudamu baita haheaukamu bona baita moalemu, herevana dahaka hekwakwanai baita davarimu. Danu una helaro dainai baita abia daemu Tamada guba ai ese kara ta do baine karaia.​—⁠Roma 12:12.

13. Habakuku 2:3 ai dahaka hahegoada herevana mia?

¹³ Habakuku 2:3 ba duahia. Iehova na e moale Habakuku enai badina lalona e hadaia Iehova baine naria. Siahu Idoinai Diravana na mai dibana Habakuku na e lalometauva. Una dainai, e hagoadaia bona e hadibaia ena henanadai na baine haerelai. Se daudau Iehova ese Habakuku na e durua. Vaitani Iehova ese Habakuku e hamaoroa: “Ba haheauka, bona bavabidadama henigu. Emui ḡuriḡuri na do baina haerelaidia, ena be bo nari daudaumu!” Iehova ese Habakuku e hadibaia Iena gwauhamata baine haḡuḡuru negana na vada e abia hidi. Una dainai e hagoadaia dounu baine nari. Gabeai, peroveta tauna na e moale.

14. Hekwakwanai negadia ai dahaka baita kara?

¹⁴ Mai eda haheauka ida Iehova baita naria bona e hadibadamu herevadia baita badina na namo, una ese baine duruda hekwakwanai negadiai lalomaino baita abia totona. Iesu ese e hagoadadamu, Iehova, Nega Inarina Tauna Hereadaena baita abidadama henia, bona do se gwaurai “dinadia bona negadia” na basita lalohekwarahilai. (Kara 1:7) Una dainai, basita hesiku to baita manau, baita abidadama, baita haheauka, bona eda nega baita ḡaukaralaia namonamo Iehova baita hesiai henia.​—Mar. 13:35-37; Gal. 6:9.

15, 16. (a) Habakuku bukana ese e gwaurai gwauhamatadia be dahaka? (b) Unu gwauhamata amo dahaka ta dibamu?

¹⁵ Iehova e abidadama heniamu kara maoromaoro taudia na Ia ese ini e gwauhamata e henidia toma: “Kara maoromaoro tauna na ena heabidadama dainai baine mauri,” bona “tanobada na Iehova hairaina idiba-maorona amo baine honu.” (Hab. 2:4, 14) Oibe, mai edia haheauka ida Dirava e abidadama heniamu taudia na ia ese mauri hanaihanai baine henidia.

¹⁶ Habakuku 2:4 ai e gwauraia gwauhamatana na mai anina bada dainai, aposetolo Paulo na ena revareva ai nega toi e gwauraia. (Roma 1:17; Gal. 3:11; Heb. 10:38) Ena be kara maoromaoro tauna na hekwakwanai idauidau e davarimu, to Iehova e abidadama heniamu dainai, Dirava ena gwauhamata iboudiai bae ḡuḡuru negana na baine itaia. Iehova na e uramu eda helaro baita laloa bada.

17. Habakuku bukana ese dahaka hahegoada herevana e hadibadamu?

 ¹⁷ Ini dina gabedia ai Habakuku bukana ena hereva na mai anidia bada. Iehova na e gwauhamata Ia bae abidadama henia kara maoromaoro taudia na mauri hanaihanai baine henidia. Una dainai, ena be baita lalohekwarahi eiava baita lalometau, to namona na hanaihanai eda abidadama Dirava enai baita hagoadaia. Iehova ese Habakuku ena amo e gwauraia herevana ese e hadibadamu, Ia ese baine duruda bona baine hamauridia. Ia ese e noidamu baita abidadama henia bona ena Basileia ese tanobada baine lohiaia negana na mai eda haheauka ida baita naria. Una nega ai, ia e tomadiho heniamu taudia ese tanobada bae hahonua bona bae moalelaia.​—Mat. 5:5; Heb. 10:36-39.

18. Edena dala ai Iehova ena hereva ese Habakuku e durua?

¹⁸ Habakuku 3:16-19 ba duahi. Iehova ena hereva ese Habakuku na e hagoadaia. Iehova ese guna ena taunimanima daidiai e kara ḡaudia na Habakuku ese e lalodia dobu. Una ese ena abidadama e hagoadaia. E diba Iehova na kahirakahira kara ta baine karaia! Una ese e hagoadaia, ena be mai dibana e davari hisihisidia na basie ore haraḡa. Habakuku na se daradara, to mai moalena ida Iehova e abidadama henia badina e diba do baine hamauria. Siri 18 ai e gwauraia herevana ese ena abidadama e hahedinaraia, eto: “Lau ese Iehova baina moalelaia, ihamaurigu Diravana baina moalelaia.” Una na mai anina bada herevana ita edai! Iehova na ena gwauhamata namodia mo se hadibada, to danu e hadibadamu kahirakahira ia ese unu gwauhamata na be haḡuḡurudiamu.

19. Edena dala ai Iehova ese baine hagoadada diba, Habakuku enai e kara heḡereḡerena?

¹⁹ Habakuku ena amo ta dibaiamu hereva badana na, Iehova baita abidadama henia. (Hab. 2:4) Iehova baita abidadama henia totona eda hetura karana ia ida baita hagoadaia na mai anina bada. Namona na (1) hanaihanai eda lalohekwarahi na ḡuriḡuri amo Iehova baita hamaorolaia; (2) Iehova ena Hereva bona ena orea amo ta abimu hahekau herevadia baita badina; bona (3) mai eda abidadama bona haheauka ida Iehova baita naria. Habakuku na unu e kara toma. Ena be ena buka matamana ai ena lalohisihisi herevadia e tore, to una buka dokonai ena moale bona hahegoada herevadia e tore. Namona na Habakuku baita tohotohoa, unu amo Iehova ena lalokau baita mamia. Ina nega dikana lalonai una na hahegoada herevana!