Dubu helaḡa dehena na Helaḡa gabuna ena raka vareai kahana. Laḡani 2023 vairanai e halasi New World Translation of the Holy Scriptures Baibul ai e gwa: “Vaira kahana dehena ena lata na 20 kiubit, dubu lababana heḡereḡerena; bona harana ena height be 120 kiubit.” (2 Sis. 3:​4, NWT-E) Baibul ma haida ai una dehe ena height na e gwauraia “kiubit 120,” una na 53 mitas (175-ft)!

To, laḡani 2023 ai e printia New World Translation Baibul ai na e gwa Solomon ena dubu dehena harana ena height “na 20 kiubit,” eiava 9 mita (30 ft). a Mani una e haidaua badidia haida aita herevalai.

Hanua Pavapavadia Ginigunana 6:3 ese dehe harana ena height na se gwauraia. Una siri ai Ieremia na una dehe ena height bona lababana mo e gwauraidia, to ia harana ena height na se gwauraia. Bena karoa 7 ai, ia ese dubu kahana haida e herevalaidia, heḡereḡere kopa disi badana, treila 10, bona dehe vairana kahana ai kopa du badadia rua. (1 Han. 7:​15-37, NWT) Bema dehe harana ena height na 50 mita bona dubu na e ha hanaia, dahaka dainai Ieremia ese ena height na se gwauraia? Laḡani momo muridiai danu, Iuda edia histri itorena taudia na e gwa una dehe harana ena height ese Solomon ena dubu helaḡa na se ha hanaia.

Diba bada taudia ese e daradaralaia ḡauna na, dubu helaḡa habana ese una dehe (120 kiubit) be ede bema dogoatao toma. Idaunegai nadi bona biriki amo e haginiva ḡaudia na la’lata he’herea, heḡereḡere Aigupito ai e hagini dubu maḡudia badidia be lababa bona doridia be mamaraḡi. To, Solomon ese e haginia dubu helaḡana be idau. Diba bada taudia na e laloamu una dubu habana udunadia (thickness) na kahirakahira 6 kiubit, eiava 2.7 mita (9 ft). Theodor Busink, idaunega ai e haginiva rumadia e stadilaiva tauna, na e gwa: “Una dubu [raka vareaina] habana udunana (thickness) baita haeroamu neganai, baita gwau dibamu una dubu dehena harana ena [height] na dia 120 kiubit.”

Toana na 2 Sisiga 3:4 na e tore hanai kerere. Ena be manuscript gunadia lalodiai una siri ai na “120” e torea, to buka haida heḡereḡere, Codex Alexandrinus laḡani 1,500 gunanai e torea bukana bona Codex Ambrosianus laḡani 1,400 gunanai e torea bukana lalodiai na e gwa, “20 kiubit.” Dahaka dainai toretore tauna ese “120” e torea? Badina Heberu gado ai ini hereva “hanred” bona “kiubit” toadia na heḡereḡere. Una dainai reana toretore tauna na “kiubit” gabunai “hanred” e torea.

Momokani, ena be ta uramu Solomon ena dubu helaḡa toana baita lalopararalaia namonamo, to baita laloa bada ḡauna na una dubu helaḡa ese e laulaulaia ḡauna—una na lauma dubuna badana. Ta moalemu badina Iehova ese ia e hesiai heniamu taudia iboudiai na e boiridia una dubu ai Ia bae tomadiho henia!—Heb. 9:​11-14; Apok. 3:12; 7:​9-17.