Hulda ese Ena Tahua Ḡauna E Haḡuḡurua
INDONESIA ai taihu tatoi na motumotu maraḡina ta ladana Sangir Besar ai e nohomu, laḡani haida gunadiai, idia na kone ai e ḡaukarava. Una motumotu ai momo na mai dibadia idia na taunimanima e durudiamu Baibul bae lalopararalaia totona. To idia na ma ḡaukara idauna ta danu e karaiava.
Sangir Besar Motumotuna Indonesia ena not kahanai
Unu taihu tatoiosi na davara ai nadi badadia e gogova bena e daelaiva kone. Nadi haida edia bada na soccer bolona na heto. Nadi e gogova murinai, edia sea ai e helaiva bena hammer amo unu nadi e hamakohi maraḡi-maraḡiva. Una murinai nadi na pakesi ai e udava bena vada amo e hua daeva. Bena baege badadia ai ma e uda hanaiva bona dala e karava taudia ese motuka amo e ha udava bena dala e karalaiva.
Hulda na kone ai nadi e gogomu
Unu taihu tatoiosi padadiai ta ladana na Hulda. Ena nega bada na una ḡaukara e karaiava badina una ḡaukara amo e abiava monina amo ena famili e haerodiava. To hari ia na mai ena tahua ḡauna ta. Ia na e ura tablet ta baine hoia, unu amo JW Library® app baine ḡaukaralaia. Hulda na dibana una app ai vidio idauidau bona ma ḡau haida ese baine durua, ena haroro ḡaukara baine hanamoa bona Baibul baine lalopararalaia namonamo.
Hua ta mai kahana lalonai, Hulda na daba iboudiai hora rua e ḡaukarava, bona e hamakohiva nadidia na heḡereḡere motuka maraḡina ta baine hahonua diba. Una ḡaukara amo e davaria monina amo tablet ta e hoia.
Hulda na ena tablet e dogoatao
Hulda na e gwa, “Ena be una ḡaukara dainai tauanigu na e hisihisiva, to una tablet matamatana na haroro ḡaukara ai bona hebou ḡaudia iheḡaeḡaelaidia ai na ḡaukaralaia neganai, hisi iboudiai na lalodiaboio.” Bona ma e gwa, pandemic e hematama neganai una tablet ese e durua ena kongrigeisin ida e haroro bona e hebou. Ta moalemu badina Hulda ese ena tahua ḡauna na e haḡuḡurua.
